ភ្នំពេញ៖ ឯកឧត្តម សរ សុពុត្រា អភិបាល នៃគណៈអភិបាលខេត្តស្ទឹងត្រែង បានលើកទឹកចិត្តប្រជាពលរដ្ឋនៅឃុំស្រែគរជាង១.០០០គ្រួសារ ឱ្យបង្កើនធ្វើការងារកសិកម្មបន្តទៀតក្នុងពេលដែលឆ្នាំ២០២៣ កន្លងមកនេះ បងប្អូនយើងរកប្រាក់ចំណូលបានជាងមួយលានដុល្លារ សម្រាប់បង្កើនជីវភាពរស់នៅ។
ក្នុងពិធីសម្ពោធផ្លូវនៅឃុំស្រែគរក្នុងស្រុកសេសានខេត្តស្ទឹងត្រែង នាថ្ងៃទី១៣ ខែធ្នូ ឆ្នាំ២០២៤នេះ ឯកឧត្តមអភិបាលខេត្ត បានមានប្រសាសន៍ថា ប្រជាពលរដ្ឋនៅឃុំស្រែគរ ជាគំរូក្នុងការធ្វើដំណាំកសិកម្ម និងរកបានប្រាក់ចំណូលបានច្រើនជាងបណ្តាឃុំផ្សេងៗទៀតនៅខេត្តស្ទឹងត្រែង ដែលជាផ្នែកមួយបានលើកកម្ពស់ ជីវភាពក្នុងការចិញ្ចឹមគ្រួសារបានធូរធារ។
ឯកឧត្តមអភិបាលខេត្ត បានបន្ថែមថា ផលប្រយោជន៍ដ៍សំខាន់នេះ ពុកម៉ែបងប្អូនត្រូវប្រឹងប្រែង បន្តទៀត ក្នុងការពង្រីកជីវភាពគ្រួសាររបស់យើងតាមរយៈការបង្កបង្កើនផល កុំទុកដីឲ្យទំនេរ ព្រោះយើងទទួលបាន របបគោលនយោបាយពីរាជរដ្ឋាភិបាល បានទាំង ដីលំនៅឋាន និងដីកសិកម្ម។
អញ្ចឹងឱកាសការងារក៏មានឱកាសរកទទួលទានក៏មានហើយ ធ្វើម៉េចមួយទៀតជំរុញឲ្យកូនៗ ដើម្បីឲ្យជីវភាពយើងកាន់តែធូរធារទៀត ត្រូវតែជំរុញកូនៗយើងនេះឲ្យបានទៅរៀននៅតាមសាលា កុំឲ្យគាត់បោះបង់ចោលសាលាក្រោមរូបភាព ពុកម៉ែទៅចំការ ទុកកូនធំឲ្យនៅមើលកូនតូច កូនធំគ្នាអត់បានរៀន តើសសរទ្រូងរបស់គ្រួសារយើងទៅជាយ៉ាងណា។
លោក សុវណ្ណ ពិសេដ្ឋ អភិបាលស្រុកសេសាន បានបញ្ជាក់ថា កាតព្វកិច្ចនេះអាជ្ញាធរស្រុក ឃុំតែងតែអប់រំប្រជាពលរដ្ឋយើងជារឿយៗរួចមកហើយ ជាមួយនេះស្រុកសេសានបានកំណត់យកឃុំស្រែគរធ្វើជាឃុំគំរូ ក្នុងចំណោមឃុំចំនួន០៧ ព្រោះប្រជាពលរដ្ឋជាង១.០០០គ្រួសារនេះ មានភាពឧស្សាហ៍ព្យាយាមទាំងការងារបង្កបង្កើនផល និងការចូលរួមក្នុងកិច្ចការសង្គមផងដែរ។
លោក ហ្វឿន ជឿន តំណាងឱ្យប្រជាពលរដ្ឋឃុំស្រែគរ បានបញ្ជាក់ថា នេះជាការលើកទឹកចិត្តដល់ប្រជាពលរដ្ឋឱ្យកាន់តែខិតខំប្រឹងប្រែងបន្ត ដើម្បីលើកកម្ពស់ទាំងផ្នែកសន្តិសុខស្បៀង និងការពង្រឹងកាងារអនុវត្តគោលនយោបាយភូមិឃុំសង្កាត់មានសុវត្ថិភាព ឱ្យកាន់តែមានប្រសិទ្ធភាពប្រសើរឡើង។
សូមបញ្ចាក់ថា៖ ប្រជាពលរដ្ឋឃុំស្រែគរបច្ចុប្បន្នមានជីវភាពរីកចម្រើនជាងឆ្នាំកន្លងមក បន្ទាប់ពីអាជ្ញាធរមូលដ្ឋាន បានរៀបចំឱ្យមានគ្រប់ហេដ្ឋារចនាសម្ព័ន្ធ ស្រមតាមយុទ្ធសាស្ត្របញ្ជកោណរបស់រាជរដ្ឋាភិបាល ជាក់ស្តែងផ្លូវដែលសម្ពោធដាក់ឱ្យប្រើប្រាស់ពេលនេះ មានប្រវែងជាង៧គីឡូម៉ែត្របន្ថែមទៀតសម្រាប់ធ្វើចរាចរណ៍ឆ្ពោះទៅកាន់តំបន់អភិវឌ្ឍលំនៅដ្ខាន និងផ្នែកវិស័យកសិកម្ម ៕
