រដ្ឋមន្ត្រីបរិស្ថាន៖ អ្វីដែលយើងទទួលបានជោគជ័យពីខេត្តកំពង់ឆ្នាំងនោះគឺប្រជាជន ប្ដេជ្ញាចិត្តមិនប្រើថង់ប្លាស្ទិច និងធ្វើសកម្មភាពរើសសំរាមតាមដងវិថី តាមទីសាធារណៈនានា
ភ្នំពេញ៖ ឯកឧត្តមបណ្ឌិត អ៊ាង សុផល្លែត រដ្ឋមន្ត្រីក្រសួងបរិស្ថាន បានបញ្ជាក់ថា អ្វីដែលយើងទទួលបានជោគជ័យពីខេត្តកំពង់ឆ្នាំងនោះគឺប្រជាជននៅខេត្តកំពង់ឆ្នាំងមិនត្រឹមតែប្ដេជ្ញាចិត្តមិនប្រើថង់ប្លាស្ទិចទេ គាត់បានធ្វើសកម្មភាពរើសសំរាមតាមដងវិថី តាមទីសាធារណៈនានា។ បើយើងពិនិត្យទិដ្ឋភាពជារួមសកម្មភាពនៅខេត្តកំពង់ឆ្នាំង ជារៀងរាល់ថ្ងៃព្រហស្បតិ៍ សិស្សានុសិស្ស ១១ម៉ឺននាក់ចេញមករើសសំរាមថងប្លាស្ទិក ដែលនេះជាការប្តេជ្ញាចិត្តក្នុងយុទ្ធនាការ «ថ្ងៃនេះ ខ្ញុំមិនប្រើថងប្លាស្ទិកទេ»។
ក្នុងឱកាសអញ្ជើញពិនិត្យមើលទីលានចាក់សំរាមនៅខេត្តកំពង់ឆ្នាំង នាព្រឹកថ្ងៃទី២២ ខែមករា ឆ្នាំ២០២៥នេះ ឯកឧត្តមបណ្ឌិត អ៊ាង សុផល្លែត បានលើកឡើងថា មូលហេតុដែលរុញច្រានឱ្យខេត្តកំពង់ឆ្នាំង បានប្រកាសជាខេត្តគ្មានសំរាមប្លាស្ទិក ដោយសារកន្លងមកក្រសួងបរិស្ថាន បានបើកយុទ្ធនាការ «ថ្ងៃនេះ ខ្ញុំមិនប្រើថង់ប្លាស្ទិកទេ» កាលពីថ្ងៃទី៣០ ខែកញ្ញា ឆ្នាំ២០២៣ គិតមកដល់ពេលនេះមានរយៈពេលជាង៤០០ថ្ងៃ ឬ ១ឆ្នាំ ៣ខែ ២២ថ្ងៃមកហើយ។
ឯកឧត្តមបណ្ឌិតរដ្ឋមន្ត្រី បានមានប្រសាសន៍ថា កន្លងមកយើងបានសិក្សារយៈពេល ៣ ទៅ ៤ខែ និងស្នើឱ្យខេត្តកំពង់ឆ្នាំងធ្វើយុទ្ធនាការ «ផ្លូវជាតិ គ្មានសំរាមប្លាស្ទិក» ឱ្យខេត្តទាំងមូលគ្មានសំរាមប្លាស្ទិកនៅទីសាធារណៈ ទាំងនេះយើងមិនដែលបានប្រកាសទេ ប៉ុន្តែឯកឧត្តមបណ្ឌិតបានចាត់ទុកថា នេះជាការសាកល្បងរបស់ឯកឧត្តម ហើយការសាកល្បងនេះក៏ទទួលបានជោគជ័យ។
ជាមួយគ្នានេះឯកឧត្តមបណ្ឌិត អ៊ាង សុផល្លែត ក៏បានអំពាវនាវទៅដល់រាជធានី-ខេត្តទាំងអស់ ធ្វើយ៉ាងណាអនុវត្តតាមគោលការណ៍រួមគ្នាសម្អាតផ្ទះយើង រួមគ្នាសម្អាតខេត្តរបស់យើង រួមគ្នាសម្អាតកម្ពុជារបស់យើង មានតែយើងធ្វើទាំងអស់គ្នាទេទើបទទួលបានបានជោគជ័យ៕
