ឧត្ដមសេនីយ៍ទោ ហេង មករា៖ ការងារហ្វឹកហ្វឺនជាប្រភពកសាងធនធានមនុស្ស ធានាទាំងបរិមាណ និងគុណភាព ឆ្លើយតបទៅនឹងកំណែទម្រង់ របស់កងយោធពលខេមរភូមិន្ទ

ភ្នំពេញ៖ ថ្លែងក្នុងពិធីបិទវគ្គហ្វឹកហ្វឺនបណ្ដុះបណ្ដាលជំនាញប្រឆាំងភេរវកម្ម ជំនាន់ទី៧ វគ្គហ្វឹកហ្វឺនបណ្ដុះបណ្ដាលជំនាញឯកទេសមុជទឹកជំនាន់ទី១០ និងវគ្គហ្វឹកហ្វឺនបណ្ដុះបណ្ដាលជំនាញបើក- ជួសជុលអូប័រ និងរបៀបសង្រ្គោះ ជំនាន់ទី៧ នារសៀលថ្ងៃទី១៣ ខែវិច្ឆិកា ឆ្នាំ២០២៤ នៅបញ្ជាការដ្ឋានទ័ពពិសេសកងទ័ពជើងគោក ឯកឧត្តម ឧត្ដមសេនីយ៍ទោ ហេង មករា មេបញ្ជាការរងកងទ័ពជើងគោក បានចាត់ទុកការងារហ្វឹកហ្វឺនជាប្រភពកសាងធនធានមនុស្ស ធានាបានទាំងបរិមាណ និងគុណភាព ឆ្លើយតបទៅនឹងភារកិច្ចការពារជាតិ និងកំណែទម្រង់របស់កងយោធពលខេមរភូមិន្ទ ។

ឧត្ដមសេនីយ៍ទោ ហេង មករា បានគូសបញក់ជាក់ថា៖ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា ឯកឧត្ដម នាយឧត្ដមសេនីយ៍ ទៀ សីហា ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ ឯកឧត្ដម នាយឧត្ដមសេនីយ៍ វង្ស ពិសេន អគ្គមេបញ្ជាការ នៃកងយោធពលខេមរភូមិន្ទ ឯកឧត្ដម នាយឧត្ដមសេនីយ៍ ម៉ៅ សុផាន់ អគ្គមេបញ្ជាការរង នៃកងយោធពលខេមរភូមិន្ទ មេបញ្ជាការកងទ័ពជើងគោក ជានិច្ចជាកាលបាន រួមចំណែកយ៉ាងសកម្មលើគ្រប់វិស័យ ស្របទៅតាមផែនការកំណែទម្រង់ របស់កងយោធពលខេមរភូមិន្ទ។

ក្នុងនាម នាយឧត្ដមសេនីយ៍ ម៉ៅ សុផាន់ ឧត្ដមសេនីយ៍ទោ ហេង មករា បានថ្លែងកោតសរសើរ និងវាយតម្លៃខ្ពស់ ចំពោះការយកចិត្តទុកដាក់ ខិតខំប្រឹងប្រែង របស់ឯកឧត្តម មេបញ្ជាការ មេបញ្ជាការរង និងថ្នាក់ដឹកនាំគ្រប់លំដាប់ថ្នាក់ នៅក្នុងបញ្ជាការដ្ឋានទ័ពពិសេស ដែលបានសហការ សាមគ្គីឯកភាពជាធ្លុងមួយ ធ្វើឱ្យសម្រេចនូវភារកិច្ចទូទៅ និងដំណើរការហ្វឹកហ្វឺនពីចាប់ផ្តើមរហូតដល់ពេលបញ្ចប់វគ្គ សម្រេចបានលទ្ធផល ប្រកបដោយជោគជ័យ។

ឧត្ដមសេនីយ៍ទោ ហេង មករា បានផ្តាំផ្ញើដល់កម្មសិក្សាការី ដែលបានបញ្ចប់វគ្គនាពេលនេះ ពេលត្រលប់ទៅកាន់អង្គភាពត្រូវ បំពេញតួនាទីឱ្យបានល្អ សាកសមជាយោធិននៃកងយោធពលខេមរភូមិន្ទ យកចំណេះដឹងដែលទទួលបាននេះបំពេញជូនអង្គភាព បម្រើផលប្រយោជន៍ជូនជាតិ មាតុភូមិ និងតស៊ូព្យាយាមហ្វឹកហ្វឺនរៀនសូត្របន្ថែមជាប្រចាំ ដើម្បីជាការក្រើនរំលឹក និងពង្រឹងកាយសម្បទាជាកត្តាសុខភាពខ្លួនផង និងបំពេញនូវសមត្ថភាព ពិសេសខិតខំស្វែងយល់បន្ថែម នូវមុខវិជ្ជាផ្សេងៗ មួយចំនួនទៀតដែលជាតម្រូវការចាំបាច់ ក្នុងការកសាងប្រភពធនធានមនុស្ស ឆ្លើយតបទៅនឹងផែនការ កំណែទម្រង់កងយោធពលខេមរភូមិន្ទ ៕