រថយន្តក្រុងដឹកសិស្សចាប់ហ្រ្វាំងមិនជាប់ រេចង្កូតធ្លាក់ផ្លូវលើខ្នងភ្នំឧទ្យានជាតិព្រះកុសុមៈគីរីរម្យ តែសំណាងល្អមិនធ្លាក់ជ្រោះនោះទេ

ភ្នំពេញ៖ មានករណីរថយន្តក្រុងដឹកសិស្សសាលាចាប់ហ្រ្វាំងមិនជាប់ ក៏រេចង្កូតធ្លាក់ផ្លូវទៅក្បែរជ្រោះ តែសំណាងល្អមិនធ្លាក់ជ្រោះនោះទេ ដោយទើជាប់នឹងដើមឈើបង្កឱ្យមនុស្ស២នាក់រងរបួស។ ករណីនេះបានកើតឡើងស្ថិតនៅភូមិសាស្រ្ត ស្រុកភ្នំស្រួច ឃុំចំបក់ ខេត្តកំពង់ស្ពឺ លើខ្នងភ្នំឧទ្យានជាតិព្រះកុសុមៈគីរីរម្យ កាលពីថៃ្ងទី២៩ ខែធ្នូ ឆ្នាំ ២០២៤ ។

លោកវរសេនីយ៍ ទោ ជុន ចន្ទដេត អធិកា រនគរបាលស្រុកភ្នំស្រួច បានឱ្យដឹងថា ក្រោយកើតហេតុ សមត្ថកិច្ចនគរបាល នៃអធិការដ្ឋាននគរបាលស្រុកភ្នំស្រួច បានចេញប្រតិបត្ដិការ ជួយអន្ដរាគមន៍ ដោយ ក្នុងរថយន្ដមានមនុស្សសរុបជិត៧០នាក់ (ស្រី ៤៣ នាក់)  ដែលជាសិស្សសាលា និងលោក គ្រូ -អ្នកគ្រូ មកពីវិទ្យាល័យ ល្វា ស្រុកព្រៃឈរ ខេត្តកំពង់ចាម ។

លោកអធិការបន្តថា គ្រោះថ្នាក់នេះមិនប៉ះពាល់ដល់ អាយុជីវិតមនុស្សនោះទេ ប៉ុន្តែ រងរបួសស្រាល -ធ្ងន់២នាក់ គឺ អ្នកបើកបរ និងព្រូរថយន្ត ។ មូលហេតុដែលបង្កជាគ្រោះថ្នាក់គឺរថយន្តពេលធ្វើដំណើរចុះពីលើភ្នំ មកដល់ចំណុចខាងលើរថយន្ដក៏មានបញ្ហា ហ្រ្វាំងជាន់មិនជាប់រួចអ្នកបើកបរបាន ព្យាយាមដាក់លេខដើម្បីទប់ល្បឿនចៃដន្យ បានរេ ចង្កូតទៅផ្នែកម្ខាងផ្លូវរួចបានបុកដើមឈើទើបទប់ជាប់។

ក្រោយកើតហេតុក៏មានការផ្សព្វផ្សាយតៗគ្នាយ៉ាងលឿន និងលើសពីហេតុការណ៍ពិតថា រថយន្តដឹកសិស្សនោះ បានធ្លាក់ជ្រោះ។ បន្ទាប់ពីចុះទៅដល់កន្លែងកើតហេតុ សមត្ថកិច្ចក៏បំភ្លឺព័ត៌មានផ្លូវការថា រថយន្តនោះគ្រាន់តែធ្លាក់ផ្លូវប៉ុណ្ណោះ មិនមែនធ្លាក់ចូលជ្រោះនោះទេ រីឯអ្នកដែលស្ថិតក្នុងរថយន្តបានរួចផុតជីវិតទាំងអស់គ្នា៕