សម្តេចតេជោ ហ៊ុន សែន បញ្ចប់ដំណើរទស្សនកិច្ចមិត្តភាព និងផ្លូវការនៅចិន ប្រកបដោយលទ្ធផលផ្លែផ្កា

ភ្នំពេញ៖ សម្តេចអគ្គមហាសេនាបតីតេជោ ហ៊ុន សែន ប្រធានគណបក្សប្រជាជនកម្ពុជា និងជាប្រធាន ព្រឹទ្ធសភានៃព្រះរាជាណាចក្រកម្ពុជា បានបញ្ចប់ប្រកបដោយលទ្ធផលផ្លែផ្កានូវទស្សនកិច្ចមិត្តភាពនិង ផ្លូវការនៅសាធារណរដ្ឋប្រជាមានិតចិន ពីថ្ងៃទី២ ដល់ថ្ងៃទី៤ ខែធ្នូ ឆ្នាំ២០២៤ ។ នៅក្នុងឱកាស ទស្សនកិច្ចនេះ សម្តេចតេជោ ហ៊ុន សែន បានជួបពិភាក្សាទ្វេភាគីជាមួយ ឯកឧត្តម ស៊ី ជីនពីង អគ្គលេខាធិការបក្សកុម្មុយនីស្តចិន និងជាប្រធានាធិបតីចិន ហើយក៏មានជំនួបដាច់ដោយឡែកផងដែរ ជាមួយ ឯកឧត្តម វ៉ាង ហ៊ូនីង ប្រធានសភាប្រឹក្សានយោបាយប្រជាជនចិន និងឯកឧត្តម ចាវ ឡឺជី ប្រធានសភាតំណាងប្រជាជនចិន។

ក្នុងជំនួបទាំងបីខាងលើ សម្តេចតេជោ និងថ្នាក់ដឹកនាំចិន បានសម្តែងការពេញចិត្តចំពោះ វឌ្ឍនភាពនៃទំនាក់ទំនងកម្ពុជា-ចិន ក្នុងនាមជាដៃគូយុទ្ធសាស្ត្រគ្រប់ជ្រុងជ្រោយ និងជាមិត្តដែកថែប ដែលកំពុងកសាងសហគមន៍វាសនារួមកម្ពុជា-ចិន ក្នុងយុគសម័យថ្មី ប្រកបដោយគុណភាពខ្ពស់ កម្រិតខ្ពស់ និងស្តង់ដារខ្ពស់។ ភាគីទាំងពីរយល់ស្របគ្នាអំពីសារៈសំខាន់នៃការបន្តប្រាស្រ័យទាក់ទង យ៉ាងជិតស្និទ្ធ និងការផ្លាស់ប្តូរទស្សនកិច្ចញឹកញាប់គ្រប់ជាន់ថ្នាក់ រវាងថ្នាក់ដឹកនាំគណបក្ស រដ្ឋាភិបាល ស្ថាប័ននីតិប្បញ្ញត្តិ និងនីតិប្រតិបត្តិនៃប្រទេសទាំងពីរ ដើម្បីពង្រឹងទំនុកចិត្តផ្នែកនយោបាយ ដែល កសាងឡើងដោយថ្នាក់ដឹកនាំជំនាន់មុនៗ។ ភាគីចិនបានបញ្ជាក់ជាថ្មីអំពីការគាំទ្រគណបក្សប្រជាជន កម្ពុជា និងរាជរដ្ឋាភិបាលកម្ពុជាក្នុងការជ្រើសរើសមាគ៌ាអភិវឌ្ឍដែលសមស្របតាមបរិបទរបស់កម្ពុជា។ សម្តេចតេជោបានបញ្ជាក់ជាថ្មីផងដែរថា កម្ពុជាប្រកាន់ខ្ជាប់ឥតប្រែប្រួលនូវគោលនយោបាយ ចិនមួយ ដោយចាត់ទុកបញ្ហាហុងកុង តៃវ៉ាន់ ទីបេ និងស៊ីនជាំង ជាកិច្ចការផ្ទៃក្នុងចិន។

