លោក ដូណាល់ ត្រាំ និងប្រធានាធិបតីចិន ពិភាក្សាគ្នាពីបញ្ហានានា រួមទាំង ទិកតុក ពាណិជ្ជកម្ម និងតៃវ៉ាន់
វ៉ាស៊ីនតោន៖ ប្រធានាធិបតីជាប់ឆ្នោតអាម៉េរិក លោក ដូណាល់ ត្រាំ និងប្រធានាធិបតីចិន លោក ស៊ី ជីនពីង បានពិភាក្សាគ្នាអំពីបញ្ហានានា រួមទាំង ទិកតុក ពាណិជ្ជកម្ម និងតៃវ៉ាន់ នៅក្នុងការហៅទូរសព្ទមួយកាលពីថ្ងៃសុក្រទី១៧ ខែមករា ត្រឹម៣ ថ្ងៃមុនពេលលោក ត្រាំ ចូលកាន់តំណែងម្ដងទៀត។
មេដឹកនាំទាំង២ សោមនស្សចំពោះកិច្ចពិភាក្សានេះ ដោយលោក ត្រាំ បានហៅវាថាជាកិច្ចពិភាក្សាដ៏ល្អ ស្របពេលដែលលោក ស៊ី បាននិយាយថា គាត់ និងលោក ត្រាំ សង្ឃឹមសម្រាប់ការចាប់ផ្តើមជាវិជ្ជមានចំពោះទំនាក់ទំនងរវាងសហរដ្ឋអាម៉េរិក និងចិន។ នេះបើយោងតាមការផ្សាយរបស់ទូរទស្សន៍រដ្ឋចិន CCTV ។ វាជាការហៅទូរសព្ទលើកដំបូងរវាងមេដឹកនាំទាំងពីរចាប់តាំងពីលោក ត្រាំ ជាប់ឆ្នោតក្នុងខែវិច្ឆិកាឆ្នាំ២០២៤ ។
លោក ត្រាំ បានរៀបរាប់នៅក្នុងការបង្ហោះនៅលើវេទិកាប្រព័ន្ធផ្សព្វផ្សាយសង្គមរបស់គាត់ថា «ការហៅទូរសព្ទនេះគឺជារឿងល្អសម្រាប់ទាំងប្រទេសចិន និងសហរដ្ឋអាម៉េរិក។ វាជាការរំពឹងទុករបស់ខ្ញុំដែលថាយើងនឹងដោះស្រាយបញ្ហាជាច្រើនរួមគ្នា ហើយចាប់ផ្តើមភ្លាមៗ។ យើងបានពិភាក្សាអំពីតុល្យភាពពាណិជ្ជកម្ម សារធាតុហ្វេតានីល ទិកតុក និងប្រធានបទជាច្រើនទៀត»។ លោករាយរាប់បន្ត៖«ប្រធានាធិបតី ស៊ី និងខ្ញុំនឹងធ្វើអ្វីគ្រប់យ៉ាងដែលអាចធ្វើទៅបានដើម្បីធ្វើឱ្យពិភពលោកកាន់តែមានសន្តិភាព និងសុវត្ថិភាព!»
យោងតាមទូរទស្សន៍ CCTV លោក ស៊ី បានលើកឡើងពីការព្រួយបារម្ភរបស់ចិនអំពីតៃវ៉ាន់ ហើយបាននិយាយថា លោកសង្ឃឹមថាសហរដ្ឋអាម៉េរិកនឹងដោះស្រាយវាដោយយកចិត្តទុកដាក់បំផុត។ លោកសង្កត់ធ្ងន់ថា «បញ្ហាតៃវ៉ាន់ទាក់ទងនឹងអធិបតេយ្យភាពជាតិ និងបូរណភាពទឹកដីរបស់ចិន ហើយលោកសង្ឃឹមថាភាគីអាម៉េរិកនឹងដោះស្រាយវាដោយប្រុងប្រយ័ត្ន»។ប្រមុខរដ្ឋចិនបានលើកឡើងថា សហរដ្ឋអាម៉េរិក និងចិនអាចមានភាពខុសគ្នា ប៉ុន្តែត្រូវគោរពផលប្រយោជន៍ស្នូលរបស់គ្នាទៅវិញទៅមក ហើយទំនាក់ទំនងពាណិជ្ជកម្មអាចផ្តល់ផលប្រយោជន៍ទៅវិញទៅមកដោយគ្មានការប្រឈមមុខដាក់គ្នា និងជម្លោះ។ ការបញ្ចេញមតិបែបនេះស្រដៀងគ្នាទៅនឹងអ្វីដែលលោកបានធ្វើក្នុងអំឡុងពេលអាណត្តិដំបូងរបស់លោក ត្រាំ។
សូមជម្រាបជូនថា លោក ត្រាំ បានផ្តល់ការគាំទ្រយ៉ាងខ្លាំងដល់តៃវ៉ាន់ រួមទាំងការលក់អាវុធជាទៀងទាត់នៅក្នុងអាណត្តិដំបូងរបស់គាត់។ ប៉ុន្តែក្នុងអំឡុងយុទ្ធនាការបោះឆ្នោតកាលពីឆ្នាំមុន លោក ត្រាំ បាននិយាយថា តៃវ៉ាន់គួរតែបង់ប្រាក់ឱ្យសហរដ្ឋអាម៉េរិកដើម្បីទទួលបានការការពារ។ ប្រធានាធិបតីជាប់ឆ្នោតមកពីគណបក្សសាធារណរដ្ឋ សន្យាថានឹងដាក់ពន្ធ១០ ភាគរយលើការនាំចូលទាំងអស់របស់សហរដ្ឋអាម៉េរិក និង៦០ ភាគរយលើទំនិញពីប្រទេសចិន។ គួររំឭកថា លោក ត្រាំ បានឱ្យដឹងកាលពីថ្ងៃទី៦ ខែមករាថា លោក និងលោក ស៊ី បានទំនាក់ទំនងគ្នាតាមរយៈអ្នកតំណាង ដោយបង្ហាញពីសុទិដ្ឋិនិយមអំពីទំនាក់ទំនងរបស់ពួកគេ៕
