ប្រធានាធិបតីចិន អះអាងថា ម៉ាកាវគួរតែ ដើរឱ្យទាន់តាមនិន្នាការនៃសម័យកាល និងដើរតួនាទីកាន់តែធំទូលាយនៅលើឆាកអន្តរជាតិ
ម៉ាកាវ៖ ប្រធានាធិបតីចិន លោក ស៊ី ជីនពីង បានអះអាងថា ម៉ាកាវគួរតែ ដើរឱ្យទាន់តាមនិន្នាការនៃសម័យកាល និងដើរតួនាទីកាន់តែធំទូលាយនៅលើឆាកអន្តរជាតិ ខណៈមេដឹកនាំចិនរូបនេះជំរុញឱ្យមជ្ឈមណ្ឌលល្បែងស៊ីសងដ៏ធំបំផុតរបស់ពិភពលោកនេះបង្ហាញភាពក្លាហានដើម្បីផ្លាស់ប្ដូរ និងច្នៃប្រឌិតថែមទៀត។
លោក ស៊ី បានអំពាវនាវឱ្យម៉ាកាវ រៀបចំផែនការអភិវឌ្ឍន៍អនាគតរបស់ខ្លួនតាមបែបវិទ្យាសាស្រ្ត និងភ្ជាប់ទំនាក់ទំនងយ៉ាងសកម្មជាមួយយុទ្ធសាស្ត្រអភិវឌ្ឍន៍ជាតិ រួមទាំងតំបន់ Greater Bay ដែលរួមមានមជ្ឈមណ្ឌលហិរញ្ញវត្ថុជិតខាងនៃទីក្រុងហុងកុង និងខេត្តក្វាងទុង។ នេះបើតាមទីភ្នាក់ងារព័ត៌មានចុះផ្សាយនៅថ្ងៃសុក្រទី២០ ខែធ្នូ។
លើសពីនេះ លោក ស៊ី ក៏បានអំពាវនាវឱ្យម៉ាកាវកាន់តែបើកចំហ និងបរិយាប័ន្នដើម្បីជ្រើសរើសអ្នកមានទេពកោសល្យពីទូទាំងពិភពលោក និងបង្ហាញសមិទ្ធផលកាន់តែច្រើននៅលើឆាកអន្តរជាតិ។
លោក ស៊ី បានទៅដល់អតីតឧបទ្វីបព័រទុយហ្គាល់ កាលពីថ្ងៃពុធសម្រាប់ដំណើរទស្សនកិច្ចរយៈពេលបីថ្ងៃ។ លោកក៏បានទៅទស្សនាតំបន់ផ្សេងៗនៃតំបន់រដ្ឋបាលស្វយ័តមួយនេះ រួមទាំងសាកលវិទ្យាល័យ និងតំបន់សេដ្ឋកិច្ចពិសេសផងដែរ។
គួរជម្រាបថា ដំណើរ ទស្សនកិច្ចទៅ កាន់ ម៉ាកាវ គឺជា លើក ទី បី របស់ លោក ស៊ី ក្នុង តំណែង ជា ប្រធានាធិបតីចិន។ ទន្ទឹមគ្នា រដ្ឋធានីប៉េកាំងបានសរសើរម៉ាកាវមិនដាច់ពីមាត់ចំពោះភាពស្មោះត្រង់ និងស្ថិរភាពរបស់ខ្លួន ដោយជាងពាក់កណ្តាលនៃចំនួនប្រជាជន៧សែននាក់របស់ម៉ាកាវ បានធ្វើអន្តោប្រវេសន៍ពីប្រទេសចិនក្នុងប៉ុន្មានទសវត្សរ៍ថ្មីៗនេះ។
មែនទែនទៅ តំបន់រដ្ឋបាលពិសេសនៃប្រទេសចិន ទីក្រុងម៉ាកាវ គឺជាកន្លែងតែមួយគត់នៅក្នុងប្រទេសចិន ដែលល្បែងស៊ីសងមានភាពស្របច្បាប់ ខណៈសេដ្ឋកិច្ចម៉ាកាវពឹងផ្អែកខ្លាំងលើឧស្សាហកម្មកាស៊ីណូ ដែលរួមចំណែកប្រហែល៨០ភាគរយនៃចំណូលពន្ធក្នុងតំបន់។ គួរបញ្ជាក់ថា ម៉ាកាវបានត្រលប់ទៅក្រោមការគ្រប់គ្រងរបស់ចិនវិញ នៅថ្ងៃទី២០ ខែធ្នូ ឆ្នាំ១៩៩៩ ដែលគ្រប់គ្រងក្រោមរូបមន្ត «ប្រទេសមួយ ប្រព័ន្ធពីរ» ដូចគ្នានឹងហុងកុងដែរ៕
