ឯកឧត្តម ចាន់ សុធា អញ្ជើញបើកសិក្ខាសាលាពិគ្រោះយោបល់ពិនិត្យឡើងវិញនូវយុទ្ធសាស្ត្រប្រចាំប្រទេសពាក់កណ្តាលអាណត្តិ របស់អង្គការទស្សនៈពិភពលោកអន្តរជាតិ ប្រចាំនៅកម្ពុជា

ភ្នំពេញ៖ នៅព្រឹកថ្ងៃព្រហស្បតិ៍ ៣រោច ខែបុស្ស ឆ្នាំរោង ឆស័ក ពុទ្ធសករាជ ២៥៦៨ ត្រូវនឹងថ្ងៃទី១៦ ខែមករា ឆ្នាំ២០២៥ ឯកឧត្តម ចាន់ សុធា រដ្ឋលេខាធិការក្រសួងមហាផ្ទៃ និងជាប្រធានលេខាធិការដ្ឋាន គ.ជ.អ.ប. បានអញ្ជើញជាអធិបតីក្នុងពិធីបើកសិក្ខាសាលាពិគ្រោះយោបល់ពិនិត្យឡើងវិញនូវយុទ្ធសាស្ត្រប្រចាំប្រទេសពាក់កណ្តាលអាណត្តិ របស់អង្គការទស្សនៈពិភពលោកអន្តរជាតិ ប្រចាំនៅកម្ពុជា ដែលមានការអញ្ជើញចូលរួមពីតំណាងរដ្ឋបាលថ្នាក់ជាតិ តំណាងរដ្ឋបាលថ្នាក់ក្រោមជាតិ តំណាងស្ថានទូតអូស្រ្តាលីប្រចាំកម្ពុជា ដៃគូអភិវឌ្ឍន៍ អង្គការសង្គមស៊ីវិល និងអ្នកសម្របសម្រួលគណនេយ្យភាពសហគមន៍មានចំនួនសរុប៦៩រូប ស្រី២៧រូប។

សិក្ខាសាលានេះ មានគោលបំណងដើម្បីចែករំលែកអំពីលទ្ធផលរីកចម្រើន បញ្ហាប្រឈម និងពិគ្រោះយោបល់ អំពីការអនុវត្តផែនការយុទ្ធសាស្រ្តរបស់អង្គការទស្សនៈពិភពលោកអន្តរជាតិប្រចាំកម្ពុជា រយៈពេល២ឆ្នាំកន្លងនេះ ដើម្បីទទួលបាននូវធាតុចូលសំខាន់ៗក្នុងការធានាដល់ការអនុវត្តយុទ្ធសាស្រ្តនេះឱ្យកាន់តែមានប្រសិទ្ធភាព ជាពិសេសបង្កើននូវការចូលរួមគាំទ្រពីក្រសួង ស្ថាប័ន ដៃគូអភិវឌ្ឍន៍ អង្គការសង្គមស៊ីវិល និងភាគីពាក់ព័ន្ធ។

នៅក្នុងឱកាសនេះផងដែរ ឯកឧត្តម ចាន់ សុធា បានលើកឡើងនូវអនុសាសន៍ដ៏មានសារៈសំខាន់ៗជូនអង្គសិក្ខាសាលា ដូចខាងក្រោម៖

-ស្នើដល់ដៃគូអភិវឌ្ឍន៍ និងអង្គការសង្គមស៊ីវិលគិតគូរពិចារណាក្នុងការរៀបចំផែនការយុទ្ធសាស្រ្ត និងផែនការសកម្មភាពរបស់ខ្លួន ដោយផ្សារភ្ជាប់ និងបន្ស៊ីទៅនឹងការអនុវត្តកម្មវិធីកំណែទម្រង់វិមជ្ឈការ និងវិសហមជ្ឈការ

-បន្តគាំទ្រ និងពង្រឹងការអនុវត្តការងារគណនេយ្យភាពសង្គមនៅកម្រិតរដ្ឋបាលឃុំ សង្កាត់ឱ្យបានទូទាំងប្រទេស និងការគិតគូរពីនិរន្តរភាពចំពោះតំបន់គោលដៅឃុំ សង្កាត់ដែលបានទទួលបានការគាំទ្រក្នុងរយៈពេលសមរម្យមួយ ព្រមទាំងគាំទ្រដល់ការពង្រីកការអនុវត្តការងារគណនេយ្យភាពសង្គមនៅកម្រិតរដ្ឋបាល ក្រុង ស្រុក ខណ្ឌ និងវិស័យផ្សេងៗទៀតឱ្យស្របទៅនឹង កម្មវិធីជាតិដំណាក់កាលទី២

-ផ្តល់ការគាំទ្រលើការងារបច្ចេកវិទ្យាព័ត៌មានពាក់ព័ន្ធនឹងការផ្តល់ព័ត៌មាន ការផ្តល់សេវាសាធារណៈ និងការគ្រប់គ្រង របស់រដ្ឋបាលថ្នាក់ក្រោមជាតិឱ្យកាន់តែមានភាពទំនើបកម្ម ដើម្បីធានាដល់ការពង្រឹងអភិបាលកិច្ច និងការអភិវឌ្ឍនៅមូលដ្ឋានប្រកបដោយប្រសិទ្ធភាព និងប្រសិទ្ធផល ៕