ឧបនាយករដ្ឋមន្ត្រី អូន ព័ន្ធមុនីរ័ត្ន៖ ចាប់តាំងពីដាក់ចេញនូវគោលនយោបាយ រាជរដ្ឋាភិបាលចំណាយថវិកាជាង៤ពាន់លានដុល្លារ លើរបបសន្តិសុខសង្គម

ភ្នំពេញ៖ ឧបនាយករដ្ឋមន្ត្រី អូន ព័ន្ធមុនីរ័ត្ន រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ និងជាប្រធានក្រុមប្រឹក្សាជាតិគាំពារសង្គម បានឱ្យដឹងកាលពីថ្ងៃអង្គារថា ចាប់តាំងពីបង្កើតគោលនយោបាយកិច្ចគាំពារសង្គមរហូតមកទល់នឹងឆ្នាំ២០២៤ រាជរដ្ឋាភិបាល បានចំណាយថវិកាអស់ប្រមាណជាង៤,៣ពាន់លានដុល្លារអាម៉េរិក សម្រាប់ឧបត្ថម្ភដល់ពលរដ្ឋងាយរងគ្រោះ និងពលរដ្ឋក្រីក្រ។

ថ្លែងក្នុងសន្និសីទជាតិស្តីពី៖ សមិទ្ធផលនៃប្រព័ន្ធគាំពារសង្គមកម្ពុជា កាលពីថ្ងៃទី១៩ ខែវិច្ឆិកា កន្លងទៅ ឧបនាយករដ្ឋមន្ត្រី អូន ព័ន្ធមុនីរ័ត្ន បានថ្លែងថា ក្នុងនីតិកាលទី៧នេះ រាជរដ្ឋាភិបាលក្រោមការដឹកនាំរបស់សម្តេចនាយករដ្ឋមន្រ្តី ហ៊ុន ម៉ាណែត នៅតែបន្តជំរុញការអនុវត្តប្រព័ន្ធគាំពារសង្គមបន្ថែមទៀត តាមរយៈការដាក់ចេញនូវយុទ្ធសាស្ត្របញ្ជកោណដំណាក់កាលទី១ ទៅលើការផ្ដល់ការថែទាំសុខភាពឆ្ពោះទៅការគ្របដណ្ដប់សុខភាពជាសកល កម្មវិធីជាតិជំនួយសង្គមផ្នែកបណ្តុះបណ្តាលជំនាញវិជ្ជាជីវៈសម្រាប់យុវជនមកពីគ្រួសារក្រីក្រ និងជំនួយទៅដល់គ្រួសារងាយរងគ្រោះក្នុងពេលមានគ្រោះអាសន្ន។

ឯកឧត្ដមថា មកទល់នឹងពេលបច្ចុប្បន្ន ប្រព័ន្ធគាំពារសង្គមបានរីកកាន់តែធំ ខណៈប្រព័ន្ធគាំពារសង្គមគ្រប់ដណ្ដប់លើពលរដ្ឋជាង៧លាននាក់ និងចំណាយថវិកាសរុបរហូតដល់៤,៣ពាន់លានដុល្លារអាម៉េរិក កើនឡើង៣ដង បើគិតតាំងពីឆ្នាំ២០១៧។

ឯកឧត្ដមបញ្ជាក់ថា៖«វិសាលភាពរបស់ប្រព័ន្ធគាំពារសង្គមបានរីកធំជាងមុនជាង២ដង បើធៀបទៅនឹងឆ្នាំ២០១៧ ដោយបច្ចុប្បន្នប្រព័ន្ធគាំពារសង្គមកំពុងគ្របដណ្ដប់ពលរដ្ឋជាង៧លាននាក់ ខណៈការចំណាយថវិកាជាតិ ក៏បានកើនធំជាងមុនជាង៣ដង នេះបើធៀបទៅនឹងឆ្នាំ២០១៧ [..] បើគិតជារួមទំហំចំណាយថវិកាសរុបលើប្រព័ន្ធគាំពារសង្គមមានចំនួនជាង១៧,៥ទ្រីលានរៀល សមមូលនឹងប្រមាណ៤,៣ប៊ីលានដុល្លារអាម៉េរិក»។

ឯកឧត្ដមបន្ថែមថា ការវិនិយោគលើប្រព័ន្ធគាំពារសង្គមនេះ បាននាំមកនូវអត្ថប្រយោជន៍ជាច្រើនសម្រាប់គ្រួសារ ឬពលរដ្ឋដែលទទួលផល ខណៈជាមធ្យមអ្នកទទួលផលម្នាក់ៗទទួលបាននូវថវិកាប្រមាណ១ពាន់ដុល្លារ។ មួយវិញទៀត លោកថា ប្រព័ន្ធនេះក៏ជាចំណែកក្នុងការចូលរួមកាត់បន្ថយការចំណាយលើសេវាសុខភាព ប្រាក់ឧបត្ថម្ភសម្រាប់គ្រួសារក្រីក្រ និងការអប់រំទៅលើសមាជិកគ្រួសារកាន់តែប្រសើរ។

យ៉ាងណា ដើម្បីជំរុញឱ្យប្រព័ន្ធនេះគ្រប់ដណ្ដប់ឱ្យបានទៅដល់ពលរដ្ឋទាំងអស់ និងលើកកម្ពស់តម្លាភាពឯកឧត្ដមក៏បានអំពាវនាវទៅដល់ភាគីពាក់ព័ន្ធ ជាក់ស្តែង ដូចជាក្រសួងសុខាភិបាល គួរបន្ថែមការយកចិត្តទុកដាក់លើការផ្ដល់សេវាសុខាភិបាលអ្នកជំងឺ ជាពិសេសអ្នកដែលប្រើប្រាស់បណ្ណសមធម៌ ឬបណ្ណ ប.ស.ស ដើម្បីជៀសវាងផលវិបាក។ គួរបញ្ជាក់ថា កាលពីកំលុងខែកុម្ភៈ ឆ្នាំ២០២៤ សម្តេចនាយករដ្ឋមន្ត្រី ហ៊ុន ម៉ាណែត បានឧបត្ថម្ភថវិកាប្រមាណជិត៤៥០លានដុល្លារអាម៉េរិក ដើម្បីគាំទ្រទៅលើប្រព័ន្ធគាំពារសង្គម៕