ក្រសួងសង្គមកិច្ច ចុះហត្ថលេខាជាមួយសមាគម និងអង្គការមិនមែនរដ្ឋាភិបាលចំនួន ២០ ដែលអនុវត្តគម្រោងផ្តោតលើក្រុមគោលដៅជាកុមារ ជនមានពិការភាព កិច្ចការគ្រួសារ និងជនងាយរងគ្រោះ
ភ្នំពេញ៖ នៅទីស្ដីការក្រសួងសង្គមកិច្ច នាព្រឹកថ្ងៃទី២២ ខែមករា ឆ្នាំ២០២៥ ឯកឧត្ដម ស៊ូនី វង្សវិសិដ្ឋ រដ្ឋលេខាធិការ តំណាងដ៏ខ្ពង់ខ្ពស់ ឯកឧត្តម ជា សុមេធី រដ្ឋមន្រ្តីក្រសួងសង្គមកិច្ច អតីតយុទ្ធជន និងយុវនីតិសម្បទា បានអញ្ជើញចូលរួមជាអធិបតី និងជាហត្ថលេខី ក្នុងពិធីចុះហត្ថលេខាកិច្ចព្រមព្រៀងគម្រោង រវាងក្រសួងសង្គមកិច្ច អតីតយុទ្ធជន និងយុវនីតិសម្បទា ជាមួយសមាគម និងអង្គការមិនមែនរដ្ឋាភិបាលចំនួន ២០ ដែលអនុវត្តគម្រោងផ្តោតលើក្រុមគោលដៅជាកុមារ ជនមានពិការភាព កិច្ចការគ្រួសារ និងជនងាយរងគ្រោះដែលមានថវិកាសរុបជាង ២៣លានដុល្លារអាមេរិក ដែលអនុវត្តគម្រោង និងចំណាយដោយផ្ទាល់ដោយសមាគម និងអង្គការមិនមែនរដ្ឋាភិបាល។
គម្រោងទាំងនេះអនុវត្តនៅរាជធានីភ្នំពេញ និងបណ្តាខេត្តមួយចំនួនដូចជា ខេត្តកណ្តាល កំពង់ស្ពឺ តាកែវ កំពង់ចាម កំពង់ធំ បាត់ដំបង និងខេត្តសៀមរាប ដែលធ្វើសកម្មភាពដល់ក្រុមគោលដៅ ជនរងគ្រោះ និងងាយរងគ្រោះ ដូចជាកុមារ ចាស់ជរា ជនក្រីក្រ និងជនមានពិការភាព៕
