អគ្គនាយករង ប.ស.ស. អញ្ជើញបើកវគ្គបណ្ដុះបណ្ដាលស្ដីពី “ការអនុវត្តថវិកាតាមនីតិវីធី និងការគ្រប់គ្រងហិរញ្ញវត្ថុ”

ភ្នំពេញ៖ ឯកឧត្តមបណ្ឌិត ហេង សុផាន់ណារិទ្ធ អគ្គនាយករង ប.ស.ស. តំណាង ឯកឧត្តម ម៉េង ហុង ប្រតិភូរាជរដ្ឋាភិបាលទទួលបន្ទុកជាអគ្គនាយក ប.ស.ស. នៃក្រសួងការងារ និងបណ្ដុះបណ្ដាលវិជ្ជាជីវ: នាថ្ងៃទី១២ ខែធ្នូ ឆ្នាំ២០២៤នេះ បានអញ្ជើញជាអធិបតីបើកវគ្គបណ្ដុះបណ្ដាលស្ដីពី “ការអនុវត្តថវិកាតាមនីតិវីធី និងការគ្រប់គ្រងហិរញ្ញវត្ថុ” នៅទីស្នាក់ការកណ្ដាល ប.ស.ស. រាជធានីភ្នំពេញ ដោយមានការចូលរួមពីថ្នាក់ដឹកនាំ មន្ត្រី និងបុគ្គលិក របស់នាយកដ្ឋានគ្រប់គ្រងថវិកា ហិរញ្ញវត្ថុ និងគណនេយ្យ នៃបេឡាជាតិសន្តិសុខសង្គម ប្រមាណជាង២០រូប។

តាមរយៈវគ្គបណ្ដុះបណ្ដាលនេះ ឯកឧត្តមបណ្ឌិតអគ្គនាយករង សង្ឃឹម និងជឿជាក់យ៉ាងមុតមាំថា ថ្នាក់ដឹកនាំ មន្ត្រី និងបុគ្គលិករបស់នាយកដ្ឋានគ្រប់គ្រងថវិកា ហិរញ្ញវត្ថុ និងគណនេយ្យ ទាំងអស់ នឹងយកចិត្តទុកដាក់ស្ដាប់ការធ្វើបទបង្ហាញ និងសាកសួរទៅកាន់គ្រូឧទ្ទេស ឱ្យបានផុសផុល ដើម្បីទទួលបានចំណេះដឹង និងបទពិសោធន៍ថ្មីៗ យកទៅបំពេញការងារក្នុងអង្គភាព ប្រកបដោយប្រសិទ្ធភាព និងបន្តចែករំលែកចំណេះដឹងទៅដល់ក្រុមការងារផ្សេងៗទៀត។

សូមបញ្ជាក់ថា វគ្គបណ្ដុះបណ្ដាលខាងលើមានការធ្វើបទបង្ហាញដោយលោក ជា ម៉េង ប្រធានការិយាល័យ នៃអគ្គនាយកដ្ឋានថវិកា និងលោក ស៊ុន សុវណ្ណសាល អនុប្រធានការិយាល័យ នៃអគ្គនាយកដ្ឋានថវិកា នៃក្រសួងសេដ្ឋកិច្ច និងហិញ្ញវត្ថុ៕