អតីតយុទ្ធជន កំពុងរស់នៅលើដីសម្បទានសង្គមកិច្ចនៅស្រុកសន្ទុក គោរពថ្លែងអំណរគុណសម្ដេចធិបតី និងលោកជំទាវ ដែលចាត់ក្រុមការងាររៀបចំតបណ្ដាញអគ្គិសនី សម្រាប់ពួកគាត់ប្រើប្រាស់ប្រចាំថ្ងៃ

ភ្នំពេញ៖ ក្រុមគ្រួសារអតីតយុទ្ធជនចំនួន១៤១ គ្រួសារ ដែលកំពុងរស់នៅលើដីសម្បទានសង្គមកិច្ចស្ថិតនៅភូមិដែលបងប្អូនអតីតយុទ្ធជនប្រសិទ្ធនាមថា(ភូមិមរតកតេជោថ្លុកព្រីង) ឃុំក្រយា ស្រុកសន្ទុក ខេត្តកំពង់ធំ បានគោរពថ្លែងអំណរគុណដ៏ជ្រាលជ្រៅជាទីបំផុត ចំពោះសម្ដេចមហាបវរធិបតី ហ៊ុន ម៉ាណែត និងលោកជំទាវបណ្ឌិត ពេជ ចន្ទមុន្នី តាមរយៈឯកឧត្តមទេសរដ្ឋមន្ត្រីនាយឧត្តមសេនីយ៍ គន់ គីម អនុប្រធាននិងជាអគ្គលេខាធិការសមាគមអតីតយុទ្ធជនកម្ពុជា ដែលបានអនុញ្ញាតឱ្យអាជ្ញាធរអគ្គិសនីកម្ពុជា សាងសង់បង្គោលភ្លើង តភ្ជាប់បណ្ដាញអគ្គិសនីចូលក្នុងភូមិរបស់បងប្អូនអតីតយុទ្ធជន ដែលបាននិងកំពុងរស់នៅមានរយៈពេលជាង៣ឆ្នាំកន្លងមកហើយ ដែលកន្លងមកមិនទាន់ទទួលបានបណ្ដាញអគ្គិសនីប្រើប្រាស់នៅឡើយ។

នៅរសៀលថ្ងៃទី២៩ ខែមករា ឆ្នាំ២០២៥ ឧត្តមសេនីយ៍ទោ សោម ស៊ុន មេបញ្ជាការតំបន់ប្រតិបត្តិការសឹករង ប្រធានសមាគមអតីតយុទ្ធជនកម្ពុជាខេត្តកំពង់ធំ បានអញ្ជើញទៅត្រួតពិនិត្យដំណើរការតបណ្ដាញអគ្គិសនី និងបានជួបសំណេះ សំណាលជាមួយក្រុមគ្រួសារអតីតយុទ្ធជន ដែលកំពុងរស់នៅលើដីសម្បទានសង្គមកិច្ច ដោយបានគូសបញ្ជាក់ថា ក្រុមគ្រួសារអតីតយុទ្ធជន ដែលមានជីវភាពលំបាកខ្វះខាត គ្មានដី គ្មានផ្ទះ ឬរស់នៅលើដីសាធារណៈ បានមកចាប់ឆ្នោតទទួលយកដី សម្បទានសង្គមកិច្ច ក្នុងមួយគ្រួសារមួយហិកតាកន្លះ និងផ្ទះថ្មីមួយខ្នង ដែលមានទំហំ ៥ម៉ែត្រគុណនឹង៧ ម៉ែត្រ ដែលជាអំណោយដ៏ថ្លៃថ្លារបស់សម្ដេចអគ្គមហាសេនាបតីតេជោ ហ៊ុន សែន អតីតនាយករដ្ឋមន្ត្រី ប្រធានព្រឹទ្ធសភា និងជាប្រធានសមាគមអតីតយុទ្ធជនកម្ពុជា កាលពីថ្ងៃទី២៣ ខែឧសភា ឆ្នាំ២០២១ ដែលបច្ចុប្បន្នបងប្អូនបានរស់នៅមានរយៈពេលជិត៤ឆ្នាំកន្លងទៅ ហើយមិនទាន់ទទួលបានបណ្ដាញអគ្គិសនី សម្រាប់ប្រើប្រាស់ក្នុងជីវភាពប្រចាំថ្ងៃនៅឡើយ។

លោកតា សំ ប៉ាន អតីតយុទ្ធជនពិការ ដែលកំពុងរស់នៅលើដីសម្បទានសង្គមកិច្ច បានគោរពថ្លែងអំណរគុណដ៏ជ្រាលជ្រៅជាទីបំផុតចំពោះសម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា និងលោកជំទាវ តាមរយៈឯកឧត្តម កែវ រតនៈ រដ្ឋមន្ត្រីក្រសួងរ៉ែនិងថាមពល ព្រមទាំងឯកឧត្តមទេសរដ្ឋមន្ត្រីនាយឧត្តមសេនីយ៍ គន់ គីម ដែលបានខិតខំប្រឹងប្រែងចាត់ចែងក្រុមការងារ រៀបចំតបបណ្ដាញអគ្គិសនី ជូនដល់បងប្អូនអតីតយុទ្ធជន ដើម្បីបានប្រើប្រាស់ក្នុងជីវភាពប្រចាំថ្ងៃ និងសូមគោរពជូនពរសម្ដេច លោកជំទាវ ឯកឧត្តម លោក លោកស្រីទាំងអស់ សូមទទួលបាននូវពុទ្ធពរទាំង ៤ប្រការ កុំបីឃ្លៀងឃ្លាតឡើយ។