ឯកឧត្តម សុខ ពុទ្ធិវុធ និងលោកជំទាវ គឹម សេដ្ឋានី អញ្ជើញចុះអនុស្សរណៈយោគយល់គ្នាស្តីពីកិច្ចសហប្រតិបត្តិការអប់រំតាមប្រព័ន្ធឌីជីថល រវាងអង្គការ EBC និងក្រុមហ៊ុន CAMGSM

ភ្នំពេញ៖ នៅរសៀលថ្ងៃទី១១ ខែវិច្ឆិកា ឆ្នាំ២០២៤ ឯកឧត្តម សុខ ពុទ្ធិវុធ រដ្ឋលេខាធិការក្រសួងប្រៃសណីយ៍និងទូរគមនាគមន៍ និងជាប្រធានគណៈកម្មការគ្រប់គ្រងគម្រោងស្តីពីការបង្កើត និងប្រតិបត្តិការថ្នាលអប់រំដោយប្រើប្រាស់បច្ចេកវិទ្យាគមនាគមន៍ព័ត៌មាននិងប្រព័ន្ធផ្សព្វផ្សាយ និងលោកជំទាវ គឹម សេដ្ឋានី រដ្ឋលេខាធិការប្រចាំការក្រសួងអប់រំ យុវជន និងកីឡា និងជាអនុប្រធានគណៈកម្មការគ្រប់គ្រងគម្រោងស្តីពីការបង្កើតនិងប្រតិបត្តិការថ្នាលអប់រំដោយប្រើប្រាស់បច្ចេកវិទ្យាគមនាគមន៍ព័ត៌មាននិងប្រព័ន្ធផ្សព្វផ្សាយ បានអញ្ជើញជាអធិបតីក្នុងពិធីចុះហត្ថលេខាលើអនុស្សរណៈយោគយល់គ្នាស្តីពីកិច្ចសហប្រតិបត្តិការអប់រំតាមប្រព័ន្ធឌីជីថល រវាងអង្គការ អ៊ី ប៊ី ស៊ី (EBC) និងក្រុមហ៊ុន ខេម ជ្ជីអេសអេម ម.ក (CAMGSM)។

ពិធីនេះក៏មានការអញ្ជើញចូលរួមពី ឯកឧត្តម លោកជំទាវ លោក លោកស្រី នាងកញ្ញា ថ្នាក់ដឹកនាំ មន្រ្តី និងបុគ្គលិក នៃក្រសួងប្រៃសណីយ៍និងទូរគមនាគមន៍ ក្រសួងអបរំ យុវជន និងកីឡា ក្រុមហ៊ុន ខេម ជ្ជីអេសអេម ម.ក អង្គការ អ៊ី ប៊ី ស៊ី មជ្ឈមណ្ឌលកម្ពុជា ៤.០ វិទ្យាស្ថានគរុកោសល្យរាជធានីភ្នំពេញ មន្ទីរអប់រំ យុវជន និងកីឡាខេត្តកណ្ដាល លោកគ្រូ អ្នកគ្រូ នៃវិទ្យាល័យ ហ៊ុន សែន សេរីភាព អង្គការសកម្មភាពសម្រាប់ការអប់រំនៅកម្ពុជា និងក្រុមហ៊ុនអប្សរាមេឌាសឺវីស នៅមជ្ឈមណ្ឌលបទពិសោធអតិថិជន សែលកាត រ៉ូយ៉ាល់ រេលវេ។

កិច្ចសហការ ក៏បានគូសបញ្ជាក់ពីការប្តេជ្ញាចិត្តរបស់សែលកាតក្នុងការគាំទ្រដល់ការផ្លាស់ប្តូរឌីជីថលរបស់កម្ពុជា។ តាមរយៈការពង្រឹងវេទិកា EBC ភាពជាដៃគូនេះមានគោលបំណងផ្តល់សិទ្ធិអំណាចដល់សិស្សានុសិស្ស និងគ្រូបង្រៀន ធ្វើឱ្យការអប់រំអាចចូលដំណើរការបានគ្រប់ពេលវេលា គ្រប់ទីកន្លែង។ គំនិតផ្តួចផ្តើមនេះស្របតាមគោលនយោបាយរដ្ឋាភិបាលឌីជីថលរបស់កម្ពុជាឆ្នាំ២០២២-២០៣៥ ដែលទទួលស្គាល់ពីសារៈសំខាន់នៃការអប់រំឌីជីថលក្នុងការអនុញ្ញាតឱ្យសិស្សរៀនដោយខ្លួនឯង និងអនុវត្តលើសពីថ្នាក់រៀន ៕