រដ្ឋមន្ត្រីក្រសួងអប់រំ៖ ស្មារតីជួយគ្នាទៅវិញទៅមក គឺជាការនាំមកនូវសុខសន្តិភាព និងការអភិវឌ្ឍប្រកបដោយចីរភាព

ភ្នំពេញ៖ ឯកឧត្តមបណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្ត្រី រដ្ឋមន្ត្រីក្រសួងអប់រំ យុវជន និងកីឡា នាថ្ងៃទី១១ ខែមករា ឆ្នាំ២០២៥ បានអញ្ជើញជាអធិបតីក្នុងពិធី សប្បុរសធម៌លើកទី១៤ គម្រប់ខួបលើកទី៦៥ និងការជួបជុំអតីតនិស្សិត នៃសាកលវិទ្យាល័យភូមិន្ទភ្នំពេញ ដោយមានការចូលរួមពីសំណាក់ ឯកឧត្តម ហែម វណ្ណឌី រដ្ឋមន្ត្រីក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ និងជាសមាជិកគណៈអចិន្ត្រៃយ៍គណៈកម្មាធិការកណ្តាលសហភាពសហព័ន្ធយុវជនកម្ពុជា តំណាងដ៏ខ្ពង់ខ្ពស់របស់ឯកឧត្តម ហ៊ុន ម៉ានី ប្រធានសហភាពសហព័ន្ធយុវជនកម្ពុជា, លោកជំទាវ ម៉ែន នារីសោភ័គ អគ្គលេខាធិការស្តីទី កាកបាទក្រហមកម្ពុជា, ឯកឧត្តមសាស្ត្រាចារ្យ ជេត ជាលី សាកលវិទ្យាធិការ និងជាប្រធានកិត្តិយសក្លឹបយុវជនកាកបាទក្រហមកម្ពុជា ប្រចាំសាកលវិទ្យាល័យភូមិន្ទភ្នំពេញ, ឯកឧត្តម លោកជំទាវ ឯកឧត្តម លោកជំទាវ លោក លោកស្រី បុគ្គលិកអប់រំ សាស្ត្រាចារ្យ និស្សិត យុវជន កាកបាទក្រហមកម្ពុជា យុវជនសសយក សប្បុរសជន វិស័យឯកជន អតីតនិស្សិត និងនិស្សិតសរុបប្រមាណ ២៥០នាក់។

ថ្លែងក្នុងសុន្ទរកថាស្វាគមន៍ ឯកឧត្តមសាស្ត្រាចារ្យ សាកលវិទ្យាធិការនៃសាកលវិទ្យាល័យភូមិន្ទភ្នំពេញ បានឱ្យដឹងថា សាកលវិទ្យាល័យភូមិន្ទភ្នំពេញបានទទួលការអនុញ្ញាតដ៏ខ្ពង់ខ្ពស់បំផុតពីសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជាឱ្យរៀបចំពិធីសប្បុរសធម៌លើកទី១៤ នេះឡើងក្នុងគោលបំណងកៀរគរថវិកាពីសប្បុរសជននានា ដើម្បីជួយដល់សាស្ត្រាចារ្យ បុគ្គលិក និស្សិតនៃសាកលវិទ្យាល័យ ភូមិន្ទភ្នំពេញ ដែលមានជីវភាពខ្វះខាត មណ្ឌលកុមារកំព្រា កុមារងាយរងគ្រោះ ជាពិសេសជួយដល់អ្នកជំងឺដែលពុំមានលទ្ធភាពសម្រាកព្យាបាលនៅមន្ទីពេទ្យមួយចំនួន។

