រដ្ឋមន្ដ្រីមហាផ្ទៃ ណែនាំរដ្ឋបាលរាជធានីជំរុញអ្នកវិនិយោគបណ្ដាក់ទុនសាងសង់ផ្ទះតម្លៃសមរម្យ សម្រាប់លក់ជូនមន្ដ្រីរាជការ និងណែនាំដល់រដ្ឋបាលរាជធានី-ខេត្ត ត្រូវពង្រឹងបញ្ហាចរាចរណ៍ និងការរៀបចំសណ្ដាប់ធ្នាប់សាធារណៈ

ភ្នំពេញ៖ ឯកឧត្ដមអភិសន្ដិបណ្ឌិត ស សុខា ឧបនាយករដ្ឋមន្ដ្រី រដ្ឋមន្ដ្រីក្រសួងមហាផ្ទៃ បានណែនាំដល់រដ្ឋបាលរាជធានីភ្នំពេញ ពិនិត្យលទ្ធភាពលើកទឹកចិត្ត ជំរុញឲ្យអ្នកវិនិយោគបណ្ដាក់ទុនសាងសង់ផ្ទះដែលមានតម្លៃសមរម្យ សម្រាប់លក់ជូនមន្ដ្រីរាជការ និងណែនាំដល់រដ្ឋបាលរាជធានី-ខេត្ត ត្រូវពង្រឹងបញ្ហាចរាចរណ៍ និងការរៀបចំសណ្ដាប់ធ្នាប់សាធារណៈ។

ក្នុងឱកាសអញ្ជើញបិទសន្និបាតបូកសរុបលទ្ធផលការងារឆ្នាំ២០២៤ និងលើកទិសដៅបន្ដរបស់រដ្ឋបាលរាជធានីភ្នំពេញ នារសៀលថ្ងៃទី២២ ខែមករា ឆ្នាំ២០២៥នេះ ឯកឧត្ដមអភិសន្ដិបណ្ឌិត ស សុខា ឧបនាយករដ្ឋមន្ដ្រី រដ្ឋមន្ដ្រីក្រសួងមហាផ្ទៃបានលើកឡើងថា ក្នុងករណីផ្ទះដាក់លក់ត្រឹមតម្លៃចន្លោះ២ ទៅ៣ម៉ឺនដុល្លារ ដូច្នេះមន្ដ្រីរាជការដែលមានប្រាក់បៀវត្ស៍ចន្លោះ១លានកន្លះ ទៅ២លានរៀល អាចនឹងមានលទ្ធភាពក្នុងការបង់រំលស់។

ឯកឧត្ដមឧបនាយករដ្ឋមន្ដ្រី ស សុខា ក៏បានលើកទឹកចិត្តឲ្យវិស័យឯកជន ពិនិត្យលទ្ធភាពក្នុងការសាងសង់ផ្ទះប្រភេទនេះ ហើយរដ្ឋក៏ពិនិត្យលទ្ធភាពក្នុងការអនុគ្រោះកម្រិតណាមួយ ដើម្បីឲ្យគម្រោងនេះចេញជារូបរាងឡើង។

ឯកឧត្ដមឧបនាយករដ្ឋមន្ដ្រី បានណែនាំឲ្យរដ្ឋបាលរាជធានី-ខេត្តទាំងអស់ ត្រូវពិនិត្យឡើងវិញចំពោះទីតាំងដីដែលផ្ដល់សិទ្ធិឲ្យក្រុមហ៊ុនឯកជនវិនិយោគហើយ ប៉ុន្ដែក្រុមហ៊ុននោះមិនទាន់កសាងហេដ្ឋារចនាសម្ព័ន្ធដើម្បីអភិវឌ្ឍន៍ទីតាំងដែលខ្លួនទទួលបានសិទ្ធិប្រសិនបើក្រុមហ៊ុនមួយទទួលបានអាជ្ញាប័ណ្ណ ហើយទុកដីឲ្យនៅទំនេរក៏ជះឥទ្ធិពលមិនល្អសម្រាប់ការរៀបចំផែនការអភិវឌ្ឍដូចគ្នា។

