ឯកឧត្តមរដ្ឋមន្ត្រី ថោ ជេដ្ឋា អញ្ជើញចូលរួមក្នុងពិធីចុះហត្ថលេខាលើកិច្ចព្រមព្រៀងឥណទានសម្បទាន និងជំនួយឥតសំណង នៃគម្រោងស្តារ និងគ្រប់គ្រងស្ទឹងស្វាយចេក ក្រោមហិរញ្ញប្បទានពីទីភ្នាក់ងារបារាំងសម្រាប់អភិវឌ្ឍន៍ (AFD)
នៅរសៀលថ្ងៃពុធ ៣រោច ខែមិគសិរ ឆ្នាំរោង ឆស័ក ពុទ្ធសករាជ ២៥៦៨ ត្រូវនឹងថ្ងៃទី១៨ ខែធ្នូ ឆ្នាំ២០២៤ ឯកឧត្តម ថោ ជេដ្ឋា រដ្ឋមន្ត្រីក្រសួងធនធានទឹក និងឧតុនិយម បានអញ្ជើញចូលរួមក្នុងពិធីចុះហត្ថលេខាលើកិច្ចព្រមព្រៀងឥណទានសម្បទាន និងជំនួយឥតសំណង នៃគម្រោងស្តារ និងគ្រប់គ្រងស្ទឹងស្វាយចេក ខេត្តបន្ទាយមានជ័យ រវាងរាជរដ្ឋាភិបាលនៃព្រះរាជាណាចក្រកម្ពុជា និងទីភ្នាក់ងារបារាំងសម្រាប់អភិវឌ្ឍន៍ (AFD) និងសហភាពអឺរ៉ុប (EU) នៅទីស្ដីការក្រសួងសេដ្ឋកិច្ច និងហិរញ្ញវត្ថុ។
សូមជម្រាបថា ពិធីចុះហត្ថលេខាលើគម្រោងកិច្ចសហប្រតិបត្តិការអភិវឌ្ឍន៍បានប្រព្រឹត្តទៅក្រោមអធិបតីភាព ឯកឧត្តមអគ្គបណ្ឌិតសភាចារ្យ អូន ព័ន្ធមុនីរ័ត្ន ឧបនាយករដ្ឋមន្ត្រី រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ និងលោកស្រី Sandrine Boucher នាយិកាទីភ្នាក់ងារបារាំងសម្រាប់អភិវឌ្ឍន៍ប្រចាំកម្ពុជា លោក Fabrice Etienne ភារធារីនៃស្ថានទូតបារាំងប្រចាំកម្ពុជា និងលោក Bryan FORNARI ប្រធានកិច្ចសហប្រតិបត្តិការនៃប្រតិភូសហភាពអឺរ៉ុប(EU) ប្រចាំនៅកម្ពុជា។
ឯកឧត្តមរដ្ឋមន្ត្រីមានប្រសាសន៍ឱ្យដឹងថា គម្រោងស្តារ និងគ្រប់គ្រងស្ទឹងស្វាយចេក ខេត្តបន្ទាយមានជ័យ មានស្ថាប័នអនុវត្តចំនួនពីរ រួមមានក្រសួងធនធានទឹក និងឧតុនិយម និងក្រសួងកសិកម្ម រុក្ខាប្រមាញ់ និងនេសាទ ហើយមានសមាភាគគម្រោងចំនួនបីគឺ៖ ទី១).ការស្តារឡើងវិញស្ទឹងស្វាយចេក និងការកាត់បន្ថយគ្រោះទឹកជំនន់ និងគ្រោះរាំងស្ងួត, ទី២).ការគាំទ្រការអភិវឌ្ឍកសិកម្មប្រកបដោយនិរន្តរភាពទទួលបានផលចំណេញ និងទី៣).ការពង្រឹងការគ្រប់គ្រងធនធានទឹកចម្រុះនៃអាងស្ទឹងស្វាយចេក។
ជាមួយគ្នានេះដែរ ឯកឧត្តមរដ្ឋមន្ត្រី បានបញ្ជាក់ឱ្យដឹងថា គម្រោងនេះនឹងជួយកាត់បន្ថយគ្រោះធម្មជាតិទឹកជំនន់ដែលតែងតែយាយីជារៀងរាល់ឆ្នាំ ជួយពង្រឹងសុវត្ថិភាពនិងបង្កើនប្រភពធនធានទឹកសម្រាប់កសិកម្ម និងការប្រើប្រាស់លើគ្រប់វិស័យក្នុងតំបន់ ព្រមទាំងបង្កើនផលិតផលកសិកម្ម និងចំណូលពលរដ្ឋ តាមរយៈការបង្កើតយន្តការដឹកនាំគ្រប់គ្រងអាងស្ទឹងស្វាយចេក ដើម្បីធានាការគ្រប់គ្រង និងប្រើប្រាស់អាងស្ទឹងប្រកបដោយប្រសិទ្ធភាព និងស័ក្តិសិទ្ធិភាព។ ជាមួយគ្នានេះ ក៏ជួយពង្រឹងដល់ចីរភាពបរិស្ថាន ប្រព័ន្ធអេកូឡូស៊ី និងពង្រឹងភាពធន់ឆ្លើយតបទៅនឹងការប្រែប្រួលអាកាសធាតុ និងការគ្រប់គ្រងប្រកបដោយប្រសិទ្ធភាពលើធនធានទឹកក្រោមដី និងការព្យាករអាកាសធាតុ ៕
