ឯកឧត្តម អ៊ុំ ម៉ារ៉ា អញ្ជេីញបិទសន្និបាតបូកសរុបលទ្ធផលការងារប្រចាំឆ្នាំ២០២៤ និងទិសដៅការងារឆ្នាំ២០២៥ របស់អគ្គនាយកដ្ឋានរដ្ឋបាល
ភ្នំពេញ៖ នៅទីស្ដីការក្រសួងមហាផ្ទៃ នារសៀលថ្ងៃទី២៤ ខែធ្នូ ២០២៤នេះ អគ្គនាយកដ្ឋានរដ្ឋបាល ក្រសួងមហាផ្ទៃ បានរៀបចំពិធីបិទសន្និបាតបូកសរុបលទ្ធផលការងារប្រចាំឆ្នាំ២០២៤ និងទិសដៅការងារឆ្នាំ២០២៥ របស់អគ្គនាយកដ្ឋានរដ្ឋបាល ក្រសួងមហាផ្ទៃ ក្រោមអធិបតីភាព ឯកឧត្តម អ៊ុំ ម៉ារ៉ា រដ្ឋលេខាធិការក្រសួងមហាផ្ទៃ និងជាតំណាងដ៏ខ្ពង់ខ្ពស់របស់ឯកឧត្តមអភិសន្តិបណ្ឌិត ស សុខា ឧបនាយករដ្ឋមន្រ្តី រដ្ឋមន្រ្តីក្រសួងមហាផ្ទៃ។
ដោយមានការចូលរួមពីឯកឧត្តម លោកជំទាវ រដ្ឋលេខាធិការ អនុរដ្ឋលេខាធិការក្រសួងមហាផ្ទៃ តំណាងអង្គភាពទាំងអស់ចំណុះក្រសួងមហាផ្ទៃ ឯកឧត្តម លោកជំទាវ អគ្គនាយករង ឯកឧត្តម លោក លោកស្រីប្រធាននាយកដ្ឋាន និងមន្រ្តីពាក់ព័ន្ធជាច្រើនរូប។
នៅក្នុងពិធីបិទសន្និបាតនេះដែរ ឯកឧត្តម សួស ប្រាថ្នា អគ្គនាយកនៃអគ្គនាយកដ្ឋានរដ្ឋបាល ក្រសួងមហាផ្ទៃ បានធ្វើការរបាយការណ៍សង្ខេប និងគូសបញ្ជាក់នូវសមិទ្ធផលសំខាន់ៗជូនអង្គសន្និបាត រួមមាន៖ ការងារក្រុមប្រឹក្សារដ្ឋបាលថ្នាក់ក្រោមជាតិ, ការងារគ្រប់គ្រងរដ្ឋបាលដែនដី, ការងារទីក្រុងឆ្លាត, ការគ្រប់គ្រងធនធានមនុស្សថ្នាក់ក្រោមជាតិ, វិមជ្ឈការហិរញ្ញវត្ថុ, ការផ្ទេរមុខងារនិងធនធាន, កិច្ចសហប្រតិបត្តិការខេត្តជាប់ព្រំដែន, ការលើកកម្ពស់ការផ្ដល់សេវាសាធារណៈក្នុងក្របខ័ណ្ឌក្រសួងមហាផ្ទៃតាមរយៈការចុះបញ្ជីគណបក្សនយោបាយ សមាគម អង្គការមិនមែនរដ្ឋាភិបាល និងការអភិវឌ្ឍសមត្ថភាពមន្ត្រីរាជការរបស់អគ្គនាយកដ្ឋានរដ្ឋបាលជាដើម។
ថ្លែងបិទក្នុងពិធីសន្និបាតរបស់អគ្គនាយកដ្ឋានរដ្ឋបាល ឯកឧត្តម អ៊ុំ ម៉ារ៉ា រដ្ឋលេខាធិការក្រសួងមហាផ្ទៃ បានកោតសរសើរ និងវាយតម្លៃខ្ពស់ចំពោះថ្នាក់ដឹកនាំ និងមន្រ្តីរាជការស៊ីវិល នៃអគ្គនាយកដ្ឋានរដ្ឋបាល ដែលបានចូលរួមយ៉ាងសកម្មបំពេញតួនាទីភារកិច្ច និងគោលការណ៍ច្បាប់ លិខិតបទដ្ឋានគតិយុត្ត ជាពិសេសកម្មវិធីនយោបាយរបស់ក្រសួង និងរាជរដ្ឋាភិបាល។
ទន្ទឹមនេះ ឯកឧត្តមរដ្ឋលេខាធិការ ក៏បានណែនាំ និងសំណូមពរឱ្យថ្នាក់ដឹកនាំ និងមន្រ្តីទាំងអស់បន្តចូលរួមគាំទ្រ និងអនុវត្តតាមតួនាទីភារកិច្ច ដើម្បីសម្រេចបាននូវសមិទ្ធផលជូនជាតិ និងប្រជាពលរដ្ឋបន្ថែមទៀត ៕
