ក្រសួងទេសចរណ៍ ហាមឃាត់ការផ្ដល់ទីតាំងមូលដ្ឋានអាជីវកម្មសេវាកម្មទេសចរណ៍ ឱ្យក្រុមហ៊ុនថ្នាំជក់ធ្វើសកម្មភាពផ្សាយពាណិជ្ជកម្មគ្រប់ទម្រង់

ភ្នំពេញ៖ ក្រសួងទេសចរណ៍ថ្មីៗនេះ បានដាក់ចេញសេចក្តីណែនាំមួយ ហាមឃាត់ម្ចាស់ ឬអ្នកគ្រប់គ្រងមូលដ្ឋានអាជីវកម្មសេវាកម្មទេសចរណ៍ទាំងអស់ រួមមានភោជនីយដ្ឋាន ហាងកាហេ្វ ក្លឹបរាត្រី មណ្ឌលកំសាន្តនានា មិនអោយផ្សាយពាណិជ្ជកម្ម ឬដាក់តាំងបង្ហាញសម្ភារៈមានឈ្មោះម៉ាកផលិតផលថ្នាំជក់មានជាអាទិ៍៖ ផ្ទាំងរូបភាព ខិត្តប័ណ្ណផ្សព្វផ្សាយ ឆ័ត្រ នាឡិកា ប្រអប់ដាក់ក្រដាស់អនាម័យ ប្រដាប់គោះបារី ទាំងនៅក្នុងបរិវេណ និងក្រៅបរិវេណទីតាំងអាជីវកម្មសេវាកម្មទេសចរណ៍របស់ខ្លួនឡើយ។
សេចក្តីណែនាំរបស់ក្រសួងទេសចរណ៍នេះ ត្រូវបានអ្នកពាក់ព័ន្ធយកមកផ្សព្វផ្សាយបន្តនៅព្រឹកថ្ងៃទី 13 ខែមករា ឆ្នាំ2025 នៅមជ្ឈមណ្ឌលជាតិហ្វឹកហ្វឹនកីឡា រាជធានីភ្នំពេញ ក្រោមអធិបតីភាពឯកឧត្តម ហោ សារុន រដ្ឋលេខាធិការក្រសួងទេសចរណ៍ តំណាងដ៏ខ្ពង់ខ្ពស់ឯកឧត្តម ហួត ហាក់ រដ្ឋមន្ត្រីក្រសួងទេសចរណ៍ និងមានការចូលរួមពីប្រធានអង្គភាពពាក់ព័ន្ធក្រោមឳវាទក្រសួង និងអាជ្ញាធររាជធានីខេត្តទាំង២៥។
ឯកឧត្តម ហោ សារុន រដ្ឋលេខាធិការក្រសួងទេសចរណ៍ បានមានប្រសាសន៍ថា ក្រសួងទេសចរណ៍តែងតែគាំទ្ររាល់សកម្មភាព និងការគិតគូរយកចិត្តទុក ដាក់លើកកម្ពស់គុណតម្លៃទេសចរណ៍ តាមរយៈការពង្រឹងភាពទាក់ទាញគោលដៅ ទេសចរណ៍ និងបង្កើនភាពពេញចិត្តរបស់ភ្ញៀវទេសចរ។ ការយកចិត្តទុកដាក់ពង្រឹង ការអនុវត្តបរិស្ថានគ្មានផ្សែងផលិតផលថ្នាំជក់នៅក្នុងវិស័យទេសចរណ៍ គឺជាការគិតគូរ ដ៏ល្អមួយ ក្នុងការជួយបង្កើនគុណតម្លៃវិស័យទេសចរណ៍ផង និងគិតគូរដល់ សុខុមាលភាពសង្គមក៏ដូចជាសហគមន៍ទាំងមូលផងដែរ។
