មនុស្ស១២០នាក់បានស្លាប់ ក្រោយយន្តហោះដឹកអ្នកដំណើរ មួយគ្រឿងបានធ្លាក់ចេញពីផ្លូវរត់ ជ្រុលទៅបុកជញ្ជាំងនៅឯអាកាសយានដ្ឋានអន្តរជាតិ Muan ក្នុងប្រទេសកូរ៉េខាងត្បូង
សេអ៊ូល៖ នៅថ្ងៃអាទិត្យទី២៩ ខែធ្នូនេះ ទីភ្នាក់ងារពន្លត់អគ្គីភ័យជាតិរបស់កូរ៉េខាងត្បូង បានប្រកាសថា យ៉ាងហោចណាស់មនុស្ស១២០នាក់បានបាត់បង់ជីវិត ក្រោយយន្តហោះមួយគ្រឿងបានចុះចតដោយគ្មានកង់ ហើយបានធ្លាក់ចេញពីផ្លូវរត់ ជ្រុលទៅបុកជញ្ជាំងនៅឯអាកាសយានដ្ឋានអន្តរជាតិ Muan របស់ប្រទេសកូរ៉េខាងត្បូង។
ក្រសួងដឹកជញ្ជូនរបស់ប្រទេសកូរ៉េខាងត្បូង បានបញ្ជាក់ថា យន្តហោះ Jeju Air ជើងហោះហើរលេខ 7C2216 ដែលមកដល់ពីរដ្ឋធានីបាងកករបស់ប្រទេសថៃជាមួយនឹងមនុស្ស១៨១ នាក់នៅលើយន្តហោះនោះ បានព្យាយាមចុះចតភ្លាមៗនៅអាកាសយានដ្ឋាននៅភាគខាងត្បូងនៃប្រទេស។ វាជាឧបទ្ទវហេតុផ្លូវអាកាសដ៏សាហាវបំផុតដែលពាក់ព័ន្ធនឹងក្រុមហ៊ុនអាកាសចរណ៍កូរ៉េខាងត្បូងក្នុងរយៈពេលជិត៣ ទសវត្សរ៍។
ប្រធានផ្នែកពន្លត់អគ្គីភ័យរបស់អាកាសយានដ្ឋាន Muan លោក Lee Jung-hyun បានប្រាប់សន្និសីទខ្លីមួយថា សមាជិកអ្នកបម្រើការលើយន្តហោះពីរនាក់ត្រូវបានជួយសង្គ្រោះពីផ្នែកកន្ទុយនៃយន្តហោះដែលកំពុងឆេះ។
លោកបានបន្តថា មានតែផ្នែកកន្ទុយប៉ុណ្ណោះដែលរក្សារូបរាងបន្តិច ហើយនៅផ្នែកដែលនៅសល់នៃយន្តហោះ ខូចខាតយ៉ាងដំណំ។
ទីភ្នាក់ងារសារព័ត៌មានយ៉ុនហាប់បានដកស្រង់សម្តីមន្ត្រីពន្លត់អគ្គីភ័យដែលបញ្ជាក់ថា ភាគច្រើននៃអ្នកដំណើរ ១៧៥នាក់ និងអ្នកបម្រើការលើយន្តហោះ ៦នាក់ត្រូវបានគេសន្មត់ថាបានស្លាប់។
យោងតាមទិន្នន័យរបស់ក្រសួងដឹកជញ្ជូន ការធ្លាក់យន្តហោះនេះគឺគ្រោះថ្នាក់អាក្រក់បំផុតដែលកើតឡើងលើក្រុមហ៊ុនអាកាសចរណ៍កូរ៉េខាងត្បូងចាប់តាំងពីការធ្លាក់យន្តហោះកូរ៉េឆ្នាំ១៩៩៧ នៅកោះហ្គាំ ដែលបានសម្លាប់មនុស្សជាង២០០នាក់។
ក្រុមអ្នកស៊ើបអង្កេតកំពុងពិនិត្យមើលការវាយប្រហាររបស់បក្សី និងលក្ខខណ្ឌអាកាសធាតុ ដែលជាកត្តាដែលអាចបង្កឱ្យមានគ្រោះថ្នាក់នេះ។ អាជ្ញាធរអាកាសយានដ្ឋានបញ្ជាក់ថា ការវាយប្រហាររបស់សត្វស្លាបអាចបណ្ដាលឱ្យឧបករណ៍ចុះចតមិនដំណើរការ។ យន្តហោះ Boeing 737-800 ដំណើរការដោយក្រុមហ៊ុន Jeju Air ត្រូវបានផលិតក្នុងឆ្នាំ២០០៩។
នាយកប្រតិបត្តិក្រុមហ៊ុន Jeju Air លោក Kim E-bae បានសុំទោសចំពោះឧបទ្ទវហេតុនេះ ដោយបានឱនក្បាលជាការសុំទោសយ៉ាងជ្រាលជ្រៅអំឡុងពេលធ្វើបទសម្ភាសតាមទូរទស្សន៍។ លោកបន្តថា មូលហេតុនៃការធ្លាក់យន្តហោះនេះនៅមិនទាន់ដឹងនៅឡើយទេ ដោយយន្តហោះនេះមិនមានកំណត់ត្រានៃគ្រោះថ្នាក់ ហើយក៏មិនមានសញ្ញាដំបូងនៃការខុសប្រក្រតីដែរ ។ លោក អះអាងថា ក្រុមហ៊ុនអាកាសចរណ៍នឹងសហការជាមួយក្រុមអ្នកស៊ើបអង្កេតលើករណីនេះ។
ជើងហោះហើរក្នុងស្រុក និងអន្តរជាតិទាំងអស់នៅព្រលានយន្តហោះ Muan ត្រូវបានលុបចោល។ ប្រធានាធិបតីស្តីទីកូរ៉េខាងត្បូង លោក ឆយ សាំងម៉ុក (Choi Sang-mok) បានមកដល់កន្លែងកើតហេតុនៃឧបទ្ទវហេតុនេះ ហើយបាននិយាយថា រដ្ឋាភិបាលកំពុងប្រើធនធានទាំងអស់របស់ខ្លួនក្នុងការដោះស្រាយបញ្ហាធ្លាក់យន្តហោះនេះ។
អ្នកនាំពាក្យរដ្ឋាភិបាលថៃ លោក Jirayu Houngsub បានឲ្យដឹងថា ស្ត្រីថៃពីរនាក់នៅលើយន្តហោះនោះមានអាយុ២២ឆ្នាំ និង៤៥ឆ្នាំ ដោយបន្ថែមថាព័ត៌មានលម្អិតកំពុងត្រូវបានផ្ទៀងផ្ទាត់នៅឡើយ។ នាយករដ្ឋមន្ត្រីថៃលោកស្រី ផែថងថាន ស៊ីណាវ៉ាត្រា បានផ្ញើសាររំលែកទុក្ខដល់ក្រុមគ្រួសារនៃអ្នកស្លាប់ និងរបួសនៅក្នុងការបង្ហោះនៅលើបណ្តាញសង្គម X ដោយនិយាយថា លោកស្រីបានណែនាំក្រសួងការបរទេសឱ្យផ្តល់ជំនួយ។
