ក្រុមការងារតាមដានជីវៈចម្រុះ នៃអង្គការជីវិតធម្មជាតិនៅកម្ពុជា ប្រទះឃើញសត្វក្រៀល ២២ក្បាល បង្ហាញខ្លួនក្នុងដែនជម្រកសត្វព្រៃលំផាត់ ខេត្តរតនគិរី

ភ្នំពេញ៖ នៅចុងឆ្នាំ២០២៤ ក្រុមការងារតាមដានជីវៈចម្រុះនៃអង្គការជីវិតធម្មជាតិនៅកម្ពុជា (NCO) បានប្រទះឃើញសត្វក្រៀលចំនួន២២ក្បាល ក្នុងនោះមានកូនទើបកើត៨ក្បាល បង្ហាញខ្លួននៅក្នុងដែនជម្រកសត្វព្រៃលំផាត់ ខេត្តរតនគិរី។ ចំនួននេះកើនឡើង៦ក្បាល ធៀបឆ្នាំ២០២៣ ដែលមានត្រឹម១៦ក្បាលប៉ុណ្ណោះ។

បើតាមការបង្ហោះនៅលើទំព័រហ្វេសប៊ុករបស់ អង្គការជីវិតធម្មជាតិនៅកម្ពុជា កាលពីថ្ងៃទី៣១ ខែធ្នូ ការរកឃើញសត្វក្រៀល នៅដែនជម្រកសត្វព្រៃលំផាត់ ក្នុងឆ្នាំ២០២៤ គឺជាកំណត់ត្រាច្រើនបំផុតមិនធ្លាប់មានពីមុនមក។ កំណើនសត្វក្រៀលនេះ ​ក៏ជាសក្ខីភាព បញ្ជាក់ពីភាពជោគជ័យនៃកិច្ចខិតខំប្រឹងប្រែងអភិរក្សជីវៈចម្រុះរបស់ NCO និងជាលទ្ធផលដ៏ល្អក្នុងការបិទបញ្ចប់ឆ្នាំ២០២៤ ដើម្បីឈានទៅបន្តការងារអភិរក្សបន្តនៅក្នុងឆ្នាំ២០២៥ ដែលពោរពេញទៅដោយក្តីសង្ឃឹម និងការប្តេជ្ញាចិត្តខ្ពស់បន្ថែមទៀត។ ​​

ក្រៀល មានវត្តមានពេញមួយឆ្នាំនៅប្រទេសកម្ពុជា ភាគច្រើនរស់នៅតាមតំបន់វាលទំនាបលិចទឹក វាលស្រែ តាមតំបន់ វាលស្មៅក្នុងព្រៃល្បោះ នៅតំបន់ភូមិភាគឧត្តរនៃប្រទេស តំបន់បឹងទន្លេសាប ជាពិសេសខេត្តព្រះវិហារ បន្ទាយមានជ័យ កំពត និងតាកែវ។

ដែនជម្រកសត្វព្រៃលំផាត់ បានក្លាយជាទីតាំងដ៏ពេញនិយមមួយក្នុងចំណោមតំបន់ដ៏តិចតួចប៉ុណ្ណោះ នៅក្នុងតំបន់មេគង្គ ដែលសត្វក្រៀលបានជ្រើសរើសបន្តពូជ ចិញ្ចឹមកូន និងស្នាក់នៅនារដូវរងា។  ជាទូទៅ សត្វកម្រមួយប្រភេទនេះ ចាប់ផ្តើមបង្កកំណើតនៅដើមរដូវវស្សាពីខែឧសភា ដល់តុលា ក្នុងដែនជម្រកសត្វព្រៃនានានៅកម្ពុជា។ ទិន្នន័យជំរឿនឆ្នាំ២០២៣-២០២៤ កម្ពុជាកត់ត្រាបានត្រឹមតែ១៧៨ក្បាលប៉ុណ្ណោះ។

ក្រៀល គឺជាប្រភេទសត្វស្លាបដែលមានកម្ពស់ខ្ពស់ជាងគេលើពិភពលោក។ វាត្រូវបានចាត់ថ្នាក់ជាប្រភេទសត្វងាយរងគ្រោះក្នុងបញ្ជីក្រហម IUCN និងកំពុងទទួលរងការគំរាមកំហែងយ៉ាងខ្លាំង តាមរយៈសកម្មភាពមួយចំនួនរបស់មនុស្សដូចជា ការបំពុល ការរានដីធ្វើកសិកម្មនៅតំបន់ដីសើម ដែលបានប៉ះពាល់យ៉ាងធ្ងន់ធ្ងរដល់ទីជម្រក ចំណីអាហារ និងវត្តបន្តពូជ៕