មន្ទីរបញ្ចកោណ៖ សហរដ្ឋអាម៉េរិក បានបង្កើនចំនួនកងទ័ពនៅក្នុងប្រទេសស៊ីរីទ្វេដង នៅដើមឆ្នាំនេះ

វ៉ាស៊ីនតោន៖ មន្ទីរបញ្ចកោណបានបង្ហាញកាលពីថ្ងៃព្រហស្បតិ៍ទី១៩ធ្នូថា សហរដ្ឋអាម៉េរិក បានបង្កើនចំនួនកងទ័ពនៅក្នុងប្រទេសស៊ីរីទ្វេដង ដល់ប្រហែល២ពាន់នាក់នៅដើមឆ្នាំនេះ ជាផ្នែកនៃប្រតិបត្តិការប្រឆាំងនឹងក្រុមសកម្មប្រយុទ្ធរដ្ឋអ៊ិស្លាម។

ក្នុងរយៈពេលប៉ុន្មានឆ្នាំមកនេះ រដ្ឋាភិបាលរដ្ឋធានីវ៉ាស៊ីនតោនបានឱ្យដឹងថា ខ្លួនមានបុគ្គលិកយោធាប្រហែល៩០០នាក់នៅក្នុងប្រទេសស៊ីរី ដែលជាផ្នែកមួយនៃកិច្ចខិតខំប្រឹងប្រែងអន្តរជាតិប្រឆាំងនឹងក្រុមជីហាដ ដែលបានដណ្តើមយកទឹកដីជាច្រើននៅទីនោះ និងនៅក្នុងប្រទេសអ៊ីរ៉ាក់ មុនពេលត្រូវបានកម្ចាត់ដោយកងកម្លាំងក្នុងស្រុកគាំទ្រដោយយុទ្ធនាការផ្លូវអាកាសដឹកនាំដោយសហរដ្ឋអាម៉េរិក។

អ្នកនាំពាក្យមន្ទីរបញ្ចកោណ ឧត្តមសេនីយ៍ទោ ប៉ាត់ រីឌឺ បានប្រាប់អ្នកសារព័ត៌មានថា ប៉ុន្តែឥឡូវ.. ក្នុងរយៈពេលយ៉ាងហោចណាស់ពីរបីខែមកនេះ ទាហានអាម៉េរិកនៅក្នុងប្រទេសស៊ីរី បានកើនដល់ប្រមាណ២០០០នាក់។ លោក រីឌឺ បានថ្លែងយ៉ាងដូច្នេះថា៖«ទាហានបន្ថែមនេះ ត្រូវបានចាត់ទុកថា ជាកងកម្លាំងបណ្តោះអាសន្នដែលនៅទីនោះ ដើម្បីគាំទ្រដល់បេសកកម្មកម្ចាត់ក្រុមរដ្ឋអ៊ិស្លាម ISIS និងគាំទ្រដល់កងកម្លាំងដែលត្រូវបានដាក់ពង្រាយនៅទីនោះរយៈពេលវែង»។

រដ្ឋធានីវ៉ាស៊ីនតោនបានអះអាងផងដែរថា ខ្លួនមានទាហានប្រហែល២៥០០នាក់នៅក្នុងប្រទេសអ៊ីរ៉ាក់ផងដែរ បានវាយប្រហារ និងការវាយឆ្មក់តាមកាលកំណត់អស់រយៈពេលជាច្រើនឆ្នាំមកហើយ ដើម្បីជួយទប់ស្កាត់ការកើតឡើងវិញនៃក្រុមសកម្មប្រយុទ្ធរដ្ឋអ៊ិស្លាម។ ថ្ងៃទី៨ ខែធ្នូ ជាថ្ងៃដែលក្រុមឧទ្ទាមដណ្តើមយករដ្ឋធានីដាម៉ាស សហរដ្ឋអាម៉េរិក បានប្រកាសពីការវាយប្រហារទៅលើគោលដៅជាង៧៥របស់រដ្ឋអ៊ិស្លាម។ កាលពីថ្ងៃចន្ទ ទីបញ្ជាការកណ្តាលរបស់សហរដ្ឋអាម៉េរិក (CENTCOM) បានបញ្ជាក់ថា កងកម្លាំងអាម៉េរិកបានសម្លាប់ពួកសកម្មប្រយុទ្ធចំនួន១២នាក់៕