ពលរដ្ឋរងគ្រោះ ២គ្រួសារ នៅក្នុងឃុំវាលម្លូរ ស្រុកពញាក្រែក បានទទួលការជួយសង្រ្គោះពីសាខាកាកបាទក្រហមកម្ពុជា ខេត្តត្បូងឃ្មុំ
ភ្នំពេញ៖ ឯកឧត្តម ប៉ែន កុសល្យ ប្រធានគណៈកម្មាធិការសាខាកាកបាទក្រហមកម្ពុជា ខេត្តត្បូងឃ្មុំ នៅថ្ងៃសៅរ៍ទី២២ ខែកុម្ភៈ ឆ្នាំ២០២៥បានដឹកនាំឯកឧត្តម លោកជំទាវ លោក លោកស្រី អនុប្រធាន លេខាធិការ សមាជិក សមាជិកា គណ:កម្មាធិការសាខា អនុសាខា ក្រុមប្រតិបត្តិសាខា អនុសាខា និងក្រុមកាកបាទក្រហមកម្ពុជាឃុំវាលម្លូរ ព្រមទាំងសហការី ចុះទៅសួរសុខទុក្ខ និងនាំយកអំណោយមនុស្សធម៌របស់សាខាកាកបាទក្រហមកម្ពុជា ខេត្តត្បូងឃ្មុំ ទៅជូនដល់គ្រួសាររងគ្រោះចំនួន២គ្រួសារ ដែលមានអាសយដ្ឋានដូចតទៅ ÷
លោកអនុសេនីយ៍ទោ ឆេង ភារុណ អត្តលេខ ៧៥២៤៧ នាយរងផ្នែកព្រហ្មទណ្ឌនៃអធិការដ្ឋាននគរបាលស្រុកពញាក្រែក ដែលបានជូនគ្រោះថ្នាក់រអិលជើងធ្លាក់ពីលើឡានពេលជួយពន្លត់អគ្គីភ័យឆេះផ្ទះប្រជាពលរដ្ឋ ដែលកំពុងតែសម្រាកព្យាបាលនៅមន្ទីរពេទ្យបង្អែកស្រុកពញាក្រែក។
លោកស្រី ភឿន ភាក់ អាយុ៤៧ឆ្នាំ រស់នៅភូមិក្រញូង ឃុំវាលម្លូរ ស្រុកពញាក្រែក ខេត្តត្បូងឃ្មុំ បានរងគ្រោះថ្នាក់ដោយសារទុសេរខ្សែភ្លើងបណ្ដាលឱ្យឆេះផ្ទះស្ទើរតែទាំងស្រុង។
នាឱកាសនោះដែរ ឯកឧត្តម ប៉ែន កុសល្យ ប្រធានគណៈកម្មាធិការសាខា បាននាំយកនូវប្រសាសន៍ផ្តាំផ្ញើពីការសួរសុខទុក្ខ និងក្ដីនឹករឭកពីសំណាក់ឯកឧត្តម អ៊ាង សុផល្លែត ប្រធានកិត្តិយសសាខា និងជាពិសេសពីសំណាក់ សម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា ជាមួយក្រុមគ្រួសារជនងាយរងគ្រោះបំផុតនៅក្នុងភូមិ ឃុំ ស្រុក ខាងលើ អំពីសេចក្ដីនឹករឭករបស់សម្ដេចតែងតែគិតគូរពីសុខទុក្ខរបស់បងប្អូនប្រជាពលរដ្ឋគ្រប់ទិសទីដែលជាជនរងគ្រោះ និងងាយរងគ្រោះគ្រប់ៗគ្នាស្របតាមពាក្យស្លោក “ទីណាមានទុក្ខលំបាក ទីនោះមានកាកបាទក្រហមកម្ពុជា” និង “កាកបាទក្រហមកម្ពុជាមានគ្រប់ទីកន្លែង សម្រាប់គ្រប់ៗគ្នាមិនទុកនរណាម្នាក់ចោល”។
ជាក់ស្ដែង ឯកឧត្តមមានការសោកស្ដាយជាខ្លាំងចំពោះករណីរងគ្រោះខាងលើ និងបានផ្តែផ្តាំដល់បងប្អូនទាំងៃ់គ្នាគួរបន្ថែមការងប្រយ័ត្នឱ្យបានតែខ្លាំងជាងមុន ព្រោះថាការរងគ្រោះអាចកើតមានគ្រប់ពេល តែសំណាងដែរដោយវាមិនមានការប៉ះពាល់ដល់អាយុជីវិតរបស់បងប្អូន។ មិនតែប៉ុណ្ណោះ ឯកឧត្តមប្រធានក៏បានជូនពរដល់គ្រួសាររងគ្រោះទាំងអស់គ្នាសូមមានសុខភាពល្អឆាប់ជាសះស្បើយពីរោគាពាធ និងអំពាវនាវឱ្យបងប្អូនខិតខំថែរក្សាសុខភាពឱ្យបានល្អដើម្បីកុំឱ្យមានជំងឺឈឺថ្កាត់ដោយប្រកាន់ភ្ជាប់នូវអនាម័យ រស់នៅស្អាត ហូបស្អាត ផឹកស្អាត និងគោរពអនុវត្តតាមវិធានការនានារបស់ក្រសួងសុខាភិបាល ជាពិសេសសូមឱ្យបងប្អូនបន្តអនុវត្តឱ្យបានខ្ជាប់ខ្ជួននូវវិធានការការពារខ្លួនពីជំងឺឆ្លង ឬមិនឆ្លងនានាទៅតាមការណែនាំរបស់ក្រសួងសុខាភិបាល ហើយខិតខំបន្តការរកស៊ីបន្តទៀតដើម្បីភាពប្រសើរនាពេលបន្ទាប់។
អំណោយផ្តល់ជូនគ្រួសារនីមួយៗរួមមាន ÷ – ចំពោះអ្នកជំងឺសម្រាកព្យាបាលជំងឺនៅមន្ទីរពេទ្យបង្អែកស្រុកទទួលបាន ទឹកដោះគោដៅ១ឡូត៍ ផ្លែឈើ១កន្ត្រក និងថវិកាចំនួន២០០,០០០រៀល ។ – គ្រួសារភ្លើងឆេះផ្ទះទទួលបាន អង្ករចំនួន៥០គីឡូក្រាម មី១កេស ទឹកត្រី១យួរ ទឹកស៊ីអុីវយួរ ត្រីខ១០កំប៉ុង ប្រេងឆា១ដប បាឡុង១ឈុត និងថវិកាចំនួន ៥០០,០០០រៀលផងដែរ៕
