សម្តេចធិបតី៖ តួនាទីរបស់កម្ពុជា ក្នុងការថែរក្សាសន្តិភាពសកលលោក និងការរំដោះមីន ក្រោមឆ័ត្រ UN បានឆ្លុះបញ្ជាំងពីភាពធន់របស់កម្ពុជា ក្នុងការប្រឈមមុខទៅនឹងអតីតកាលដ៏លំបាក
ភ្នំពេញ៖ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីកម្ពុជា និងប្រធានមហាសន្និបាត ICAPP លើកទី ១២ បានថ្លែងថា តួនាទីរបស់កម្ពុជាក្នុងការថែរក្សាសន្តិភាពសកលសលោក និងការរំដោះមីន ដែលស្ថិតនៅក្រោមឆ័ត្ររបស់អង្គការសហប្រជាជាតិ (UN) បានឆ្លុះបញ្ជាំងពីភាពធន់របស់កម្ពុជាក្នុងការប្រឈមមុខទៅនឹងអតីតកាលដ៏លំបាក និងកំណត់បទដ្ឋានសកលប្រឆាំងនឹងអំពើឃោរឃៅ និងឧក្រិដ្ឋកម្មប្រឆាំងមនុស្សជាតិនាពេលអនាគត ព្រមទាំងការផ្លាស់ប្តូរប្រទេសកម្ពុជា ពីជនរងគ្រោះក្លាយទៅជាអ្នកការពារសន្តិភាពដ៏សកម្ម និងជាប្រទេសរំដោះមីនដែលពិភពលោកទទួលស្គាល់។
ក្នុងឱកាសអញ្ជើញបិទមហាសន្និបាត ICAPP លើកទី១២ ស្តីពីសន្តិភាព និងការផ្សះផ្សា នៅវិមាន៧មករា នាថ្ងៃទី២៣ ខែវិច្ឆិកា ឆ្នាំ២០២៤នេះ។
សម្តេចមហាបវរធិបតី ហ៊ុន ម៉ាណែត បានបន្ថែមទៀតថា បទពិសោធន៍របស់កម្ពុជា បានបង្ហាញឱ្យឃើញពីជម្លោះដែលអាចបញ្ចប់បាន យុត្តិធម៍អន្តរកាលដែលអាចសម្រេចបាន ហើយតំបន់សង្គ្រាមបានប្រែក្លាយជាកន្លែងសន្តិភាព មានការអភិវឌ្ឍ និងមានកិច្ចសហការគ្នា ដែលទាំងអស់នេះអាចសម្រេចបានដោយសារតែមានការខិតខំ និងការប្តេជ្ញាចិត្តឆ្ពោះទៅរកការផ្សះផ្សា និងឈ្នះឈ្នះទាំងសងខាង ព្រមបានដោះស្រាយដោយសន្តិវិធី។
សម្តេចធិបតី បានលើកឡើងថា នៅពេលដែលយើងបានក្រឡេកទៅមើលពីប្រវត្តិសាស្ត្រកម្ពុជា យើងនឹងឃើញថាសន្តិភាពមិនមែនជាការទទួលខុសត្រូវរបស់ប្រទេសជាតិណាតែមួយនោះទេ ពោលគឺជាកិច្ចការរួមគ្នា។ សម្តេច ក៏បានអំពាវនាវដល់ប្រទេស, ស្ថាប័ន និង បុគ្គលទាំងអស់រួមគ្នារក្សា និងស្វែងរកសន្តិភាពយូរអង្វែងផងដែរ៕
សម្តេចធិបតី
