ប្រធានក្រុមប្រឹក្សាខេត្តបន្ទាយមានជ័យ អំពាវនាវបន្ថែមទៅដល់គ្រប់ស្ថាប័ន ទប់ស្កាត់ការកេងប្រវ័ញ្ចកម្លាំងពលកម្មលើស្រ្តី និងកុមារ តាមគ្រប់រូបភាព

បន្ទាយមានជ័យ៖ ឯកឧត្តម ប្លែក វ៉ារី ប្រធានក្រុមប្រឹក្សាខេត្តបន្ទាយមានជ័យ អញ្ជើញ ជាអធិបតីភាព បូកសរុបកិច្ចប្រជុំលទ្ធផលការងារប្រចាំឆ្នាំ២០២៤ និងលើកទិសដៅបន្តឆ្នាំ២០២៥ របស់គណៈកម្មាធិការពិគ្រោះយោបល់កិច្ចការស្រី្ដ និងកុមារខេត្ត ប្រារព្ធ ធ្វើ ឡើង នៅសាលាខេត្តបន្ទាយមានជ័យ។

លោកជំទាវ ឈុត ដាលីន ប្រធាន គ.កសក ខេត្ត មានប្រសាសន៍ ថា កិច្ចប្រជុំនេះមានរយៈពេលមួយថ្ងៃពេញហើយមានការចូលរួមពីគ្រប់ភាគីពាក់ព័ន្ធ អភិបាលក្រុង-ស្រុក មេបញ្ជាការកងកម្លាំងគ្រប់ជាន់ថ្នាក់ មេឃុំចៅ-សង្កាត់ និងអង្គការដៃគូពាក់ព័ន្ធបានចូលរួម បានធ្វេីបទបង្ហាញ និងបានបែងចែកជាក្រុមពិភាក្សា ពិគ្រោះយោបល់ជាមួយអ្នកចូលរួមទាំងអស់យ៉ាងផុលផុស ព្រមទាំងបានរកឃើញនូវបញ្ហាជាអាទិភាពសំខាន់ៗសម្រាប់រដ្ឋបាលខេត្ត យកទៅពិនិត្យពិចារណាក្នុងការឆ្លើយតប ដើម្បីលើកកម្ពស់ស្ត្រី កុមារ និងជនងាយរងគ្រោះក្នងខេត្ត ឱ្យកាន់តែល្អប្រសើរឡើង ។

ឯកឧត្តម ប្លែក វ៉ារី មានប្រសាសន៍ថា តាមរយៈ កិច្ចប្រជុំមួយថ្ងៃពេញ ពិតជាបានផ្តល់ឱកាសដល់គ្រប់អ្នកពាក់ព័ន្ធ ទទួលបាននូវព័ត៌មានទាំងឡាយរបស់គណៈកម្មាធិការពិគ្រោះយោ បល់ កិច្ចការស្រ្តី និងកុមារខេត្ត ដែលបានអនុវត្តក្នុងឆ្នាំ២០២៤ និងទិសដៅសកម្មភាពជាអាទិភាពនានា សម្រាប់កិច្ចអភិវឌ្ឍឆ្នាំ២០២៥ របស់គណៈកម្មាធិការពិគ្រោះយោបល់កិច្ចការស្រ្តី និងកុមារខេត្ត ហើយក៏ជាឱកាសមួយសម្រាប់សមាជិក សមាជិកាបញ្ចេញមតិយោបល់ លើកឡើងនូវបញ្ហាប្រឈម និងសំណូមពរ ព្រមទាំងចូលរួម ពិភាក្សាគ្នាប្រកប ដោយស្មារតី ទទួលខុសត្រូវមានតម្លាភាពគ្រប់ជ្រុងជ្រោយ ដែលជាមូលដ្ឋានសម្រាប់ធ្វើការផ្ទៀងផ្ទាត់ និងឆ្លុះបញ្ចាំងនូវភាពពិតភាពច្បាស់លាស់ជាក់ស្តែង អំពីសកម្មភាពអភិវឌ្ឍមូលដ្ឋាន និងការផ្តល់សេវារបស់រដ្ឋបាលខេត្ត ក្រុង ស្រុក និង ឃុំ សង្កាត់កន្លងមក។

ដើម្បីឱ្យកិច្ចការងារនេះសម្រេចទៅបានប្រកបដោយប្រសិទ្ធភាពឯកឧត្តម ប្រធានក្រុមប្រឹក្សាខេត្ត ក៏បានធ្វើការអំពាវនាវបន្ថែមទៅដល់គ្រប់ស្ថាប័នពាក់ព័ន្ធ អង្គការដៃគូ កងកម្លាំងសមត្ថកិច្ចគ្រប់ស្ថាប័ន បន្តរួមគ្នាទប់ស្កាត់ការកេងប្រវ័ញ្ច កម្លាំងពលកម្មលើស្រ្តី និងកុមារ តាមគ្រប់រូបភាព ជាពិសេសកម្លាំងឈរជើងតាមខ្សែបន្ទាត់ព្រំដែន ត្រូវបង្កើនការទទួលខុសត្រូវដោយយកចិត្តទុកដាក់គ្រប់គ្រងព្រំដែន និងលំហូរឆ្លងកាត់ព្រំដែនគ្រប់ទីតាំងឱ្យបានគត់មត់ ដើម្បីទប់ស្កាត់មូលហេតុរួមផ្សំ ដែលនាំឱ្យមានអំពើ កេងប្រវ័ញ្ចកម្លាំងពលកម្មលើស្រ្តី និងកុមារ ក៏ដូចជាអំពេីជួញដូរមនុស្ស និងការរំលោភបំពានផ្សេងៗ៕