នាយករដ្ឋមន្ត្រីកម្ពុជា៖ វិវាទបុរី ជារឿងថ្មី និងជាបញ្ហាដែលរសើបបំផុត ទាមទារឲ្យដោះស្រាយដោយមានភាពបត់បែន យោគយល់គ្នា និងភាពអំណត់
ភ្នំពេញ៖ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា បានបញ្ជាក់ថា ទំនាស់ដីធ្លី គឺជារឿងចាស់ដែលមានពីមុនមក ប៉ុន្តែវិវាទបុរី គឺជារឿងថ្មី ដែលប្រវត្តិសាស្ត្រមិនដែលមាន ក្នុងទ្រង់ទ្រាយធំបែបនេះ ខណៈបញ្ហានេះ គឺជាបញ្ហាដែលរសើបបំផុត ទាមទារឱ្យដោះស្រាយដោយមានភាពបត់បែន យោគយល់គ្នា និងភាពអំណត់ ។
ក្នុងឱកាសអញ្ជើញបិទសន្និបាត បូកសរុបលទ្ធផលការងារប្រចាំឆ្នាំ២០២៤ និងលើកទិសដៅការងារបន្ត របស់ក្រសួងរៀបចំដែនដី នគរូបនីយកម្ម និងសំណង់ នាថ្ងៃទី២៦ ខែវិច្ឆិកា ឆ្នាំ២០២៤នេះ សម្តេចធិបតី ហ៊ុន ម៉ាណែត មានប្រសាសន៍ថា «ទំនាស់ដីធ្លី គឺជារឿងចាស់ ដែលពីមុនមក ប៉ុន្តែវិវាទបុរី គឺជារឿងថ្មី ប្រវត្តិសាស្ត្រប្រទេសយើងអត់ដែលមានទេ នៅក្នុងទ្រង់ទ្រាយធំបែបនេះ ពីឆ្នាំ៩៧ខ្ញុំចាំ ពេលដែលមានវិបត្តិហិរញ្ញវត្ថុនៅអាស៊ីអាគ្នេយ៍ និងវិបត្តិអចលនទ្រព្យនៅក្នុងប្រទេសថៃ កម្ពុជាអត់មានបញ្ហាទេ ព្រោះកាលនោះ កាលទិញលក់អចលនទ្រព្យអត់មានច្រើនទេ មានប្រាកដណាស់ ពីដើមអាណត្តិ មានជនជាតិផ្សេងគេមកវិនិយោគទិញលក់អីទៅ ប៉ុន្តែខ្មែរយើងមិនទាន់មាន ហើយទិញពេលនោះ គឺអត់មានទិញខ្ជីធនាគារទេ ពេលនោះភាគច្រើនប្រើលុយសុទ្ធ ចឹងវិបត្តិអីវិបត្តិទៅអត់មានបញ្ហាប៉ុន្មានទេ ហើយយើងក៏មិនប៉ះពាល់ច្រើន ប៉ុន្តែលើកនេះ គឺមានទំហំធំ» ។
សម្តេចធិបតី មើលឃើញថា ដោយសារបញ្ហាកូវីដ ដែលមិនអាចប៉ានស្មានជាមុនបាននេះហើយ ទើបធ្វើឱ្យស្ថានភាព វិស័យអចលនទ្រព្យ មានការធ្លាក់ចុះជាខ្លាំង នាំឱ្យម្ចាស់គម្រោងបុរីមួយចំនួន ដែលកំពុងចាប់យកឱកាសវិនិយោគលើវិស័យនេះ ជួបវិបត្តិ ។
សម្តេចធិបតី បញ្ជាក់ថា «បញ្ហានេះ គឺជាបញ្ហាដែលរសើបបំផុត បញ្ហាដែលត្រូវដោះដោយមានភាពបត់បែន បញ្ហាត្រូវដោះដោយភាពយោគយល់គ្នា និងភាពអំណត់ ។ ខ្ញុំចែកជាពីរ បុរីដែលធ្វើពិត មានចេតនាពិត គ្រាន់តែបញ្ហាប្រឈមការវាយតម្លៃខុស និងបុរីដែលមានចេតនាបោកប្រាស់ អានឹងគេហៅឆបោក ខ្លះអត់មានបុរីផង» ។
សម្តេចធិបតី បានថ្លែងអំណរគុណចំពោះអាជ្ញាធរ និងស្ថាប័នពាក់ព័ន្ធ ដែលខិតខំធ្វើកិច្ចការងារដោះស្រាយនេះ ដោយភាពអត់ធ្មត់និងប្រសិទ្ធភាព ដោយសម្តេចយល់ឃើញថា បើពុំនោះទៀតសោត មិនដឹងថាត្រូវចាប់ខ្លួនមនុស្សប៉ុន្មាននាក់នោះទេ ចំពោះករណីអចលនទ្រព្យនេះ។
សម្តេចធិបតី មានលើកឡើងថា «ខាងបុរីមួយចំនួនសំណូមពរ ថាត្រូវអនុវត្តច្បាប់ទៅលើអ្នកនេះរឹងកំព្រឹស អតិថិជនមួយចំនួនទាមទារឱ្យអនុវត្តច្បាប់ចាប់ម្ចាស់បុរី ខាងធនាគារមួយចំនួន ថាត្រូវតែអនុវត្តឱ្យរឹងកំព្រឹស អ្នកអត់បង់ត្រូវចាប់ត្រូវអី ខ្ញុំថាហើយ បើរវល់តែចាប់គ្រប់គ្នារលាយហើយ វាបង្កើតនូវភាពកាន់តែរំជើបរំជួល ៩៩គម្រោង បើសិនជាមានបញ្ហា ៩៩គម្រោងមានបញ្ហាទាំង៩៩ហើយយើងចាប់ តើនរណាជាអ្នកដោះ? នេះហើយដែលយើងត្រូវគិតគូ»៕
