ភ្នំពេញ៖ ក្នុងឱកាសបើកជាផ្លូវការ នៃសម័យប្រជុំពេញអង្គលើកទី១១ នៃសភាអន្តរជាតិ ដើម្បីភាពអត់ឱន និងសន្តិភាព (IPTP) នៅព្រឹកថ្ងៃទី២៤ ខែវិច្ឆិកា ឆ្នាំ២០២៤នេះ សម្តេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភា នៃព្រះរាជាណាចក្រកម្ពុជា បានគូសបញ្ជាក់ថា ដំណើរការកាត់ទោសមេដឹកនាំខ្មែរក្រហម បានបង្ហាញថា របបប្រល័យពូជសាសន៍ ប៉ុល ពត គឺពិតជាមាន។
សម្តេចតេជោ ហ៊ុន សែន បានបញ្ជាក់ថា ការកាត់ទោសខ្មែរក្រហម មានន័យថា កម្ពុជា មានរបបប្រល័យពូជសាសន៍មែន ទើបមានការកាត់ទោសខ្មែរក្រហម។
សម្តេចតេជោ ក៏ប្រាប់ទៅក្រុមប្រទេសមហាអំណាចថា គេមិនគួរលេងតាមរូបមន្ត «១-១ ស្មើសូន្យ» នោះទេ មានន័យថា ថ្កោលទោសទាំងអ្នកវាយប្រហាររបប ប៉ុល ពត ហើយថ្កោលទោសទាំងរបប ប៉ុល ពត នោះទេ។
បន្ថែមពីនោះ សម្តេចតេជោ ហ៊ុន សែន បានលើកឡើងថា បើទទួលស្គាល់កម្ពុជា មានរបបប្រល័យពូជសាសន៍ ហេតុអ្វីក៏កម្ពុជាវាយផ្តួលរំលំប្រល័យពូជសាសន៍មិនបាន។
សម្តេចតេជោ ក៏បានបន្តរំលឹកពីការឈឺចាប់ ចំពោះប្រទេសតាំងខ្លួន ជាជើងឯកប្រជាធិបតេយ្យថា លើលោកក្នុងការបង្កការឈឺចាប់លើកម្ពុជា ទោះបីមានរយៈយូរប៉ុណ្ណា ក៏មានអាចភ្លេចរឿងដ៏ឈឺចាប់នេះបានឡើយ ហើយត្រូវបន្តរំលឹកពួកគេ។
សម្តេចតេជោ បានឲ្យដឹងទៀតថា ក្រោយពេលទ័ពវៀតណាម ដកចេញពីកម្ពុជា បានធ្វើឱ្យសម្តេចមានទម្ងន់ កាន់តែខ្លាំងលើកិច្ចចរចារកសន្តិភាពនៅកម្ពុជា៕
