សម្តេចធិបតី ក្រើនរំលឹកដល់ក្រុមគ្រូពេទ្យទាំងអស់ ត្រូវយកចិត្តទុកដាក់ផ្តល់សេវាព្យាបាលជូនពលរដ្ឋដោយគ្មានការរើសអើង ជាពិសេសពលរដ្ឋណាដែលមានប័ណ្ណ ប.ស.ស.
ភ្នំពេញ៖ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា បានមានប្រសាសន៍ក្រើនរំលឹកដល់ក្រុមគ្រូពេទ្យទាំងអស់ ត្រូវតែយកចិត្តទុកដាក់ខ្ពស់បន្ថែមទៀត ក្នុងការផ្តល់សេវាព្យាបាលជូនដល់បងប្អូនប្រជាពលរដ្ឋដោយគ្មានការរើសអើង ជាពិសេសពលរដ្ឋណាដែលមានប័ណ្ណបេឡាជាតិសន្តិសុខសង្គម (ប.ស.ស.)។
សម្តេចធិបតី ហ៊ុន ម៉ាណែត បានមានប្រសាសន៍បែបនេះ ធ្វើឡើងក្នុងឱកាសអញ្ជើញជាអធិបតីក្នុងពិធីប្រកាសបើកកម្មវិធី «សប្តាហ៍គាំពារសង្គមកម្ពុជាឆ្នាំ២០២៥» និងប្រកាសដាក់ឱ្យអនុវត្តជាផ្លូវការនូវ «ក្របខណ្ឌគោលនយោបាយជាតិគាំពារសង្គម ឆ្នាំ២០២៤-២០៣៥» នាព្រឹកថ្ងៃទី២០ ខែកុម្ភៈ ឆ្នាំ២០២៥។
សម្ដេចធិបតី នាយករដ្ឋមន្រ្ដី ក៏បានអំពាវនាវដល់តួអង្គផ្ដល់សេវាគាំពារសង្គមទាំងអស់ ទាំងរដ្ឋ និងឯកជនត្រូវអនុវត្តការផ្ដល់សេវាដល់ប្រជាពលរដ្ឋឱ្យមានតម្លាភាព ត្រឹមត្រូវចំពោះប្រជាពលរដ្ឋទាំងអស់។ ហើយបើសិនជាមូលដ្ឋានមួយណាមិនអនុវត្តបានត្រឹមត្រូវ គឺត្រូវចាត់វិធានការឱ្យបានតឹងរ៉ឹងបំផុត។
សម្ដេចធិបតី បានគូសបញ្ជាក់ថា ថវិកាជាតិប៉ោងឡើង គឺរដ្ឋចំណាយទៅលើគោលនយោបាយគាំពារសង្គម និងការដំឡើងប្រាក់បៀវត្សមន្រ្ដីរាជការដែលមានការកើនឡើង មិនមែនយកទៅទិញនាវា ឬយន្តហោះចម្បាំងនោះទេ។ ប៉ុន្ដែរដ្ឋមិនអស់លុយទេ គឺរដ្ឋមានថវិកាសម្រាប់ដំឡើងប្រាក់បៀវត្សមន្រ្ដីរាជការ អតីតយុទ្ធជន និងគោលនយោបាយគាំពារសង្គមដល់ប្រជាពលរដ្ឋទៅមុខទៀត ៕