ថ្នាក់ដឹកនាំចិនសន្យាបន្តផ្តល់ជំនួយឥតសំណង កម្ចីសម្បទាន បង្កើនវិនិយោគ និងជំរុញ កិច្ចសហប្រតិបត្តិការសេដ្ឋកិច្ចឱ្យកាន់តែរឹងមាំខ្លាំងក្លាជាមួយកម្ពុជា និងបានឯកភាពជាមួយសម្តេចតេជោ ជំរុញការបន្សំគ្នារវាងគំនិតផ្តួចផ្តើមខ្សែក្រវាត់ និងផ្លូវ និងយុទ្ធសាស្ត្របញ្ចកោណរបស់កម្ពុជា ដើម្បី កិច្ចសហប្រតិបត្តិការឈ្នះ-ឈ្នះ។ កម្ពុជា និងចិនប្តេជ្ញាអនុវត្តឲ្យមានប្រសិទ្ធភាពនូវកិច្ចសហប្រតិបត្តិការត្បូងពេជ្រ ដែលផ្តោតលើវិស័យគន្លឹះចំនួន៦ ក្នុងនោះមានគម្រោងដែលបានឯកភាពគ្នារួចហើយ ដូចជា ការបង្កើតច្រករបៀងឧស្សាហកម្ម និងបច្ចេកវិទ្យា ច្រករបៀងអង្ករ និងមច្ឆា ការអភិវឌ្ឍកសិកម្មទំនើប ថាមពលបៃតង ហេដ្ឋារចនាសម្ព័ន្ធដឹកជញ្ជូន សុខាភិបាល និងទំនើបកម្មបច្ចេកវិទ្យា។ ក្នុងគោលដៅ ពង្រឹងការតភ្ជាប់រវាងប្រជាជន និងប្រជាជន ភាគីទាំងពីរនឹងលើកទឹកចិត្តឲ្យស្ថាប័នពាក់ព័ន្ធខិតខំបង្កើន ទំនាក់ទំនងទេសចរណ៍ និងវប្បធម៌ កិច្ចសហប្រតិបត្តិការអប់រំបណ្តុះបណ្តាល និងការផ្លាស់ប្តូរ គណៈប្រតិភូយុវជន ។

ការពង្រឹងបន្ថែមកិច្ចសហប្រតិបត្តិការផ្នែកការពារជាតិ និងសន្តិសុខ ដែលរួមមាន ការបង្ក្រាប បទល្មើសតាមប្រព័ន្ធបច្ចេកវិទ្យាព័ត៌មាន ការជួញដូរមនុស្ស និងគ្រឿងញៀន និងឧក្រិដ្ឋកម្មឆ្លងដែន ឯទៀតត្រូវបានចាត់ទុកថាជាអាទិភាពសំខាន់ផងដែរ ដើម្បីរក្សាភាពសុខដុម និងសន្តិសុខជាតិនៃ ប្រទេសទាំងពីរ។ សម្តេចតេជោ និងថ្នាក់ដឹកនាំចិនបានសង្កត់ធ្ងន់ពីសារៈសំខាន់នៃកិច្ចសហប្រតិបត្តិការ កាន់តែប្រសើរក្នុងក្របខ័ណ្ឌតំបន់ និងអន្តរជាតិ ដើម្បីការពារផលប្រយោជន៍ស្នូលនៃប្រទេសទាំងពីរ និងលើកកម្ពស់កិច្ចសហប្រតិបត្តិការពហុភាគីដើម្បីលើកស្ទួយសន្តិភាព សន្តិសុខ ស្ថិរភាព និងវិបុលភាព នៅក្នុងតំបន់ និងពិភពលោក។

