មន្ត្រីជាន់ខ្ពស់ក្រសួងធនធានទឹក ដឹកនាំនិងសម្របសម្រួលជំនួបពិភាក្សាការងារជាមួយតំណាងអង្គការ People in Need (PIN)

ភ្នំពេញ៖ នៅទីស្តីការក្រសួង នារសៀលថ្ងៃទី១៧ ខែធ្នូ ឆ្នាំ២០២៤នេះ ឯកឧត្តមសាស្រ្តាចារ្យបណ្ឌិត អឿង ចន្ថា អនុរដ្ឋលេខាធិការ ក្នុងនាមតំណាងដ៏ខ្ពង់ខ្ពស់របស់ឯកឧត្តម ថោ ជេដ្ឋា រដ្ឋមន្ដ្រីក្រសួងធនធានទឹក និងឧតុនិយម បានអញ្ជើញដឹកនាំ និងសម្របសម្រួលពិភាក្សាការងារជាមួយតំណាងអង្គការ People in Need (PIN)។

សូមជម្រាបថា ជំនួបពិភាក្សាការងារនេះមានការចូលរួមពី អគ្គនាយករងនៃអគ្គនាយកដ្ឋានកិច្ចការបច្ចេកទេស នាយកដ្ឋានឧតុនិយម នាយកដ្ឋានជលសាស្រ្ត និងការងារទន្លេ និងមន្ត្រីជំនាញជាន់ខ្ពស់ក្រសួង ព្រមទាំងលោក Bouchane Aaron Evan នាយកប្រចាំប្រទេស លោក Cassinerio Alessandro ប្រធានកម្មវិធីប្រចាំប្រទេស លោក Laube Lukáš ទីប្រឹក្សាថ្នាក់តំបន់ និងមន្ត្រីបច្ចេកទេសនៃអង្គការ PIN សរុបចំនួន ១៥នាក់។

ឯកឧត្តមអនុរដ្ឋលេខាធិការបានបញ្ជាក់ឱ្យដឹងថា គោលបំណងនៃជំនួបពិភាក្សាការងារនាពេលនេះ គឺដើម្បីពិភាក្សាទៅលើកិច្ចការងារស្តីពីការចាប៉ដៃគូសហការ ការពង្រឹងការតាមដាន និងបច្ចេកទេសនៃការព្យាករគ្រោះទឹកជំនន់ ក៏ដូចជាការអភិវឌ្ឍបន្ថែមទៅលើឧបករណ៍ទេពមច្ឆានៃប្រព័ន្ធប្រកាសឱ្យដឹងមុន ១២៩៤ របស់កម្ពុជា។

ក្នុងឱកាសនោះ ឯកឧត្តមអនុរដ្ឋលេខាធិការបានគូសបញ្ជាក់ថា ក្រសួងធនធានទឹក និងឧតុនិយមនឹងបន្តពង្រឹងកិច្ចសហប្រតិបត្តិការយ៉ាងជិតស្និទ្ធជាមួយអង្គការ PIN លើវិស័យធនធានទឹក និងឧតុនិយម ជាពិសេសគាំទ្រចំពោះការពង្រឹងការតាមដាន ការព្យាករគ្រោះទឹកជំនន់ និងប្រព័ន្ធប្រកាសឱ្យដឹងមុន ១២៩៤ នៅកម្ពុជា និងការកសាងឱកាសរកមូលនិធិធ្វើការរួមគ្នា។

សូមបញ្ជាក់ថា អង្គការ People in Need (PIN) បាននឹងកំពុងកសាងភាពធន់របស់ សហគមន៍មូលដ្ឋានដើម្បីជួយដោះស្រាយបញ្ហាគ្រោះមហន្តរាយ និងជួយគាំទ្រនៅពេលដែលពួកគាត់រងផលប៉ះពាល់ដោយសារគ្រោះមហន្តរាយ តាមរយៈការបង្កើតប្រព័ន្ធប្រកាសឱ្យដឹងមុន១២៩៤ ដែលផ្តល់ព័ត៌មានជាមុនអំពីគ្រោះមហន្តរាយដែលនឹងកើតឡើងនាពេលខាងមុខ។ ប្រព័ន្ធប្រកាសឱ្យដឹងមុន១២៩៤ បាននិងកំពុងបន្តនូវការអនុវត្តវិធីសាស្រ្តប្រកបដោយភាពច្នៃប្រឌិត និងពង្រីកមុខងាររបស់ខ្លួនឱ្យកាន់តែងាយស្រួលសម្រាប់សហគមន៍ទាំងអស់ទូទាំងប្រទេសក្នុងប្រទេសកម្ពុជា៕