សិស្សបឋមសិក្សា អនុវិទ្យាល័យ និងវិទ្យាល័យ ៥២៧នាក់ នៅជប៉ុន បានស្លាប់ដោយសារការធ្វើអត្តឃាតកាលពីឆ្នាំមុន

តូក្យូ៖ ទិន្នន័យបឋមរបស់រដ្ឋាភិបាលជប៉ុន បានបង្ហាញកាលពីថ្ងៃពុធទី២៩មករាថា សិស្សបឋមសិក្សា អនុវិទ្យាល័យ និងវិទ្យាល័យចំនួន៥២៧នាក់ក្នុងប្រទេសជប៉ុន បានស្លាប់ដោយសារការធ្វើអត្តឃាតកាលពីឆ្នាំមុន កើនឡើង១៤នាក់ធៀបនឹងឆ្នាំ២០២៣ និងកើនឡើងពីចំនួន៥១៤នាក់ក្នុងឆ្នាំ២០២២។

ក្នុងចំណោមចំនួនសរុបនៃសិស្សវិទ្យាល័យមានចំនួន៣៤៩នាក់ កើនឡើង២នាក់ សិស្សមធ្យមសិក្សាមានចំនួន១៦៣នាក់ កើនឡើង១០នាក់ និងសិស្សបឋមសិក្សាមានចំនួន១៥នាក់ កើនឡើង២នាក់ធៀបនឹងឆ្នាំ២០២៣។ នេះបើយោងតាមទិន្នន័យរបស់ក្រសួងសុខាភិបាល។ តាមយេនឌ័រ ២៣៩នាក់ជាកុមារា ថយចុះ២០នាក់ ខណៈកុមារីមាន២៨៨នាក់ កើនឡើង៣៤នាក់។ មន្ត្រីក្រសួងសុខាភិបាល ការងារ និងសុខុមាលភាព បានហៅស្ថានភាពនេះថាជាកម្រិតធ្ងន់ធ្ងរ ហើយថា រដ្ឋាភិបាលចាំបាច់ត្រូវធ្វើការបន្ថែមទៀត ដើម្បីដោះស្រាយបញ្ហានេះ។

ចំនួនសរុបនៃអ្នកធ្វើអត្តឃាតនៅក្នុងប្រទេសជប៉ុន បានធ្លាក់ចុះមកនៅត្រឹម២០២៦៨នាក់ ធ្លាក់ចុះ១៥៦៩នាក់ពីឆ្នាំ២០២៣ ជាតួលេខទាបបំផុតទីពីរចាប់តាំងពីកំណត់ត្រាបានចាប់ផ្តើមនៅឆ្នាំ១៩៧៨។ ការធ្វើអត្តឃាតរបស់បុរសបានធ្លាក់មកនៅត្រឹម១៣​៧៦៣នាក់ ធ្លាក់ចុះចំនួន១០៩៩នាក់ ដែលជាការថយចុះជាលើកដំបូងក្នុងរយៈពេល៣ឆ្នាំ។ ការធ្វើអត្តឃាតរបស់ស្ត្រី​ក៏​បាន​ថយ​ចុះ​ដែរ គឺ​ធ្លាក់​ចុះ​មកនៅត្រឹម៦៥០៥នាក់ ធ្លាក់​ចុះ​ជា​លើក​ទី​ពីរ​ជាប់​គ្នា។

បញ្ហាសុខភាព គឺជាមូលហេតុទូទៅបំផុតនៅពីក្រោយការធ្វើអត្តឃាតដែលមានចំនួន១១៩៨៦ករណី បន្ទាប់មកគឺបញ្ហាទាក់ទងនឹងសេដ្ឋកិច្ច បញ្ហាជីវិតមានចំនួន៥០៧៥ករណី និងបញ្ហាគ្រួសារ៤៣៣៤ ករណី។ ជាមួយគ្នា បញ្ហាទាក់ទងនឹងសាលារៀនមានចំនួន៥៧៨ករណី ខណៈការធ្វើអត្តឃាតចំនួន៤២ករណី ត្រូវបានផ្សារភ្ជាប់ជាមួយបញ្ហាពាក់ព័ន្ធនឹងប្រព័ន្ធផ្សព្វផ្សាយសង្គម ឬអន្តរកម្មតាមអ៊ីនធឺណិត៕