ភ្នំពេញ៖ នាព្រឹកថ្ងៃទី០៣ ខែមករា ឆ្នាំ២០២៥ នៅបន្ទប់ប្រជុំខេត្តតាកែវ នៃទីស្ដីការក្រសួងមហាផ្ទៃ លោកឧត្ដមសេនីយ៍ឯក ផន រតនា ប្រធានលេខាធិការដ្ឋានគណៈកម្មការប្រយុទ្ធប្រឆាំងផលិតផលក្លែងក្លាយដែលបង្កគ្រោះថ្នាក់មានហានិភ័យខ្ពស់ដល់សុខភាព និងសុវត្ថិភាពសង្គម (គ.ប.ផ.ក.) បានអញ្ជើញជាអធិបតីដឹកនាំកិច្ចប្រជុំលើកដំបូងរបស់លេខាធិការដ្ឋាន គ.ប.ផ.ក. ដោយមានការចូលរួមពីថ្នាក់ដឹកនាំ និងមន្ត្រីនៃលេខាធិការដ្ឋានសរុបចំនួន ៣៩រូប ដើម្បីស្វែងយល់បន្ថែមអំពីភារកិច្ចចម្បងរបស់គណៈកម្មការ ក៏ដូចជារបៀបរបបធ្វើការងាររបស់លេខាធិការដ្ឋាន និងបង្កើនភាពស្និតស្នាលរវាងមន្ត្រីទាំងអស់នៃលេខាធិការដ្ឋានគ.ប.ផ.ក.។
ជាកិច្ចចាប់ផ្ដើម លោកឧត្ដមសេនីយ៍ឯក ផន រតនា បានមានមតិសំណេះសំណាល សួរសុខទុក្ខដល់សមាជិកនៃអង្គប្រជុំទាំងមូល ព្រមទាំងបានស្វាគមន៍យ៉ាងកក់ក្ដៅចំពោះវត្តមានមន្ត្រីទាំងអស់ដែលចូលរួមក្នុងកិច្ចប្រជុំនាពេលនេះ។ ជាមួយនោះប្រធានលេខាធិការដ្ឋានបានណែនាំក្រើនរំលឹកដល់មន្រ្តីក្រោមឱវាទត្រូវយកចិត្តទុកដាក់ស្វែងយល់ពី -តួនាទីភារកិច្ចរបស់គ.ប.ផ.ក. -តួនាទីភារកិច្ចរបស់លេខាធិការដ្ឋាន គ.ប.ផ.ក. និងផ្នែកនីមួយៗ -បទវិន័យនគរបាលជាតិកម្ពុជា -សិទ្ធិអនុញ្ញាតច្បាប់គ្រប់ប្រភេទសម្រាប់មន្ត្រីនគរបាលជាតិកម្ពុជា -របៀបរបបការងារព្រមទាំងលើកកម្ពស់កិច្ចសហការឲ្យបានទូលំទូលាយ។
ជាទីបញ្ចប់ប្រធានអង្គប្រជុំក៏បានសង្កត់ធ្ងន់ដល់មន្ត្រីគ្រប់រូបត្រូវរក្សាឲ្យបាននូវសាមគ្គីភាពរឹងមាំរួមគ្នាបំពេញភារកិច្ចដែលថ្នាក់លើប្រគល់ជូនឲ្យមានប្រសិទ្ធភាព និងនិរន្តភាពក្នុងការប្រយុទ្ធប្រឆាំងផលិតផលក្លែងក្លាយសំដៅការពារសុខភាពសាធារណ: និង ចូលរួមចំណែកអភិវឌ្ឍសេដ្ឋកិច្ចជាតិដែលជាភារកិច្ចស្នូល៕
