ហ្កាតេម៉ាឡា អះអាងថាខ្លួនបើកចំហក្នុងការចូលរួមក្នុងកិច្ចសន្ទនាប្រកបដោយការស្ថាបនា និងប្រកបដោយការគោរពជាមួយរដ្ឋបាលថ្មីរបស់ លោក ដូណាល់ ត្រាំ
ហ្កាតេម៉ាឡា៖ ហ្កាតេម៉ាឡាបានអះអាងថា ខ្លួនបើកចំហក្នុងការចូលរួមក្នុងកិច្ចសន្ទនាប្រកបដោយការស្ថាបនា និងប្រកបដោយការគោរពជាមួយរដ្ឋបាលថ្មីរបស់ប្រធានាធិបតីអាម៉េរិក លោក ដូណាល់ ត្រាំ ទោះបីជាមិនមានកិច្ចព្រមព្រៀងណាមួយត្រូវបានធ្វើឡើងស្តីពីការទទួលយកជនចំណាកស្រុកនិរទេសក៏ដោយ។
ថ្លែងនៅក្នុងសេចក្តីថ្លែងការណ៍ រដ្ឋាភិបាលនៃប្រទេសអាម៉េរិកកណ្តាលមួយនេះ បានអះអាងថា ខ្លួនចូលរួមជាបន្តបន្ទាប់ជាមួយក្រុមរដ្ឋបាលថ្មីរបស់លោក ត្រាំ ទោះបីជាមិនមានកិច្ចប្រជុំណាមួយបានកើតឡើងជាមួយមន្ត្រីរដ្ឋាភិបាល ដើម្បីពិភាក្សាអំពីផែនការក្នុងការនិរទេសជនអន្តោប្រវេសន៍ ដែលរស់នៅក្នុងសហរដ្ឋអាម៉េរិក ដោយខុសច្បាប់ក៏ដោយ។
យ៉ាងណា ហ្កាតេម៉ាឡាបានបើកចិត្តយ៉ាងទូលំទូលាយ ក្នុងការទទួលពលរដ្ឋនៃប្រជាជាតិអាម៉េរិកកណ្តាលផ្សេងទៀត ដែលត្រូវបាននិរទេសចេញពីសហរដ្ឋអាម៉េរិក។ នេះបើតាមប្រភពដឹងអំពីរឿងរ៉ាវនេះ។
ការណ៍នេះ កើតឡើងបន្ទាប់ពីប្រធានាធិបតីជាប់ឆ្នោត លោក ដូណាល់ ត្រាំ គ្រោងនឹងចាប់ផ្តើមប្រតិបត្តិការនិរទេសទ្រង់ទ្រាយធំមួយសំដៅលើជនអន្តោប្រវេសន៍រាប់លាននាក់ដែលកំពុងរស់នៅលើទឹកដីសហរដ្ឋអាម៉េរិកដោយខុសច្បាប់ នៅពេលលោកចូលកាន់តំណែងជាប្រធានាធិបតីអាម៉េរិកនៅថ្ងៃទី២០ ខែមករា។ គួរបញ្ជាក់ថា មានជនអន្តោប្រវេសន៍ប្រហែល១១លាននាក់រស់នៅក្នុងសហរដ្ឋអាម៉េរិកដោយខុសច្បាប់៕
