ប្រធានគោលនយោបាយការបរទេស EU អំពាវនាវឲ្យមានសម្ពាធលើក្រុមហេសបូឡា អ៊ីស្រាអែលដើម្បីឈានដល់បទឈប់បាញ់នៅលីបង់
បេរូត៖ ប្រធានគោលនយោបាយការបរទេសរបស់សហភាពអឺរ៉ុប (EU) លោក Josep Borrell បានឲ្យដឹងកាលពីថ្ងៃអាទិត្យថា ក្រុមហេសបូឡា និងអ៊ីស្រាអែលត្រូវតែដាក់សម្ពាធឱ្យទទួលយកសំណើរបស់សហរដ្ឋអាមេរិកសម្រាប់បទឈប់បាញ់ ដោយសន្យាផ្តល់ប្រាក់ចំនួន ២០០លានដុល្លារដល់កងទ័ពលីបង់។
លោក Borrell បានបញ្ជាក់បន្ទាប់ពីកិច្ចប្រជុំរបស់គាត់នៅទីក្រុង Beirut ជាមួយប្រធានសភាលីបង់ លោក Nabih Berri ថាយើងត្រូវតែដាក់សម្ពាធលើរដ្ឋាភិបាលអ៊ីស្រាអែល និងរក្សាសម្ពាធលើក្រុម Hezbollah ដើម្បីទទួលយកសំណើរបស់សហរដ្ឋអាមេរិកសម្រាប់បទឈប់បាញ់។
លោកបានកត់សម្គាល់ថា សំណើនេះកំពុងរង់ចាំជាមួយនឹងកិច្ចព្រមព្រៀងចុងក្រោយជាមួយរដ្ឋាភិបាលអ៊ីស្រាអែល។
ប្រធានគោលនយោបាយការបរទេសរបស់សហភាពអឺរ៉ុប បានបន្តថា សហគមន៍អន្តរជាតិមិនអាចនៅស្ងៀមនៅចំពោះមុខអ្វីដែលកំពុងកើតឡើងនោះទេ ដោយកត់សម្គាល់ថាសហភាពអឺរ៉ុបបានត្រៀមខ្លួនរួចជាស្រេចក្នុងការផ្តល់ថវិកាចំនួន ២០០លានដុល្លារសម្រាប់គាំទ្រដល់កងទ័ពលីបង់។
លោក Borrell ក៏បានជួបជាមួយនាយករដ្ឋមន្ត្រីលីបង់ លោក Najib Mikati ដែលបានសង្កត់ធ្ងន់លើតម្រូវការក្នុងការដាក់សម្ពាធដើម្បីបញ្ឈប់ការឈ្លានពាន របស់អ៊ីស្រាអែលលើលីបង់ និងឈានដល់បទឈប់បាញ់។
លោក Mikati បានបញ្ជាក់ថា ប្រទេសលីបង់កំពុងពឹងផ្អែកលើការគាំទ្ររបស់អឺរ៉ុបដើម្បីជួយវាខាងនយោបាយ និងសេដ្ឋកិច្ច និងដើម្បីពង្រឹងតួនាទីរបស់កងទ័ពលើគ្រប់វិស័យ។
ចាប់តាំងពីថ្ងៃទី២៣ ខែកញ្ញាមក កងទ័ពអ៊ីស្រាអែលបានបង្កើនការវាយប្រហារតាមអាកាសរបស់ខ្លួនលើប្រទេសលីបង់ក្នុងជម្លោះកាន់តែខ្លាំងជាមួយក្រុមហេសបូឡា។ អ៊ីស្រាអែលបានចាប់ផ្តើមប្រតិបត្តិការជើងគោកបន្ថែមទៀតឆ្លងកាត់ព្រំដែនភាគខាងជើងរបស់ខ្លួនចូលក្នុងប្រទេសលីបង់នៅដើមខែតុលា។
