ឯកឧត្តម ចាន់ ស៊ីណាត អញ្ជើញចូលរួម កិច្ចប្រជុំលើក ទី៥ របស់គណៈកម្មាធិការរដ្ឋាភិបាល ឌីជីថល(គ.រ.ឌ.)

ភ្នំពេញ៖ នៅរសៀលថ្ងៃទី២៧ ខែធ្នូ ឆ្នាំ២០២៤ នៅទីស្តីការក្រសួងប្រៃសណីយ៍ និងទូរគមនាគមន៍ ឯកឧត្តម ចាន់ ស៊ីណាត រដ្ឋលេខាធិការ តំណាងដ៏ខ្ពង់ខ្ពស់ ឯឧត្តម ថោ ជេដ្ឋា រដ្ឋមន្ត្រី ក្រសួងធនធានទឹក និង ឧតុនិយម បានអញ្ជើញចូលរួម ក្នុងកិច្ចប្រជុំលើកទី៥ របស់គណៈកម្មាធិការ រដ្ឋាភិបាលឌីជីថល ក្រោមអធិបតីភាព ដ៏ខ្ពង់ខ្ពស់ឯកឧត្តម ជា វ៉ាន់ដេត រដ្ឋមន្ត្រី ក្រសួងប្រៃសណីយ៍ និង ទូរគមនាគមន៍ និង ជាប្រធាន គណៈកម្មាធិការ រដ្ឋាភិបាលឌីជីថល។

សូមជម្រាបថា ប្រជុំលើកទី៥ របស់គណៈកម្មាធិការ រដ្ឋាភិបាលឌីជីថល មានការអញ្ជើញចូលរួមពី ឯកឧត្ដម លោកជំទាវ ជាអនុប្រធាន សមាជិកគណៈកម្មាធិការ រដ្ឋាភិបាលឌីជីថល ថ្នាក់ដឹកនាំ និងមន្ត្រីរាជការ សរុបប្រមាណ ១០០នាក់។

ឯកឧត្តម រដ្ឋលេខាធិការបានបញ្ជាក់ឱ្យដឹងថា កិច្ច ប្រជុំលើកនេះក្នុងគោលបំណងធ្វើការត្រួតពិនិត្យមើលលើការបង្កើតឡើងនូវច្បាប់ស្តីពីកិច្ចការពារទិន្នន័យបុគ្គល ដែលច្បាប់នេះកំណត់អំពីគោលការណ៍ វិធាន និងយន្តការនៃការធ្វើប្រព្រឹត្តកម្មទិន្នន័យបុគ្គលសម្រាប់បំណងដូចតទៅ៖ ទី១) លើកកម្ពស់កិច្ចការពារសិទ្ធិប្រធានទិន្នន័យ ដោយថ្លឹងថ្លែងអំពីតុល្យភាពនៃកិច្ចការពារសិទ្ធិប្រធានទិន្នន័យ និងតម្រូវការរបស់បុគ្គលគ្រប់គ្រងទិន្នន័យក្នុងការធ្វើធុរកិច្ច ឬសកម្មភាពរបស់ខ្លួន ទី២) ធានាការធ្វើប្រព្រឹត្តកម្មទិន្នន័យបុគ្គលដោយមានការទទួលខុសត្រូវ និងតម្លាភាព ទី៣)គ្រប់គ្រងការផ្ទេរទិន្នន័យបុគ្គលឆ្លងដែនដោយធានានូវកិច្ចការពារសិទ្ធិប្រធានទិន្នន័យ និង ទី៤) រួមចំណែកបង្កើតឧស្សាហកម្មថ្មីក្នុងបរិបទនៃសេដ្ឋកិច្ច និងសង្គមឌីជីថល។

សូមបញ្ជាក់ថា គណៈកម្មាធិការរដ្ឋាភិបាលឌីជីថល( (គ.រ.ឌ.) ត្រូវបានរៀបចំឡើង ដើម្បីធានានូវប្រសិទ្ធភាព និងប្រសិទ្ធផលនៃការបំពេញមុខងារសេនាធិការជូនក្រុមប្រឹក្សាជាតិសេដ្ឋកិច្ច និងសង្គមឌីជីថល (ក.ស.ឌ.) លើការងារបច្ចេកទេស និងគោលនយោបាយនៅក្នុងការដឹកនាំ សម្របសម្រួល និងជំរុញការកសាងរដ្ឋាភិបាលឌីជីថលនៅក្នុងព្រះរាជាណាចក្រកម្ពុជា៕