សម្តេចតេជោបានពាំនាំនូវព្រះរាជបណ្តាំសួរសុខទុក្ខពី ព្រះករុណា ព្រះមហាក្សត្រនៃ ព្រះរាជាណាចក្រកម្ពុជា ជូនចំពោះឯកឧត្តមប្រធានាធិបតី ស៊ី ជីនពីង និងថ្នាក់ដឹកនាំចិនទាំងអស់ ហើយបានទទួលបណ្តាំសួរសុខទុក្ខពីថ្នាក់ដឹកនាំចិន ថ្វាយព្រះករុណា ព្រះមហាក្សត្រ ជាអម្ចាស់ជីវិត លើត្បូងផងដែរ។ ឯកឧត្តម ស៊ី ជីនពីង ក៏ដូចជាឯកឧត្តម ចាវ ឡឺជី និងឯកឧត្តម វ៉ាង ហ៊ូនីង បានទទួល យកការអញ្ជើញរបស់សម្តេចតេជោ ដើម្បីបំពេញទស្សនកិច្ចផ្លូវការនៅកម្ពុជា តាមពេលវេលាសមស្រប។
នាឱកាសស្នាក់នៅទីក្រុងប៉េកាំង សម្តេចអគ្គមហាសេនាបតីតេជោ ហ៊ុន សែន បានអញ្ជើញទៅ ទស្សនាសាលារដ្ឋបាលជាតិនៃគណៈកម្មាធិការមជ្ឈិមបក្សកុម្មុយនីស្តចិន និងសាលពិព័រណ៌ប្រវត្តិសាស្ត្រ ១០០ឆ្នាំនៃគណបក្សកុម្មុយនីស្តចិន៕

ខាងក្រោមនេះអត្ថបទសំខាន់ នៃដំណើរបំពេញទស្សនកិច្ចនៅចិន ប្រកបផដោយផ្លែផ្កា របស់សម្ដេចតេជោ ហ៊ុន សែន៖

១.សម្ដេចតេជោ៖ ចិនបានផ្ដល់នូវការគាំទ្រ និងជំនួយមិនត្រឹមតែដល់ការអភិវឌ្ឍសង្គម សេដ្ឋកិច្ចប៉ុណ្ណោះនោះទេ ប៉ុន្តែបានគាំទ្រដល់ឯករាជ្យភាពខាងនយោបាយរបស់កម្ពុជាផងដែរ
https://www.hotnews-asia.com/detail/431008

២.ប្រធានសភាប្រឹក្សានយោបាយប្រជាជនចិន៖ សម្តេចតេជោ ជាមិត្តល្អរបស់ប្រទេសចិន និងប្រជាជនចិន
https://www.hotnews-asia.com/detail/431031

៣.សម្តេចតេជោ ហ៊ុន សែន និងគណៈប្រតិភូជាន់ខ្ពស់កម្ពុជា អញ្ជើញទស្សនកិច្ចសាលារដ្ឋបាលជាតិ នៃគណៈកម្មាធិការមជ្ឈឹមបក្សកុម្មុយនីស្តចិន
https://www.hotnews-asia.com/detail/431147
៤.សម្តេចតេជោ៖ សាលារដ្ឋបាលជាតិ នៃគណៈកម្មាធិការមជ្ឈឹមបក្សកុម្មុយនីស្តចិន ពិតជាបានរួមចំណែកដ៏ធំ ធ្វើឲ្យចិនសម្រេចបាន នូវគោលដៅសហសវត្ស ១០០ឆ្នាំទី១របស់ខ្លួន
https://www.hotnews-asia.com/detail/431325

៥.សម្ដេចតេជោ ស្នើឱ្យមានកិច្ចសហប្រតិបត្តិការ និងការផ្លាស់ប្ដូរទស្សនកិច្ចរវាងសាលាគណបក្សនៃគណៈកម្មាធិការមជ្ឈិមបក្សកុម្មុយនិស្តចិន ជាមួយគណបក្សប្រជាជនកម្ពុជា តាមរយៈការបញ្ជូនកម្មសិក្សាការីរបស់កម្ពុជា
https://www.hotnews-asia.com/detail/431542

៦.សម្តេចតេជោ ហ៊ុន សែន ជួបពិភាក្សាការងារជាមួយប្រធានាធិបតីចិន
https://www.hotnews-asia.com/detail/431552

៧.ប្រធានាធិបតីចិន៖ ចិន និងកម្ពុជា នឹងបន្តពង្រឹង ការគាំទ្រគ្នាទៅវិញទៅមក ក្នុងនាមជាមិត្តដែកថែប ដើម្បីការពារផលប្រយោជន៍ស្នូលនៃប្រទេសទាំងពីរ
https://www.hotnews-asia.com/detail/431992

៨.ប្រធានគណៈកម្មាធិការអចិន្ត្រៃយ៍ នៃសភាតំណាងប្រជាជនចិន៖ ប្រទេសចិន គាំទ្រគណបក្សប្រជាជនកម្ពុជា ឱ្យកាន់អំណាចរយៈពេលវែង
https://www.hotnews-asia.com/detail/432713