មន្ត្រីជាន់ខ្ពស់ក្រសួងធនធានទឹក ចុះពិនិត្យស្ថានភាពទឹក និងការងារបង្កបង្កើនផលស្រូវប្រាំង ក្នុងភូមិសាស្រ្តខេត្តស្វាយរៀង

ភ្នំពេញ៖ នៅថ្ងៃសុក្រ ៤រោច ខែបុស្ស ឆ្នាំរោង ឆស័ក ពុទ្ធសករាជ ២៥៦៨ ត្រូវនឹងថ្ងៃទី១៧ ខែមករា ឆ្នាំ២០២៥ ឯកឧត្តម តន់ វ៉ាន់ថារ៉ា រដ្ឋលេខាធិការ និងជាប្រធានក្រុមសម្របសម្រួលការងារធនធានទឹក និងឧតុនិយមខេត្តព្រៃវែង និងខេត្តស្វាយរៀង ក្នុងនាមតំណាងឯកឧត្តម ថោ ជេដ្ឋា រដ្ឋមន្ត្រីក្រសួងធនធានទឹក និងឧតុនិយម អមដំណើរដោយលោក ហែម ស៊ីណា អភិបាលនៃគណៈអភិបាលស្រុករំដួល បានសហការជាមួយលោក គឹម សាវុធ ប្រធានមន្ទីរធនធានទឹក និងឧតុនិយមខេត្តស្វាយរៀង និងសហការី បានចុះពិនិត្យជាក់ស្តែងស្ថានភាពទឹកនៅតាមបណ្តាអាងទឹក និងប្រព័ន្ធប្រឡាយមួយចំនួន និងការងារបង្កបង្កើនផលស្រូវរដូវប្រាំង ក្នុងភូមិសាស្រ្តខេត្តស្វាយរៀង។

ក្នុងឱកាសនោះ ឯកឧត្តមរដ្ឋលេខាធិការ បានដឹកនាំក្រុមការងារបច្ចេកទេសក្រសួង និងមន្ទីរ រួមជាមួយអាជ្ញាធរស្រុក ជួបសំណេះសំណាលជាមួយគណៈកម្មាធិការសហគមន៍កសិករប្រើប្រាស់ទឹក និងបានចុះពិនិត្យជាក់ស្តែងអាងទឹកហែកសំណាញ់ និងស្ថានភាពការងារបង្កបង្កើនផលស្រូវរដូវប្រាំងក្នុងឃុំធ្មារ និងឃុំម៉ឺនជ័យ ស្រុករំដួល ដែលធ្វើលើសផែនការ ហើយប្រឈមមុខនឹងការខ្វះទឹកស្រោចស្រព។

ឯកឧត្តមរដ្ឋលេខាធិការ បានបញ្ជាក់ឱ្យដឹងថា នៅតំបន់នេះ ផែនការស្រូវប្រាំងមានត្រឹមតែ ២០០ហិកតាប៉ុណ្ណោះ ប៉ុន្តែជាក់ស្ដែងប្រជាកសិករធ្វើស្រូវប្រាំងរហូតដល់ ៥៧៦ហិកតា។ ឯកឧត្តមបញ្ជាក់បន្ថែមថា ជាដំណោះស្រាយ ក្រុមការងារនឹងត្រៀមអន្តរាគមន៍ទាញយកទឹកពីអាងទឹកវ៉ៃគោដោយនាំទឹកចូលប្រឡាយមេកីចក ដើម្បីជួយសង្គ្រោះស្រូវប្រាំងក្នុងតំបន់ប្រឈមខ្វះទឹកនេះ និងរៀបចំទីតាំងដាក់ម៉ាស៊ីនបូមទឹកចំនួន ២គ្រឿង ដើម្បីត្រៀមសង្រ្គោះស្រូវប្រាំងបន្ថែមទៀត ស្ថិតនៅក្នុងឃុំម៉ឺនជ័យ និងឃុំឆ្មារ ស្រុករំដួល។

ឆ្លៀតក្នុងឱកាសនោះ ឯកឧត្តមរដ្ឋលេខាធិការ បានផ្តាំផ្ញើអាជ្ញាធរមូលដ្ឋាន និងតំណាងសហគមន៍កសិករប្រើប្រាស់ទឹក សូមធ្វើការដាំដុះស្រូវប្រាំងទៅតាមបរិមាណទឹកដែលមានជាក់ស្តែង ជៀសវាងមិនមានទឹកគ្រប់គ្រាន់សម្រាប់បង្កបង្កើនផលធ្វើឱ្យមានការខាតបង់។ ទន្ទឹមនឹងនេះ គួរអនុវត្តតាមសេចក្តីជូនដំណឹងរបស់មន្ទីរធនធានទឹក និងឧតុនិយមលើផែនការលទ្ធភាពក្នុងការស្រោចស្រពស្រូវប្រាំង។

ឯកឧត្តមរដ្ឋលេខាធិការ បានបញ្ជាក់ឱ្យដឹងថា ការងារបង្កបង្កើនផលស្រូវប្រាំងនៅក្នុងខេត្តស្វាយរៀង រហូតមកដល់បច្ចុប្បន្ននេះ អនុវត្តបានប្រមាណជា ២៥.៦៨៣ហិកតា ស្មើនឹង ១២៥,២៨% នៃផែនការ ២០.៥០០ហិកតា ៕