ឯកឧត្តម ប្រាក់ សំអឿន ផ្ញើសារលិខិតគោរពជូនពរ ឯកឧត្តម ងី ច័ន្រ្ទផល និងលោកជំទាវ ក្នុងឱកាសបុណ្យចូលឆ្នាំសកល ២០២៥

ភ្នំពេញ៖ ឯកឧត្តម ប្រាក់ សំអឿន រដ្ឋមន្ត្រីប្រតិភូអមនាយករដ្ឋមន្ត្រី និងជានាយករងខុទ្ទកាល័យសម្តេចធិបតី នាយករដ្ឋមន្ត្រី បានផ្ញើសារលិខិតគោរពជូនពរ ឯកឧត្តម ងី ច័ន្រ្ទផល ប្រធានគណៈកម្មការទី១ ព្រឹទ្ធសភា និងលោកជំទាវ ក្នុងឱកាសបុណ្យចូលឆ្នាំថ្មី ឆ្នាំសកល គ្រិស្តសករាជ ២០២៥ ខាងមុខនេះ។

ក្នុងឱកាសបុណ្យចូលឆ្នាំថ្មី ឆ្នាំសកល គ្រិស្តសករាជ ២០២៥ ខាងមុខនេះ ខ្ញុំបាទ សូមអនុញ្ញាតគោរពជូនពរបវរមហាប្រសើរដ៏ឧត្តុង្គឧត្តម ជូនចំពោះឯកឧត្តម ងី ច័ន្រ្ទផល និងលោកជំទាវ សូមឯកឧត្តម និងលោកជំទាវ ទទួលបាននូវសព្ទសាធុការពរ និងសិរីសួស្តី ប្រកបដោយសុខភាពល្អបរិបូណ៍ កម្លាំងមាំមួន បញ្ញាញាណវាងវៃ ជន្មាយុយឺនយូរ ដើម្បីរួមចំណែកដឹកនាំប្រទេសកម្ពុជា ឆ្ពោះទៅ រកការអភិវឌ្ឍប្រកបដោយនិរន្តភាព និងភាពសម្បូរសប្បាយរុងរឿងរហូតតរៀងទៅ។

ខ្ញុំបាទ សូមគោរពកោតសរសើរយ៉ាងក្រៃលែងចំពោះ ឯកឧត្តម ងី ច័ន្រ្ទផល ដែលបានខិតខំ ប្រឹងប្រែងយកអស់កម្លាំងកាយចិត្ត ក្នុងការបម្រើភារកិច្ចនយោបាយផ្សះផ្សារ បង្រួបបង្រួមជាតិ ឱ្យមានសុខសន្តិភាព និងមានការអភិវឌ្ឍយ៉ាងត្រចះត្រចង់ជូនជាតិមាតុភូមិកម្ពុជា។ មិនតែប៉ុណ្ណោះ ឯកឧត្តម ងី ច័ន្រ្ទផល បានចូលរួមចំណែកក្នុង ការដឹកនាំប្រទេសជាតិសម្រេចបានជោគជ័យធំៗថែមទៀត ក្នុងការអនុវត្តកម្មវិធីនយោបាយរបស់រាជរដ្ឋាភិបាល កម្មវិធីកំណែ ទម្រង់រដ្ឋបាលនានា មានសន្តិសុខសណ្តាប់ធ្នាប់សាធារណៈ ធានាបាននូវលទ្ធិប្រជាធិបតេយ្យនៅមូលដ្ឋាន ដើម្បីនាំនាវាកម្ពុជា ឆ្ពោះទៅរកនីតិរដ្ឋមួយដែលជាមូលដ្ឋានគ្រឹះ ក្នុងការអភិវឌ្ឍប្រទេសជាតិឱ្យរីកចម្រើនលូតលាស់លើគ្រប់វិស័យ។

ក្នុងឱកាសដ៏វិសេសវិសាលនេះ ខ្ញុំបាទ សូមគោរពជូនពរ ឯកឧត្តម ងី ច័ន្រ្ទផល និងលោកជំទាវ សូមទទួលបានជោគជ័យធំៗថ្មីថែមទៀត ក្នុងបេសកកម្មដ៏ឧត្តុង្គឧត្តមក្នុងការបម្រើប្រទេសជាតិ និងសូមបួងសួងដល់គុណបុណ្យព្រះរតនត្រ័យវត្ថុស័ក្តិសិទ្ធិក្នុងលោក ទេវតាឆ្នាំថ្មីតាមថែរក្សា ឯកឧត្តម និងលោកជំទាវ ព្រមទាំង បុត្រា បុត្រី ចៅប្រុស ចៅស្រី ជាទីស្រឡាញ់ សូមបានប្រកប នូវពុទ្ធពរទាំង៤ប្រការ គឺ អាយុ វណ្ណៈ សុខៈ ពលៈ កុំបីឃ្លៀងឃ្លាតឡើយ។

សូម ឯកឧត្តម ងី ច័ន្រ្ទផល ប្រធានគណៈកម្មការទី១ ព្រឹទ្ធសភា និងលោកជំទាវ មេត្តាទទួលនូវគារវភក្តីដ៏ខ្ពង់ខ្ពស់បំផុតអំពីខ្ញុំបាទ ៕