ញូវដែលី៖ ឥណ្ឌូណេស៊ី និងឥណ្ឌានឹងពិភាក្សាគ្នាអំពីការជំរុញទំនាក់ទំនងលើវិស័យការពារជាតិ រួមទាំងកិច្ចព្រមព្រៀងដ៏មានសក្ដានុពលក្នុងការលក់មីស៊ីលតម្រង់ទិសល្បឿនលឿនជាងសំឡេងផលិតដោយក្រុហ៊ុនរុស្ស៊ី និងឥណ្ឌា ទៅឱ្យរដ្ឋធានីហ្សាការតា ក្នុងអំឡុងដំណើរទស្សនកិច្ចរបស់ប្រធានាធិបតីឥណ្ឌូណេស៊ីទៅកាន់រដ្ឋធានីញូវដេលីក្នុងសប្តាហ៍នេះ។ នេះបើយោងតាមប្រភពដែលដឹងពីបញ្ហានេះបានទម្លាយចេញ។
បងធំប្រចាំតំបន់អាស៊ានឥណ្ឌូណេស៊ីបានពិភាក្សាគ្នាជាយូរមកហើយជាមួយក្រុមហ៊ុន BrahMos Aerospace ដែលជាក្រុមហ៊ុនបណ្តាក់ទុនរួមគ្នារវាងឥណ្ឌា និងរុស្ស៊ី ដើម្បីទិញមីស៊ីលរយៈចម្ងាយមធ្យម ដែលអាចបំពាក់លើនាវាចម្បាំងបាន។ ក្រុមហ៊ុន BrahMos បានប្រាប់ទីភ្នាក់ងារសារព័ត៌មានរ៉យទ័រនៅឆ្នាំ២០២៣ ថា ខ្លួនស្ថិតនៅក្នុងការពិភាក្សាកម្រិតខ្ពស់ជាមួយរដ្ឋធានីហ្សាការតាលើកិច្ចព្រមព្រៀងដែលមានតម្លៃពី ២០០លានដុល្លារទៅ ៣៥០លានដុល្លារ។ មនុស្សពីរនាក់ដែលដឹងអំពីបញ្ហានេះបានឱ្យដឹងថា កិច្ចព្រមព្រៀងមួយមិនទាន់ត្រូវបានបញ្ចប់នៅឡើយទេ ហើយការចរចាកំពុងបន្ត។
ប្រធានាធិបតីឥណ្ឌូណេស៊ី លោក ប្រាបូវូ ស៊ូប៊ីនតូ (Prabowo Subianto) បំពេញទស្សនកិច្ចប្រទេសឥណ្ឌានៅសប្តាហ៍នេះ។ លោកបញ្ជាក់ថា ដំណើរទស្សនកិច្ចរបស់លោកនឹងផ្តោតលើការពង្រឹងទំនាក់ទំនងក្នុងវិស័យសន្តិសុខ ដែនសមុទ្រ និងផ្នែកបច្ចេកវិទ្យាឌីជីថល។ អ្នកនាំពាក្យក្រសួងការពារជាតិឥណ្ឌូណេស៊ី បាននិយាយថា ពួកគេមិនមានព័ត៌មានណាមួយដើម្បីចែករំលែកលើកិច្ចពិភាក្សានោះទេ។
ប្រទេសនៅអាស៊ីអាគ្នេយ៍ ក៏ដូចជាមជ្ឈិមបូព៌ា បានបង្ហាញចំណាប់អារម្មណ៍ចំពោះមីស៊ីល BrahMos។ ក្រុមហ៊ុនបានចុះហត្ថលេខាលើកិច្ចព្រមព្រៀងបរទេសលើកដំបូងរបស់ខ្លួនជាមួយប្រទេសហ្វីលីពីនក្នុងឆ្នាំ២០២២។ ក្រុមអ្នកវិភាគ បានលើកឡើងថា មីស៊ីល BrahMos គឺជាផ្នែកសំខាន់នៃការទូតការពារជាតិរបស់ឥណ្ឌាចាប់តាំងពីឆ្នាំ២០២០ មក។ ប្រទេសភាគច្រើននៅអាស៊ីអាគ្នេយ៍បានបង្កើនការចំណាយលើវិស័យការពារជាតិក្នុងប៉ុន្មានឆ្នាំថ្មីៗនេះ ដើម្បីឆ្លើយតបទៅនឹងការអះអាងកាន់តែខ្លាំងរបស់មហាយក្សចិននៅក្នុងសមុទ្រចិនខាងត្បូង។
