តៃប៉ិ៖ ក្រសួងការពារជាតិរបស់កោះតៃវ៉ាន់ នៅថ្ងៃចន្ទទី ២៥ ខែវិច្ឆិកា បានរាយការណ៍ថា បាឡុងចិន១ ត្រូវបានគេប្រទះឃើញ នៅលើសមុទ្រឆ្ពោះទៅភាគខាងជើងរបស់តៃវ៉ាន់ ខណៈនេះជាការលេចវត្តមានលើកដំបូងចាប់តាំងពីខែមេសា។ ក្រុងតៃប៉ិចាត់ទុកការបញ្ជូនបាឡុងរបស់ចិនថាជាការយាយី។
ក្រសួងការពារជាតិតៃវ៉ាន់នៅក្នុងការធ្វើបច្ចុប្បន្នភាពជាប្រចាំរបស់ខ្លួនអំពីសកម្មភាពយោធារបស់ចិនក្នុងរយៈពេល ២៤ ម៉ោងមុន បានបង្ហាញថា បាឡុងតែមួយត្រូវបានរកឃើញនៅម៉ោង ៦:២១ ល្ងាច (ម៉ោងនៅតៃវ៉ាន់) នៅថ្ងៃអាទិត្យ ចម្ងាយ១១១ គីឡូម៉ែត្រ ក្នុងសមុទ្រហោះឆ្ពោះទៅកាន់ភាគខាងជើងនៃកំពង់ផែ Keelung របស់តៃវ៉ាន់។ បន្ទាប់មកវាបានបាត់ខ្លួនក្នុងរយៈពេលពីរម៉ោងក្រោយ ដោយបានហោះហើរក្នុងរយៈកម្ពស់ ១០ ០០០ ម៉ែត្រ ប៉ុន្តែមិនឆ្លងកាត់កោះតៃវ៉ាន់នោះទេ។
ប៉ុន្មានសប្តាហ៍មុនការបោះឆ្នោតប្រធានាធិបតីក្នុងខែមករា តៃវ៉ាន់បានត្អូញត្អែរពីសកម្មភាពបាឡុងរបស់ចិនក្នុងទំហំមិនធ្លាប់មានពីមុនមក។ តៃវ៉ាន់បានពិពណ៌នាអំពីឧប្បត្តិហេតុនេះថាជាផ្នែកនៃយុទ្ធនាការដាក់សម្ពាធរបស់ចិន។ កន្លងមកប្រទេសចិនបានច្រានចោលការត្អូញត្អែររបស់តៃវ៉ាន់អំពីបាឡុង ដោយអះអាងថាវាសម្រាប់គោលបំណងឧតុនិយម និងមិនគួរត្រូវបានបំភាន់ដោយហេតុផលនយោបាយ។
គួរបញ្ជាក់ថា សក្តានុពលសម្រាប់ប្រទេសចិនក្នុងការប្រើប្រាស់បាឡុងសម្រាប់ចារកម្មបានក្លាយជាបញ្ហាសកលកាលពីឆ្នាំមុន នៅពេលដែលសហរដ្ឋអាម៉េរិកបានបាញ់ទម្លាក់នូវអ្វីដែលខ្លួនបានអះអាងថាជាបាឡុងឃ្លាំមើលរបស់ចិន។ យ៉ាងណាមិញ ចិនបកស្រាយថា បាឡុងនោះជាយានស៊ីវិលដែលបានរសាត់ដោយចៃដន្យប៉ុណ្ណោះ៕
