ឯកឧត្តម ចាន់ សុធា អញ្ជើញបើកកិច្ចប្រជុំពិគ្រោះយោបល់លើសេចក្តីព្រាងបញ្ជីកម្រងសេវារដ្ឋបាលរបស់រដ្ឋបាលក្រុង ស្រុក ខណ្ឌ
ភ្នំពេញ៖ នៅក្រសួងមហាផ្ទៃ នាព្រឹកថ្ងៃទី១០ ខែកុម្ភៈ ឆ្នាំ២០២៥ នៅបន្ទប់សាលប្រជុំរាជធានីភ្នំពេញ នៃទីស្តីការក្រសួងមហាផ្ទៃ មានរៀបចំពិធីបើកកិច្ចប្រជុំពិគ្រោះយោបល់លើសេចក្តីព្រាងបញ្ជីកម្រងសេវារដ្ឋបាលរបស់រដ្ឋបាលក្រុង ស្រុក ខណ្ឌ ក្រោមអធិបតីភាព ឯកឧត្តម ចាន់ សុធា រដ្ឋលេខាធិការក្រសួងមហាផ្ទៃ និងជាប្រធានលេខាធិការដ្ឋាន គ.ជ.អ.ប។
ពិធីនេះមានការអញ្ជើញចូលរួមពីឯកឧត្តម លោក លោកស្រីប្រធាននាយកដ្ឋានានានៃអគ្គនាយកដ្ឋានពាក់ព័ន្ធនៃក្រសួងមហាផ្ទៃ ឯកឧត្តម អស់លោក លោកស្រីដែលជាតំណាងក្រសួងអប់រំ យុវជន និងកីឡា ក្រសួងវប្បធម៌ និងវិចិត្រសិល្បៈ ក្រសួងឧស្សាហកម្ម វិទ្យាសាស្រ្ត បច្ចេកវិទ្យា និងនវានុត្តន៍ ព្រមទាំង លោក លោកស្រីអភិបាល អភិបាលរង និងប្រធានការិយាល័យច្រកចេញចូលតែមួយក្រុង ស្រុក ខណ្ឌ សរុប១៣៨រូប។
គោលបំណងសំខាន់នៃកិច្ចប្រជុំពិគ្រោះយោបល់នេះ គឺដើម្បីពិនិត្យ ពិភាក្សា និងប្រមូលធាតុចូលបន្ថែមពីរដ្ឋបាលក្រុង ស្រុក ខណ្ឌ លើបញ្ជីកម្រងសេវារដ្ឋបាលរបស់រដ្ឋបាលក្រុង ស្រុក ខណ្ឌ ដែលផ្ដោតជាសំខាន់លើការពិនិត្យឡើងវិញលើប្រភេទសេវា តម្លៃសេវា និងសុពលភាពនៃសេវាក្នុងវិស័យមួយចំនួនដែលរាជរដ្ឋាភិបាលបានផ្ទេរជូនរដ្ឋបាលក្រុង ស្រុក ខណ្ឌ។
សូមបញ្ជាក់ផងដែរថា ផ្អែកតាមរយៈអនុក្រឹត្យលេខ១៨២ លេខ១៨៣ និងលេខ១៨៤ អនក្រ.បក ចុះថ្ងៃទី២ ខែធ្នូ ឆ្នាំ២០១៩ ស្ដីពីមុខងារ និងរចនាសម្ព័ន្ធរដ្ឋបាលក្រុង ស្រុក ខណ្ឌ រាជរដ្ឋាភិបាលបានប្រគល់ និងធ្វើប្រតិភូកម្មមុខងារថ្មីៗជាច្រើនបន្ថែមទៀតដល់រដ្ឋបាលក្រុង ស្រុក ខណ្ឌ ក្នុងគោលបំណងធានាដល់ការគ្រប់គ្រងរដ្ឋបាល និងការផ្តល់សេវាជូនប្រជាពលរដ្ឋប្រកបដោយគុណភាព ប្រសិទ្ធភាព តម្លាភាពគណនេយ្យភាព និងឆ្លើយតបទាន់ពេលវេលាតាមតម្រូវការជាក់ស្តែងរបស់ប្រជាពលរដ្ឋ ៕
