មេដឹកនាំក្រុមឧក្រិដ្ឋកម្មជនជាតិជប៉ុនម្នាក់ ត្រូវបានអាជ្ញាធរអាម៉េរិកចោទប្រកាន់ ពីបទជួញដូរសារធាតុនុយក្លេអ៊ែរពីមីយ៉ាន់ម៉ា
វ៉ាស៊ីនតោន៖ ក្រសួងយុត្តិធម៌អាម៉េរិកបានអះអាងនៅក្នុងសេចក្តីថ្លែងការណ៍មួយថា មេដឹកនាំក្រុមឧក្រិដ្ឋកម្មជនជាតិជប៉ុនម្នាក់ដែលត្រូវបានចោទប្រកាន់ដោយអាជ្ញាធរសហរដ្ឋអាម៉េរិកពីបទជួញដូរសារធាតុនុយក្លេអ៊ែរពីប្រទេសមីយ៉ាន់ម៉ា បានសារភាពកំហុសកាលពីថ្ងៃពុធទី៨ ខែមករាឆ្នាំ២០២៥។
លោក តាកេស៊ិ អ៊ីប៊ីសាវ៉ា (Takeshi Ebisawa) អាយុ ៦០ឆ្នាំ ជនជាតិជប៉ុន បានសារភាពកំហុសនៅទីក្រុងញូវយ៉ក ពីបទគប់គិតជាមួយបណ្តាញសហការីក្នុងការជួញដូរសម្ភារនុយក្លេអ៊ែរ រួមទាំងសារធាតុអ៊ុយរ៉ាញ៉ូម និងភ្លុយតូនីញ៉ូមកម្រិតអាចយកមកផលិតអាវុធបាន ពីប្រទេសមីយ៉ាន់ម៉ាទៅកាន់ប្រទេសដទៃទៀត។ លើសពីនេះ លោក អ៊ីប៊ីសាវ៉ា ក៏បានសារភាពកំហុសចំពោះការជួញដូរគ្រឿងញៀនអន្តរជាតិ និងការចោទប្រកាន់លើការជួញដូរអាវុធផងដែរ។ នេះបើតាមក្រសួងយុត្តិធម៌អាម៉េរិក។
គេនៅចាំបានថា កាលពីខែកុម្ភៈឆ្នាំ២០២៤ អាជ្ញាធរអាម៉េរិកបានចោទប្រកាន់មេដឹកនាំឧក្រិដ្ឋកម្ម «យ៉ាគូហ្សា» របស់ជប៉ុនពីបទសមគំនិតក្នុងការចរាចរសម្ភារៈនុយក្លេអ៊ែរពីប្រទេសមីយ៉ាន់ម៉ា សម្រាប់ការប្រើប្រាស់ដោយអ៊ីរ៉ង់ក្នុងកម្មវិធីអាវុធនុយក្លេអ៊ែរ។ ក្រៅពីនេះ លោកក៏ត្រូវបានចោទប្រកាន់ពីមុននៅឆ្នាំ២០២២ផងដែរ ពីបទជួញដូរគ្រឿងញៀនអន្តរជាតិ និងបទល្មើសរត់ពន្ធអាវុធខុសច្បាប់។
គួរជម្រាបថា មេដឹកនាំក្រុមឧក្រិដ្ឋកម្មមួយនេះបានជួញដូរ ហេរ៉ូអ៊ីន និងមេតំហ្វេតាមីន យ៉ាងច្រើនសន្ធឹកសន្ធាប់ចូលទៅកាន់សហរដ្ឋអាម៉េរិក ជាថ្នូរនឹងអាវុធធុនធ្ងន់ ដូចជា មីស៊ីលបាញ់ពីដីទៅអាកាស ដើម្បីប្រើប្រាស់លើសមរភូមិក្នុងប្រទេសភូមា និងការលាងលុយកខ្វក់ជាដើម។ គួរបញ្ជាក់ថា ផែនការដ៏ស្មុគស្មាញរបស់លោក អ៊ីប៊ីសាវ៉ា ត្រូវបានរកឃើញ រារាំង និងបញ្ឈប់តាមរយៈកិច្ចសហប្រតិបត្តិការរវាងអាជ្ញាធរនៅសហរដ្ឋអាម៉េរិក ឥណ្ឌូណេស៊ី ជប៉ុន និងថៃ៕