ក្នុងឱកាសនេះដែរ ឯកឧត្តមបណ្ឌិតសភាចារ្យ ឧបនាយករដ្ឋមន្ត្រី បានកោតសរសើរ និងវាយតម្លៃខ្ពស់ចំពោះសាកលវិទ្យាល័យភូមិន្ទភ្នំពេញ ជាពិសេសក្លឹបយុវជនកាកបាទក្រហមកម្ពុជាប្រចាំសាកលវិទ្យាល័យភូមិន្ទភ្នំពេញ ដែលបានខិតខំយកអស់កម្លាំងកាយចិត្តរៀបចំពិធីសប្បុរសធម៌នេះឡើងជារៀងរាល់ឆ្នាំក្នុងបរិយាកាសរីករាយ និងគុណតម្លៃជួយដល់សង្គមជាតិ ដោយគូសបញ្ជាក់ថា ស្មារតីជួយគ្នាទៅវិញទៅមកនេះ គឺជាការនាំមកនូវសុខសន្តិភាព និងការអភិវឌ្ឍប្រកបដោយចីរភាព និងបានផ្តល់អនុសាសន៍ដល់យុវជនទាំងអស់ សូមឱ្យបន្តខិតខំប្រឹងប្រែងរៀនសូត្រក្រេបជញ្ជក់ចំណេះដឹង រៀនសូត្រពីប្រវត្តិសាស្ត្រ ដើម្បីបន្តពង្រឹងសមត្ថភាពខ្លួនឯងឱ្យប្រែក្លាយជាធនធានប្រកបដោយសក្ដានុពល រួមចំណែកក្នុងការអភិវឌ្ឍសង្គមជាតិ ត្បិតមានតែការសិក្សារៀនសូត្រប៉ុណ្ណោះដែលអាចជួយប្អូនៗឱ្យផ្លាស់ប្តូរជោគវាសនាខ្លួនឯង និងប្រទេសជាតិ ឆ្ពោះ​ទៅសម្រេចចក្ខុវិស័យកម្ពុជា២០៥០។

សាជាថ្មីម្តងទៀត តាងនាមឱ្យក្រសួងអប់រំ យុវជន និងកីឡា ឯកឧត្តមបណ្ឌិតសភាចារ្យ ឧបនាយករដ្ឋមន្ត្រី សូមថ្លែងអំណរគុណយ៉ាងជ្រាលជ្រៅដល់គណៈគ្រប់គ្រងសាកលវិទ្យាល័យ យុវជនកាកបាទក្រហមកម្ពុជា អតីតនិស្សិត វិស័យឯកជន និងគ្រប់ភាគីពាក់ព័ន្ធទាំងអស់ ជាពិសេសសប្បុរសជនដែលបរិច្ចាគទាំងថវិកា និងពេលវេលាចូលរួមគាំទ្រជំរុញឱ្យព្រឹត្តិការណ៍ដ៏មានអត្ថន័យនេះដំណើរការទៅបានដោយរលូន និងជោគជ័យ។ សកម្មភាពចូលរួមយ៉ាងផុលផុសនេះ ជាការសបញ្ជាក់នូវស្មារតីចែករំលែកធនធានដ៏មានតម្លៃ ក្នុងការបំផុសចលនារួបរួមសាមគ្គី ការចែករំលែកសេចក្តីស្រឡាញ់ ការលើកកម្ពស់ការងារស្ម័គ្រចិត្ត របស់យុវជនក្នុងការងារសង្គម និងមនុស្សធម៌ដែលជាឧត្តមប្រយោជន៍សម្រាប់បម្រើសហគមន៍ក្រីក្រ និងជនងាយរងគ្រោះ។

គួរបញ្ជាក់ដែរថា កម្មវិធីសប្បុរសធម៌លើកទី១៤ និងខួបគម្រប់៦៥ ឆ្នាំនៃសាកលវិទ្យាល័យភូមិន្ទភ្នំពេញនេះ រៀបចំឡើងក្រោមកិច្ចសហការរវាងនិស្សិតនៃសាកលវិទ្យាល័យភូមិន្ទភ្នំពេញ និងក្លឹបយុវជនកាកបាទក្រហមកម្ពុជា ដើម្បីលើកកម្ពស់សកម្មភាពសប្បុរសធម៌ និងចែករំលែកក្ដីស្រលាញ់ តាមរយៈមានការប្រគំតន្រ្តី និងស្តង់លក់ទំនិញជាច្រើនប្រភេទ ដែលប្រព្រឹត្តទៅរយៈពេល ២ថ្ងៃ គឺចាប់ពីថ្ងៃសៅរ៍ ទី១១ ដល់ថ្ងៃអាទិត្យ ទី១២ ខែមករា ឆ្នាំ២០២៥ នៅក្នុងបរិវេណសាកលវិទ្យាល័យភូមិន្ទភ្នំពេញ ៕