ទោះមិនទាន់ក្លាយជាអង្គភាពផ្តល់សេវាសាធារណៈគំរូ តែអង្គភាពជាបេក្ខភាព បង្ហាញពីការវិវឌ្ឍន៍ខ្លួនគួរឱ្យកត់សម្គាល់ទាំងវឌ្ឍនភាពអង្គភាព និងនវានុវត្តន៍ក្នុងការផ្តល់សេវាជូនពលរដ្ឋ
ភ្នំពេញ៖ កម្មវិធីវាយតម្លៃ និងទទួលស្គាល់អង្គភាពផ្តល់សេវាសាធារណៈគំរូ ដែលដឹកនាំរៀបចំដោយក្រសួងមុខងារសាធារណៈ ជាផ្នែកមួយដែលចូលរួមលើកកម្ពស់ឧត្តមានុវត្តន៍ និងនវានុវត្តន៍ ក្នុងការផ្តល់សេវាសាធារណៈជូនប្រជាពលរដ្ឋកាន់តែប្រសើរ។
អង្គភាពដែលជាបេក្ខភាពទាំងអស់ត្រូវឆ្លងកាត់ការវាយតម្លៃ ថ្នាក់ក្រុង ស្រុក ខណ្ឌ ថ្នាក់រាជធានីខេត្ត និងថ្នាក់ជាតិ។
ក្នុងដំណើរការនៃការវាយតម្លៃអង្គភាពដែលបានជ្រើសសម្រាំង គណៈកម្មការដែលបានចុះវាយតម្លៃដោយផ្ទាល់តាមអង្គភាពនីមួយៗ បានកត់សម្គាល់ថាអង្គភាពដែលជាបេក្ខភាព ទោះមិនទាន់ទទួលបានចំណាត់ថ្នាក់ជាជ័យលាភីយ៉ាងណាក្តី ក៏មានការវិវឌ្ឍន៍ខ្លួនគួរឱ្យកត់សម្គាល់ ទាំងការអភិវឌ្ឍអង្គភាពផ្ទាល់ និងការបម្រើសេវាជូនប្រជាពលរដ្ឋនៅមូលដ្ឋានកាន់តែប្រសើរ។
ក្នុងឆ្នាំ២០២៤ អង្គភាពដែលបានដាក់ពាក្យចូលរួមប្រកួតប្រជែងក្លាយជាអង្គភាពផ្តល់សេវាសាធារណៈគំរូ ក្នុងវិស័យអប់រំនិងសុខាភិបាល មានចំនួនសរុប ៧៣៣អង្គភាព មកពី២៥ រាជធានី ខេត្ត។ ក្នុងនោះ អង្គភាពទាំងអស់ត្រូវបានជ្រើសរើសមកប្រកួតប្រជែងនៅថ្នាក់ជាតិ មានចំនួន ១៧៦អង្គភាព។ ក្រោយពីបានពិនិត្យ និងវាយតម្លៃ ក្នុងដំណាក់កាលជ្រើសសម្រាំង គណៈកម្មការបានជ្រើសរើសបេក្ខភាពសរុបចំនួន៥០ ក្នុងនោះ មត្តេយ្យសិក្សាចំនួន ១០អង្គភាព វិទ្យាល័យចំនួន ១០អង្គភាព មន្ទីរពេទ្យបង្អែកកម្រិត១ កម្រិត២ និងកម្រិត៣ ចំនួន ១០អង្គភាពក្នុងមួយកម្រិត ដើម្បីបន្តការចុះវាយតម្លៃដោយផ្ទាល់ ឆ្ពោះទៅកាន់ការផ្តល់ចំណាត់ថ្នាក់ និងការធ្វើបទបង្ហាញចុងក្រោយចំនួន៥ អង្គភាព ក្នុងផ្នែកនីមួយៗ។
ក្នុងដំណើរការចុះវាយតម្លៃនៅទីតាំងជាក់ស្ដែង របស់បេក្ខភាពជ័យលាភីអង្គភាពផ្ដល់សេវាសាធារណៈគំរូក្នុងវិស័យអប់រំនិងវិស័យសុខាភិបាលឆ្នាំ២០២៤ មានការចូលរួមពីគណៈកម្មការត្រួតពិនិត្យកិច្ចការទូទៅនៃគ.វ.ជ. គណៈកម្មការបច្ចេកទេសអន្តរក្រសួងនៃគ.វ.ជ. តំណាងក្រុមប្រឹក្សាខេត្ត អភិបាលរងនៃគណៈអភិបាលខេត្ត មន្ទីរមុខងារសាធារណៈ មន្ទីរអប់រំ យុវជន និងកីឡា មន្ទីរសុខាភិបាល មន្ទីរបរិស្ថាន អភិបាលនៃគណៈអភិបាលក្រុង ស្រុក មេឃុំ ចៅសង្កាត់ មេប៉ុស្ដិ៍នគរបាល សហគមន៍ នាយក នាយករង/នាយិការង លោកគ្រូ អ្នកគ្រូនៃវិទ្យាល័យ និងមត្តេយ្យសិក្សា ប្រធាន អនុប្រធានមន្ទីរពេទ្យបង្អែកសាមី មន្រ្តីជំនាញនៃរដ្ឋបាលខេត្ត និងក្រុមការងារលេខាធិការនៃគ.វ.ជ. ព្រមទាំងប្រជាពលរដ្ឋអ្នកទទួលសេវាពីបេក្ខភាព។
