ស្នងការភ្នំពេញ ដាក់ចេញនូវគោលការណ៍ដល់អធិការដ្ឋាននគរបាលខណ្ឌទាំង១៤ ចុះផ្សព្វផ្សាយអប់រំនិងហាមមិនឲ្យលក់ផាវនិងកាំជ្រួច ក្នុងឱកាសបុណ្យចូលឆ្នាំចិន និងវៀតណាម
ភ្នំពេញ៖ ឯកឧត្តម ឧត្តមសេនីយ៍ឯក ជួន ណារិន្ទ អគ្គស្នងការរងនិងជាស្នងការនគរបាលរាជធានីភ្នំពេញ នាព្រឹកថ្ងៃទី២០ខែមករាឆ្នាំ២០២៥ បានអញ្ជើញដឹកនាំកិច្ចប្រជុំផ្សព្វផ្សាយផែនការការពារសន្តិសុខ រក្សាសណ្តាប់ធ្នាប់ សុវត្ថិភាព ថ្ងៃបុណ្យចូលឆ្នាំថ្មីប្រពៃណីជនជាតិចិននិងវៀតណាម។
កិច្ចប្រជុំមានការចូលរួមពីលោក-លោកស្រីស្នងការរង លោកអនុប្រធានផែន លោក-លោកស្រីនាយការិយាល័យជំនាញ និងលោកអធិការនៃអធិការដ្ឋាននគរបាលខណ្ឌទាំង១៤។
កិច្ចប្រជុំឧត្តមសេនីយ៍ឯក ជួន ណារិន្ទ បានដាក់ចេញនូវគោលការណ៍ឲ្យជំនាញនិងអធិការដ្ឋាននគរបាលខណ្ឌទាំង១៤សហការចុះផ្សព្វផ្សាយអប់រំដល់កន្លែងលក់ផាវនិងកាំជ្រួច ដោយមិនអនុញ្ញាតឲ្យលក់ផាវនិងកាំជ្រួចនោះទេ បើក្នុងករណីរកឃើញមានការដឹកជញ្ជូនផាវកាំជ្រួចត្រូវចាប់ឃាត់ទុក។
ជាមួយគ្នានេះ ឧត្តមសេនីយ៍ឯក ជួន ណារិន្ទ បានណែនាំមិនអនុញ្ញាតឲ្យមានការដុតផាវ ដុតកាំជ្រួច ដែលមានហានីភ័យបង្កគ្រោះថ្នាក់ជាយថាហេតុណាមួយ។ណែនាំឲ្យត្រៀមរថយន្តពន្លត់អគ្គិភ័យដើម្បីចេញសង្រ្គោះអគ្គីភ័យ។ណែនាំពង្រឹងការត្រួតពិនិត្យអាវុធជាតិផ្ទុះ ចេញល្បាតត្រួតពិនិត្យបង្ការទប់ស្កាត់បទល្មើសគ្រប់ប្រភេទ និងបង្ការទប់ស្កាត់បញ្ហាគ្រោះថ្នាក់ចរាចរណ៍ផងដែរ៕
