ភ្នំពេញ៖ «អ្នកជំនាញការអង្គការសហប្រជាជាតិ បានពន្លេចនូវភាពជោគជ័យ និងការអនុវត្តល្អៗរបស់កម្ពុជា»។ នេះជាការអះអាងរបស់ក្រុមប្រឹក្សាជាតិប្រយុទ្ធប្រឆាំងអំពើពុករលួយ (ACU) ក្រោយអង្គការសហប្រជាជាតិ វាយតម្លៃសម្រាប់ការអនុវត្តក្នុងមួយខែ។
ក្រុមប្រឹក្សាជាតិប្រយុទ្ធប្រឆាំងអំពើពុករលួយ (ACU) បានបង្ហាញឱ្យដឹងដូច្នេះតាមរយៈសេចក្តីជូនដំណឹង ស្តីពីកិច្ចប្រជុំលើកទី៤៤ អាណត្តិទី៣ រៀបចំឡើងកាលពីថ្ងៃទី២៥ ខែកុម្ភៈ ឆ្នាំ២០២៥។ ក្នុងនេះ ACU បានលើកឡើងថា អ្នកជំនាញការរបស់អង្គការសហប្រជាជាតិ បានមើលឃើញនូវភាពជោគជ័យរបស់កម្ពុជា ក្នុងការអនុវត្តកិច្ចការនានាពាក់ព័ន្ធនឹងការប្រឆាំងអំពើពុករលួយ។
ACU អះអាងដោយយោងតាមការមើលឃើញរបស់អង្គការសហប្រជាជាតិថា «អ្នកជំនាញការអង្គការសហប្រជាជាតិបានពន្លេចនូវភាពជោគជ័យ និងការអនុវត្តល្អៗរបស់កម្ពុជា ដូចជា៖ ការផ្ដល់សារសំខាន់ នៃគោលនយោបាយប្រឆាំងអំពើពុករលួយ ដោយបានទទួលស្គាល់ថា ជាគោលដៅនយោបាយស្នូលរបស់រាជរដ្ឋាភិបាល»។
អង្គការសហប្រជាជាតិ មើលឃើញភាពជោគជ័យរបស់កម្ពុជាបន្ថែមទៀតទៅលើ៖«កិច្ចសហការ (អ.ប.ព.) ជាមួយវិស័យឯកជន ក្នុងការប្រឆាំងអំពើពុករលួយ តាមរយៈការ ចុះ MoU និងគំនិតផ្តួចផ្តើមផ្សេងៗជាច្រើន, ការចូលរួមយ៉ាងសកម្មរបស់អង្គភាពស៊ើបការណ៍ហិរញ្ញវត្ថុកម្ពុជា (CAFIU) ក្នុងបណ្តាញ EGMONT ដែលសម្របសម្រួលការផ្លាស់ប្ដូរព័ត៌មានក្នុងបរិបទនៃការស៊ើបអង្កេតបទល្មើសពុករលួយឆ្លងដែន និងការទាមទារមកវិញនូវផលនៃបទល្មើស (Asset Recovery)»។ យ៉ាងណា ក្រៅពីការវាយតម្លៃ ACU បានឱ្យដឹងថា អ្នកជំនាញការរបស់អង្គការសហប្រជាជាតិ ក៏បានពិនិត្យ និងផ្តល់អនុសាសន៍មួយចំនួនដល់កម្ពុជាផងដែរ៕