ព្រមជាមួយគ្នានោះ នៅក្នុងពិធីបិទសន្និបាតឯកឧត្តមអភិសន្តិបណ្ឌិត ស សុខា ឧបនាយករដ្ឋមន្ដ្រី រដ្ឋមន្ដ្រីក្រសួងមហាផ្ទៃ បានណែនាំឲ្យរដ្ឋបាលរាជធានី-ខេត្តទាំងអស់ ត្រូវពង្រឹងយកចិត្តទុកដាក់ឡើងវិញបញ្ហាចរាចរណ៍ និងការរៀបចំសណ្ដាប់ធ្នាប់សាធារណៈនៅតាមទីប្រជុំជន សំដៅលើកកម្ពស់សោភ័ណភាពក្នុងការរស់នៅឲ្យកាន់តែល្អប្រសើរបន្ថែមទៀត។

ឯកឧត្តមអភិសន្ដិបណ្ឌិត បានទាញការចាប់អារម្មណ៍ថា ក្នុងមួយរយៈពេលចុងក្រោយនេះ គ្រោះថ្នាក់ចរាចរណ៍កាន់តែមានភាពកាចសាហាវជាងមុខ និងតែងបង្កឲ្យមានការបាត់បង់ជីវិតជាបន្ដបន្ទាប់ ពិសេសក្នុងរាជធានីភ្នំពេញ។

ឯកឧត្តមឧបនាយករដ្ឋមន្ដ្រី ស សុខា បានគូសបញ្ជាក់ថា កន្លងទៅថ្មីៗនេះ ករណីគ្រោះថ្នាក់ចរាចរណ៍នៅលើផ្លូវ៦០ម៉ែត្រ បានបន្សល់នូវសោដនកម្មយ៉ាងសោកសៅបំផុត ពិសេសចំពោះក្រុមគ្រួសារជនរងគ្រោះ។ លើសពីនេះ ប្រៀបដូចជាការបំផ្លិតបំផ្លាញនូវធនធានមនុស្ស ផ្ទុយពីអ្វីដែលរាជរដ្ឋាភិបាល និងអាជ្ញាធរ ព្រមទាំងប្រជាពលរដ្ឋចង់បាន។

ជាចំណែកមួយក្នុងការកាត់បន្ថយគ្រោះថ្នាក់ចរាចរណ៍ ឯកឧត្តមអភិសន្ដិបណ្ឌិត ស សុខា ណែនាំឲ្យពង្រឹងឡើងវិញចំពោះការគ្រប់គ្រងម៉ោងចេញ-ចូលក្នុងរាជធានីភ្នំពេញ របស់រថយន្ដធុនធំ រថយន្ដក្រឡុកស៉ីម៉ង់ជាដើម ដែលកន្លងទៅហាក់មានការឆក់ល្វែង ហើយលោកឃើញថា រថយន្ដក្រឡុកស៉ីម៉ង់ខ្លះមិនគោរពទៅតាមម៉ោងកំណត់របស់រដ្ឋបាលរាជធានីភ្នំពេញ។

ជាមួយគ្នានេះ ឯកឧត្តមឧបនាយករដ្ឋមន្ដ្រី បានជំរុញឲ្យរដ្ឋបាលរាជធានី-ខេត្ត ក៏ត្រូវបន្ដពង្រឹងការអនុវត្តគោលនយោបាយភូមិ ឃុំសង្កាត់ មានសុវត្ថិភាព ឲ្យកាន់តែមានប្រសិទ្ធភាពខ្ពស់។ ក្នុងនោះ ក៏ត្រូវបន្ដលើការងារប្រយុទ្ធប្រឆាំងគ្រឿងញៀន ហើយសមត្ថកិច្ចគ្រប់ស្ថាប័នពាក់ព័ន្ធត្រូវពង្រឹងប្រតិបត្តិការរបស់ខ្លួន ពិសេសទីតាំងកម្សាន្ដសប្បាយ កុំឲ្យមានការលួចបង្កប់ការប្រើប្រាស់គ្រឿងញៀន។

បន្ថែមពីនេះ ឯកឧត្តមឧបនាយករដ្ឋមន្ដ្រី ក៏បានណែនាំឱ្យរដ្ឋបាលរាជធានីរៀបចំសណ្ដាប់ធ្នាប់នៅតាមចិញ្ចើមផ្លូវសាធារណៈ ដោយត្រូវផ្ដោតការយកចិត្តទុកដាក់ឡើងវិញនៅតាមបណ្ដាខណ្ឌទាំង១៤ ជៀសវាងការលក់ដូរនៅលើចិញ្ចើមផ្លូវ ដែលបណ្ដាលឲ្យខូចសណ្ដាប់ធ្នាប់ និងម្យ៉ាងទៀតជាបង្កឲ្យមានគ្រោះថ្នាក់ជាយថាហេតុ៕