បក្សប្រឆាំងកូរ៉េខាងត្បូង ជំរុញឱ្យមានការបោះឆ្នោតទម្លាក់តំណែងប្រធានាធិបតីម្ដងទៀត ខណៈការតវ៉ានៅតែបន្ត

សេអ៊ូល៖ មេដឹកនាំគណបក្សកាន់អំណាចរបស់កូរ៉េខាងត្បូង បានលើកឡើងនៅថ្ងៃអាទិត្យទី៨ ខែធ្នូថា នៅទីបំផុតប្រធានាធិបតីនឹងចុះចេញពីតំណែង។ ការលើកឡើងនេះធ្វើឡើងបន្ទាប់ពីការបោះឆ្នោតទម្លាក់ប្រធានាធិបតីកូរ៉េខាងត្បូង លោក យូន ស៊ុកយុល ចេញតំណែងនៅក្នុងសភាកាលពីថ្ងៃសៅរ៍ទី៧ ខែធ្នូបានបរាជ័យ។ ស្របពេលដែល គណបក្ស​ប្រឆាំង​ជំរុញ​ឱ្យមានការ​បោះឆ្នោតទម្លាក់តំណែងប្រធានាធិបតីសាជាថ្មី។

គណបក្សអំណាចប្រជាជនរបស់លោក យូន ស៊ុកយុល បានធ្វើពហិការមិនចូលរួមការបោះឆ្នោតដកតំណែង ដែលបានដាក់ចេញដោយគណបក្សប្រជាធិបតេយ្យដែលជាបក្សប្រឆាំងដ៏សំខាន់ ហើយចលនានេះត្រូវបានលុបចោល បន្ទាប់ពីសមាជិកសភាមិនគ្រប់គ្រាន់បានចូលរួម។

ក្រោយបរាជ័យលើកទី១ គណបក្សប្រជាធិបតេយ្យដែលជាបក្សប្រឆាំង បានបញ្ជាក់កាលពីថ្ងៃអាទិត្យថា ខ្លួននឹងព្យាយាមម្ដងទៀតដើម្បីទម្លាក់លោកប្រធានាធិបតីចេញពីតំណែង។

លោក លី ជេម្យុង (Lee Jae-myung) មេដឹកនាំបក្សប្រឆាំងនេះ បាននិយាយកាលពីថ្ងៃអាទិត្យថា ពួកគេនឹងព្យាយាមម្ដងទៀតនៅថ្ងៃទី១៤ ខែធ្នូ។

លោក លី បានប្រាប់អ្នកយកព័ត៌មានថា លោក យូន ដែលជាពិរុទ្ធជនចម្បងនៅពីក្រោយការបះបោរ និងរដ្ឋប្រហារយោធាដែលបានបំផ្លាញសណ្តាប់ធ្នាប់រដ្ឋធម្មនុញ្ញរបស់កូរ៉េខាងត្បូង ត្រូវតែលាលែងពីតំណែងភ្លាមៗ ឬដកតំណែងដោយមិនបង្អង់យូរ។

ទោះយ៉ាងណាក៏ដោយ បន្ទាប់ពីការបោះឆ្នោត មេដឹកនាំអំណាចប្រជាជន លោក ហាន់ ដុងហូន (Han Dong-hoon) បានឲ្យដឹងថា គណបក្សបានសម្រេចចិត្តថា លោក យូន នឹងលាលែងពីតំណែង។ លោក ហាន បានប្រាប់អ្នកយកព័ត៌មានថា ការប្រកាសច្បាប់អាជ្ញាសឹកគឺជាការបំពានយ៉ាងច្បាស់លាស់ និងធ្ងន់ធ្ងរនៃច្បាប់។

ក្នុងអំឡុងពេលសន្និសីទសារព័ត៌មានរួមគ្នាជាមួយនាយករដ្ឋមន្ត្រី ហាន់ ដុក-សូ (Han Duck-soo) កាលពីថ្ងៃអាទិត្យ លោក ហាន បាននិយាយថា លោក យូន នឹងមិនពាក់ព័ន្ធនឹងកិច្ចការបរទេស និងកិច្ចការរដ្ឋផ្សេងទៀត។

នៅក្នុងសុន្ទរកថាខ្លីមួយទៅកាន់ប្រទេសជាតិ លោក យូន បានសុំទោសចំពោះការប្រកាសប្រើច្បាប់អាជ្ញាសឹក ដោយនិយាយថា វាត្រូវបានធ្វើឡើងចេញពីការអស់សង្ឃឹមរបស់គាត់ក្នុងនាមជាប្រធានាធិបតី។

លោកបានបន្តថា លោកមានការសោកស្ដាយយ៉ាងខ្លាំង និងសូមអភ័យទោសដោយស្មោះចំពោះប្រជាពលរដ្ឋ ដោយបន្ថែមថាលោកបានបណ្តាលឱ្យមានការថប់បារម្ភ និងការរអាក់រអួលដល់ពលរដ្ឋកូរ៉េខាងត្បូង។ មិនត្រឹមតែប៉ុណ្ណោះ លោកបានសន្យាថានឹងមិនប្រកាសប្រើច្បាប់អាជ្ញាសឹកជាលើកទី២ ឡើយ។

លោក យូន បានបន្ថែមថា លោកប្រគល់ការគ្រប់គ្រងរដ្ឋាភិបាលទៅឱ្យគណបក្សកាន់អំណាច ហើយនឹងអនុញ្ញាតឱ្យគណបក្សជាអ្នកសម្រេចកិច្ចការផ្សេងៗ។

ប្រជាជនកូរ៉េខាងត្បូងបន្តប្រមូលផ្តុំគ្នានៅក្នុងរដ្ឋធានីសេអ៊ូល ដើម្បីតវ៉ាប្រឆាំងនឹងលោកប្រធានាធិបតី យូន។ ប៉ូលិសបានប៉ាន់ប្រមាណថាមានមនុស្សប្រហែល ១០០.០០០នាក់បានចូលរួមក្នុងការតវ៉ា។ ដោយមិនគិតពីស្ថានភាពនយោបាយ ប៉ូលិសកំពុងស៊ើបអង្កេតលើលោក យូន និងអ្នកផ្សេងទៀតសម្រាប់ការចោទប្រកាន់ថាបានបង្កឱ្យមានការបះបោរ។

កាលពីព្រឹកថ្ងៃអាទិត្យ ប៉ូលិសបានចាប់ខ្លួន លោក គីម យ៉ុងយ៉ុន (Kim Yong-hyun) ដែលបានលាលែងពីតំណែងជារដ្ឋមន្ត្រីការពារជាតិកាលពីសប្តាហ៍មុន។

ទន្ទឹមនឹងនោះ ការិយាល័យរបស់លោក យូន បានបង្ហាញថា រដ្ឋមន្ត្រីក្រសួងមហាផ្ទៃលោក លី សាងមីន (Lee Sang-min) កាលពីថ្ងៃអាទិត្យ បានដាក់ពាក្យលាលែងពីតំណែង។