លោកមេធាវី សាំង វណ្ណៈ៖ តួនាទីរបស់មេធាវី កាន់តែមានសារៈសំខាន់ ខណៈពេលដែលសង្គមត្រូវបានធ្វើទំនើបកម្ម និងមានការវិវត្តន៍ឥតឈប់ឈរ ជាពិសេសនៅក្នុងបរិបទនៃសង្គមនីតិរដ្ឋ

ភ្នំពេញ៖ នាឱកាសអញ្ជើញធ្វើបាឋកថា ចែករំលែកចំណេះដឹងស្តីពី «វិជ្ជាជីវៈមេធាវី តួនាទីមេធាវីក្នុងវិស័យយុត្តិធម៌និងបែបបទនៃការ ចូលប្រកប វិជ្ជាជីវៈមេធាវី» ជូនដល់បុគ្គលិក សាស្ត្រាចារ្យ និងនិស្សិត សាកលវិទ្យាល័យ អាស៊ី អឺរ៉ុប ដែលបានចូលរួមជិត ៤០០នាក់ នាព្រឹកថ្ងៃទី២២ ខែមករា ឆ្នាំ២០២៥នេះ លោកមេធាវី សាំង វណ្ណៈ ប្រធានគណៈមេធាវីនៃកម្ពុជា បានថ្លែងបញ្ជាក់ថា តួនាទីរបស់មេធាវី កាន់តែមានសារៈសំខាន់ ខណៈពេលដែលសង្គមត្រូវបានធ្វើទំនើបកម្ម និងមានការវិវត្តន៍ឥតឈប់ឈរ ជាពិសេសនៅក្នុងបរិបទនៃសង្គមនីតិរដ្ឋ ដែលច្បាប់ និងលិខិតបទដ្ឋាន គតិយុត្តមានកាន់តែច្រើនឡើងៗពីមួយថ្ងៃទៅមួយថ្ងៃ ពីមួយឆ្នាំទៅមួយឆ្នាំ។

លោកមេធាវី សាំង វណ្ណៈ បានបន្ថែមថា នៅពេលប្រជាពលរដ្ឋអាចមានការលំបាក ក្នុងការស្វែងយល់ឱ្យបានច្បាស់លាស់ និងគោរពឱ្យបានត្រឹមត្រូវ តាមខ្លឹមសារនៃច្បាប់ និងបទប្បញ្ញត្តិជាធរមាន ហេតុនេះតួនាទី របស់មេធាវី កាន់តែមានភាពចាំបាច់ដើម្បីធានាបាន នូវសុវត្ថិភាពគតិយុត្តនៃសកម្មភាពអាជីវកម្ម និងសកម្មភាពរស់នៅប្រចាំថ្ងៃ មួយចំនួនរបស់ ប្រជាពលរដ្ឋ នៅក្នុងសង្គមតាមរយៈ ការផ្តល់សេវាប្រឹក្សាយោបល់ ការរៀបចំឯកសារផ្លូវច្បាប់នានាដែលច្បាប់អនុញ្ញាត និងដើម្បីការពារនូវ សិទ្ធិស្របច្បាប់ នៅក្នុងករណីដែលមានវិវាទកើតឡើង។

បន្ថែមពីនេះក្នុងករណីដែលវិវាទត្រូវបានប្តឹង ផ្តល់ទៅដល់តុលាការ ជំនួយរបស់មេធាវីក្នុងការការពារក្តីជូនប្រជាពលរដ្ឋនៅក្នុងដំណើរការនីតិវិធី តុលាការ រឹងរឹតតែមានភាពចាំបាច់ និងមានសារៈសំខាន់ថែមទៀត ម៉្យាងដោយសារនីតិវិធីក្នុងប្រព័ន្ធ តុលាការមានច្រើនប្រភេទ ហើយមានលក្ខណៈបច្ចេកទេសស៊ីជម្រៅ និងម៉្យាងទៀត ដើម្បីជួយដល់ប្រជាពលរដ្ឋក្នុងការការពារសិទ្ធិ និងផលប្រយោជន៍ស្របច្បាប់របស់ខ្លួន នៅក្នុងកិច្ចដំណើរការនៃនីតិវិធី នានារបស់តុលាការ។

ក្នុងនាមជាប្រធានស្ថាប័នបម្រើដល់ការអនុវត្តច្បាប់ និងយុត្តិធម៌សង្គម លោកប្រធានគណៈមេធាវី ក៏បានលើកទឹកចិត្ត ប្អូនៗជានិស្សិតទាំងអស់ ពិសេសនិស្សិតជំនាញនីតិសាស្ត្រ ត្រូវខិតខំយកចិត្តទុកដាក់រៀនសូត្រ បង្កើនចំណេះដឹង សិក្សាស្រាវជ្រាវច្បាប់ និងត្រូវស្វែងយល់អំពីរីកចម្រើននៃសង្គមជាតិ ត្រូវមានសុទិដ្ឋិនិយមចំពោះការដឹកនាំនៃស្ថាប័ននានារបស់ជាតិ ប្រព័ន្ធយុត្តិធម៌ ដំណើរការនៃការពង្រឹងនីតិរដ្ឋនៅកម្ពុជា ការអនុវត្តច្បាប់ និងលទ្ធិប្រជាធិបតេយ្យសេរីពហុបក្សនៅកម្ពុជា និង តថភាពជាក់ស្តែងនៃសង្គម នយោបាយ សេដ្ឋកិច្ច ព្រមទាំងស្ថានភាពនៃប្រជាជន។

បន្ថែមពីនេះលោកប្រធានគណៈមេធាវី បានគូសបញ្ជាក់ថា គោលនយោបាយដឹកនាំទាំង ៩ចំណុច ដែលលោកប្រធានបានដាក់ចេញ ជាពិសេសពាក់ព័ន្ធនឹងការបណ្ដុះបណ្ដាល ដល់អ្នកដែលមានឧបនិស្ស័យ មានបំណងចូលប្រកបវិជ្ជាជីវៈមេធាវីគឺអាចដាក់ពាក្យចូលរួមប្រឡងប្រជែង នៅពេលមានសេចក្ដីជូនដំណឹង ហើយសូមមានជំនឿចិត្តថា « ចេះគឺជាប់ »។

នាឱកាសនោះអ្នកឧកញ៉ា លី ឃុនថៃ បានឱ្យដឹងដែរថា ដើម្បីជួយពង្រឹងសមត្ថភាព និងលើកកម្ពស់ចំណេះដឹងថ្មីៗ, សាកលវិទ្យាល័យ អាស៊ី អឺរ៉ុប បានរៀបចំនូវកម្មវិធីបាថកថា សិក្ខាសាលា និងវេទិការវិទ្យាសាស្ត្រ ជាច្រើនដង និងជាប្រចាំឆ្នាំទៅតាមកម្មវិធីដែលបានគ្រោងទុក ក្នុងរង្វង់ប្រមាណពី១០-១៥ដង តាមរយៈជំនាញផ្សេងៗគ្នានៃមហាវិទ្យាល័យនីមួយៗ និងសាលាក្រោយឧត្តម ដោយបានអញ្ជើញបណ្ឌិតសភាចារ្យ សាស្ត្រាចារ្យ អ្នកឯកទេស វាគ្មិនល្បីៗកម្រិតគរុសភា(Academic) ដែលមានជំនាញជ្រៅជ្រះទាំងក្នុងវិស័យសាធារណៈ និងឯកជន៕