បាងកក៖ ថៃកំពុងកំណត់គោលដៅដើម្បីរលាស់ខ្លួនក្លាយជាមជ្ឈមណ្ឌលល្បែងស៊ីសងពិភពលោក ជាមួយនឹងផែនការសាងសង់ឧស្សាហកម្មកាស៊ីណូ ដែលបង្កើតប្រាក់ចំណូលរាប់ពាន់លានដុល្លារ ជាពិសេសនឹងអាចក្លាយជាអន្ទាក់ទាក់ទាញការវិនិយោគអាជីវកម្មធំៗ និងជំរុញកំណើននៃវិស័យទេសចរណ៍។
លោក ហ្វ្រេឌ្រីក ហ្គូស៊ីន (Fredric Gushin) នៃក្រុមហ៊ុនប្រឹក្សាយោបល់ Spectrum Gaming Group ដែលជួយដឹកដៃសិង្ហបុរីកសាងឧស្សាហកម្មកាស៊ីណូជាប់ចំណាត់ថ្នាក់លេខ៣របស់ពិភពលោក បន្ទាប់ពីម៉ាកាវ និងក្រុងឡាសវេហ្កាស បានលើកឡើងថា៖«ពួកគេចង់ដំណើរការប្រកបដោយតម្លាភាពដែលនឹងរក្សាការវិនិយោគរបស់ពួកគេជាមួយនឹងបទប្បញ្ញត្តិសមស្រប។ នេះជាឱកាសមួយ »។ តាមការប៉ាន់ប្រមាណមួយចំនួនបានបង្ហាញថា ថៃមានសក្ដានុពលក្នុងការវ៉ាដាច់កាស៊ីណូដ៏ល្បីល្បាញរបស់សិង្ហបុរី ដោយការទាក់ទាញឧស្សាហកម្មល្បែងធំដូចជា៖ Las Vegas Sands Corp, MGM Resorts International និង Galaxy Entertainment។
យ៉ាងណា ដើម្បីទាក់ទាញឧស្សាហកម្មល្បែងល្បីឈ្មោះធំៗ អាជ្ញាធរថៃត្រូវដំណើរការអភិវឌ្ឍន៍ និងប្រកួតប្រជែងដោយបើកចំហ និងធ្វើឱ្យមានតម្លាភាពរវាងក្រុមហ៊ុនក្នុងស្រុក និងក្រុមហ៊ុនបរទេស។ កាលពីខែមុន គណៈរដ្ឋមន្ត្រីថៃ បានអនុម័តលើសេចក្តីព្រាងច្បាប់មួយ ដើម្បីធ្វើឱ្យល្បែងស៊ីសងស្របច្បាប់នៅកន្លែងកម្សាន្តនានា ជំរុញកំណើនសេដ្ឋកិច្ច ដែលកំពុងដាំក្បាលចុះ។ របាយការណ៍ស្រាវជ្រាវមួយបានប៉ាន់ប្រមាណកាលពីខែវិច្ឆិកាឆ្នាំមុនថា៖«ប្រាក់ចំណូលសរុបដែលថៃអាចរកបានពីល្បែងស៊ីសង អាចឈានដល់៩,១ពាន់លានដុល្លារ ដែលនឹងធ្វើឱ្យថៃនាំមុខសិង្ហបុរី»។
ថៃគ្រោងនឹងសាងសង់កាស៊ីណូក្នុងរាជធានីបាងកក កោះភូកេត និងកន្លែងចំនួនបីផ្សេងទៀត ដែលនឹងក្លាយជាមេដែកស្រូបទាញភ្ញៀវទេសចរក្នុងតំបន់ទាំងនោះ។ ថៃទទួលបានភ្ញៀវទេសចរបរទេសចំនួន៣៥,៥៥លាននាក់ក្នុងឆ្នាំ២០២៤ កើនឡើង២៦,២៧ ភាគរយបើធៀបនឹងឆ្នាំ២០២៣ ដែលជិតដល់កំណត់ត្រាមុនការរាតត្បាតនៃជំងឺកូវីដ-១៩ ចំនួន៣៩,៩លាននាក់ក្នុងឆ្នាំ២០១៩ ដោយបានជួយបង្កើតប្រាក់ចំណូលចំនួន១,៩១ពាន់ពាន់លានបាត ឬស្មើនឹង៥៦ពាន់លានដុល្លារ។ បច្ចុប្បន្ន ថៃបានអនុញ្ញាតឱ្យមានល្បែងស៊ីសង ជាការប្រណាំងសេះ ឆ្នោត ដែលគ្រប់គ្រងដោយរដ្ឋ និងការភ្នាល់លើកីឡាមួយចំនួនដូចជាប្រដាល់ជាដើម។
រាជរដ្ឋាភិបាលដែលដឹកនាំដោយគណបក្សភឿថៃ សង្ឃឹមថា ផែនការរបស់ខ្លួននឹងទាក់ទាញការវិនិយោគថ្មីយ៉ាងហោចណាស់១០០ពាន់លានបាត ឬស្មើនឹង៣ពាន់លានដុល្លារ សម្រាប់ការជំរុញប្រចាំឆ្នាំដល់ភ្ញៀវបរទេសពី៥ទៅ១០ភាគរយ ដែលជួយបង្កើតប្រាក់ចំណូលជាង១២ពាន់លានបាតក្នុងមួយឆ្នាំ៕
