អង្គការណាតូ៖ បច្ចុប្បន្នអ៊ុយក្រែន មិនមានជំហររឹងមាំគ្រប់គ្រាន់ សម្រាប់កិច្ចចរចាសន្តិភាពជាមួយរុស្ស៊ីនោះទេ

ប្រ៊ុចសែល៖ បច្ចុប្បន្នអ៊ុយក្រែនមិនមានជំហររឹងមាំគ្រប់គ្រាន់ សម្រាប់កិច្ចចរចាសន្តិភាពជាមួយរុស្ស៊ីនោះទេ។ នេះជាអ្វីដែលប្រធានអង្គការណាតូ លោក ម៉ាក រូដ បានលើកឡើង កាលពីថ្ងៃចន្ទទី១៣មករា ខណៈប្រធានាធិបតីជាប់ឆ្នោតរបស់សហរដ្ឋអាម៉េរិកលោក ដូណាល់ ត្រាំ ត្រៀមឡើងកាន់អំណាចសាជាថ្មី។

លោក រូដ បានប្រាប់សមាជិកសភាសហភាពអឺរ៉ុប (EU) ថា៖«នៅពេលនេះ ច្បាស់ណាស់ អ៊ុយក្រែនមិននៅទីនោះទេ ពីព្រោះនៅពេលនេះ ពួកគេមិនមានជំហររឹងមាំអាចចរចាបានទេ។ យើង​ត្រូវ​ធ្វើ​បន្ថែម​ទៀត​ ដើម្បី​ធ្វើ​ឱ្យ​ប្រាកដ​ថា ​ពួកគេរឹងមាំគ្រប់គ្រាន់សម្រាប់ការចរចា»។ លោក រូដ បានលើកឡើង​ថា​៖«​យើង​ទាំងអស់​គ្នា​ចង់​ឱ្យ​សង្គ្រាម​នេះ​បញ្ចប់ ប៉ុន្តែ​សំខាន់​ជាង​នេះ​ទៀត​ គឺ​យើង​ចង់​ឱ្យ​សន្តិភាព​ស្ថិតស្ថេរ​។ សន្តិភាព​នឹង​មិន​ស្ថិតស្ថេរ​ឡើយ ប្រសិន​បើ​ប្រធានាធិបតីរុស្ស៊ី លោក វ្ល៉ាឌីមៀ ពូទីន មានផ្លូវមានវាយចូលទៅ​ក្នុង​ប្រទេស​អ៊ុយក្រែន ព្រោះ​ពេល​នោះ​លោក​នឹង​បន្ត​ដំណើរ​ទៅ​មុខ»។

បន្ថែមពីនោះ ប្រធានអង្គការណាតូបានព្រមានថា កិច្ចព្រមព្រៀងមិនល្អសម្រាប់អ៊ុយក្រែន នឹងផ្តល់ប្រយោជន៍ឱ្យរុស្ស៊ី និងសម្ព័ន្ធមិត្តដូចជាចិន កូរ៉េខាងជើង និងអ៊ីរ៉ង់។ លោកបន្តថា៖«ខ្ញុំជឿជាក់ថា សន្តិភាពអាចស្ថិតស្ថេរបាន លុះត្រាតែអ៊ុយក្រែនចូលក្នុងតុចរចាជាមួយនឹងជំហររឹងមាំ។ សម្រាប់រឿងនេះ ពួកគេត្រូវការការបន្តផ្តល់ជំនួយរបស់យើង អាវុធកាន់តែច្រើន និងលឿនជាងមុន ដូច្នេះ ពួកគេអាចការពារខ្លួនបានប្រសើរជាងមុន និងចរចាកិច្ចព្រមព្រៀងដ៏ល្អសម្រាប់អ៊ុយក្រែន សម្រាប់អឺរ៉ុប និងពិភពលោក»។

មិនត្រឹមតែប៉ុណ្ណោះ ប្រមុខណាតូរូបនេះ បានរំលឹកឡើងវិញនូវការទទូចរបស់គាត់ថា អឺរ៉ុបត្រូវការបង្កើនការចំណាយលើវិស័យការពារជាតិរបស់ខ្លួនយ៉ាងច្រើន ជាពិសេសព្រោះវាជាតម្រូវការសំខាន់ពីលោក ត្រាំ។ មេដឹកនាំអង្គការរូបនេះ លើកឡើងថា ការចំណាយលើវិស័យការពារជាតិកម្រិត២ភាគរយនៃផលិតផលក្នុងស្រុកសរុបរបស់សម្ព័ន្ធ គឺមិនគ្រប់គ្រាន់ទេ ដើម្បីប្រឈមមុខនឹងការគំរាមកំហែងពីយក្សកំណាចនុយក្លេអ៊ែរុស្ស៊ី។ លោក​បាន​ថ្លែង​ថា​៖«​ប្រសិន​បើ​យើង​មិន​ធ្វើ​ទេ យើង​មាន​សុវត្ថិភាព​នាពេលបច្ចុប្បន្នមែន ប៉ុន្តែ​មិន​មែន​ក្នុង​រយៈ​ពេល៤ឬ៥ឆ្នាំទៀតនោះ​ទេ។ ដូច្នេះប្រសិនបើអ្នកមិនធ្វើវាទេ ចូរអ្នកចាប់ផ្តើមរៀនវគ្គសិក្សាភាសារុស្សី ឬទៅប្រទេសនូវែលសេឡង់»។

គួរបញ្ជាក់ថា លោក ត្រាំ នឹងស្បថចូលកាន់តំណែងនៅថ្ងៃចន្ទទី២០ ខែមករា សប្តាហ៍ក្រោយ បន្ទាប់ពីបានប្តេជ្ញាក្នុងអំឡុងយុទ្ធនាការឃោសនាបោះឆ្នោតថា នឹងបញ្ចប់សង្រ្គាមរបស់ប្រធានាធិបតីរុស្ស៊ីលោក វ្ល៉ាឌីមៀ ពូទីន នៅអ៊ុយក្រែនយ៉ាងឆាប់រហ័សបំផុត។ លោក ត្រាំ បានអះអាងកាលពីសប្តាហ៍មុនថា លោកកំពុងរៀបចំកិច្ចប្រជុំជាមួយប្រធានាធិបតីរុស្ស៊ី ពូទីន។ រដ្ឋបាលលោកប្រធានាធិបតី ចូ បៃឌិន បានព្យាយាមបង្កើនកម្លាំងរបស់អ៊ុយក្រែនដោយការបង្កើនជំនួយយោធា និងកាលពីចុងឆ្នាំមុនបានបើកភ្លើងខៀវឱ្យអ៊ុយក្រែនបាញ់មីស៊ីលរយៈចម្ងាយឆ្ងាយចូលទៅក្នុងទឹកដីរុស្ស៊ី។ យ៉ាងណា រំហូរជំនួយពីរដ្ឋធានីវ៉ាស៊ីនតោនទៅអ៊ុយក្រែនអាចប្រឈមភាពរអាក់រអួលក្រោមរដ្ឋបាលរបស់លោក ត្រាំ៕