ឯកឧត្តមបញ្ជាក់ថា ការអភិវឌ្ឍន៍វិស័យទេសចរណ៍គឺជាការងារធំមួយដែលត្រូវ ការគិតគូរលើបញ្ហាចម្បងៗជាច្រើនប្រកបដោយយុទ្ធសាស្ត្រ។ ចំណែកការពង្រឹង ការអនុវត្តបរិស្ថានគ្មានផ្សែងផលិតផលថ្នាំជក់នៅក្នុងវិស័យទេសចរណ៍គ្រាន់តែជាការ ចូលរួមចំណែកដ៏តូចមួយបុណ្ណោះ ប៉ុន្តែក៏មានសារសំខាន់សម្រាប់វិស័យទេសចរណ៍ ផងដែរ ក្នុងការចូលរួមការពារកិត្តិនាមគោលដៅទេសចរណ៍ជាគោលដៅមានសុវត្ថិភាព ផ្តល់ភាពកក់ក្តៅ មិនទទួលរងផលប៉ះពាល់ពីការប្រើប្រាស់ផលិតផលថ្នាំជក់។
ឯកឧត្តមបន្ថែមថា ក្រសួងបានហាមឃាត់ម្ចាស់ឬអ្នកគ្រប់គ្រងមូលដ្ឋានអាជីវកម្មសេវាកម្មទេសចរណ៍ទាំងអស់ការ មិនអោយផ្ដល់ទីតាំងមូលដ្ឋានរបស់ខ្លួន សម្រាប់រៀបចំកម្មវិធី ឬរៀបចំព្រឹត្តិការណ៍ ឬសកម្មភាពផ្សេងៗទៀតដែលជាប់ពាក់ព័ន្ធជាមួយនឹងសកម្មភាពផ្សាយពាណិជ្ជកម្មផលិតផលថ្នាំជក់ ទោះបីជាកម្មវិធី ឬសកម្មភាពនោះរៀបចំដោយឧស្សាហករថ្នាំជក់ដោយផ្ទាល់ ឬដោយប្រយោល ឬដោយនិតីបុគ្គល ឬរូបវ័ន្តបុគ្គលក៏ដោយ។
ការដាក់ចេញសេចក្តីណែនាំនេះ គឺឆ្លើយតបទៅនឹងម្ចាស់ឬអ្នកគ្រប់គ្រងមូលដ្ឋានអាជីវកម្មសេវាកម្មទេសចរណ៍មួយចំនួន ដែលកន្លងមក បានជួលឬផ្តល់ទីតាំងរបស់ខ្លួន អោយក្រុមហ៊ុនថ្នាំជក់ ឬអ្នកតំណាងរបស់ក្រុមហ៊ុនថ្នាំជក់ ធ្វើការផ្សាយពាណិជ្ជកម្មផលិតផលរបស់ខ្លួន ដែលផ្ទុយទៅនឹងច្បាប់ស្តីពីការត្រួតពិនិត្យផលិតផលថ្នាំជក់។
សេចក្តីណែនាំនេះ ក៏បានតម្រូវអោយម្ចាស់មូលដ្ឋានអាជីវកម្មសេវាកម្មទេសចរណ៍ទាំងឡាយណា ដែលអនុវត្តផ្ទុយពីខ្លឹមសារខាងលើ ត្រូវបញ្ឈប់កិច្ចសហការជាមួយក្រុមហ៊ុនថ្នាំជក់ជាបន្ទាន់ និងកែតម្រូវឱ្យស្របតាមសេចក្ដីណែនាំនេះ។ ក្នុងករណីដែលម្ចាស់មូលដ្ឋានអាជីវកម្មសេវាកម្មទេសចរណ៍ទាំងឡាយណាមិនចូលរួមអនុវត្តតាមសេចក្ដីណែនាំនេះ ត្រូវទទួលទណ្ឌកម្មខាងវិន័យរដ្ឋបាល និងទោសអនុវលោមតាមច្បាប់និងលិខិតបទដ្ឋានគតិយុត្តជាធរមាន៕