រាជរដ្ឋាភិបាលអាណត្តិទី៧ ដឹកនាំដោយសម្តេចធិបតី ហ៊ុន ម៉ាណែត យកចិត្តទុកដាក់លើវិស័យអប់រំកាយ និងកីឡា ដើម្បីលើកកម្ពស់សុខមាលភាពប្រជាពលរដ្ឋ
ភ្នំពេញ៖ ឯកឧត្តម ស សុខា អនុប្រធានសហភាពសហព័ន្ធយុវជនកម្ពុជា ទទួលបន្ទុកខេត្តព្រៃវែង បាត់ដំបង និងខេត្តបន្ទាយមានជ័យ បានលើកឡើងថា រាជរដ្ឋាភិបាលកម្ពុជាអាណត្តិទី៧ ដឹកនាំដោយសម្តេចមហាបវរធិបតី ហ៊ុន ម៉ាណែត ក៏ដូចជារាជរដ្ឋាភិបាលនាអាណត្តិមុនៗ បានយកចិត្តទុកដាក់លើវិស័យអប់រំកាយ និងកីឡា ក្នុងនោះមានបំណងចម្បងបំផុត គឺលើកកម្ពស់សុខមាលភាពប្រជាពលរដ្ឋ។
ឯកឧត្តម ស សុខា លើកឡើងបែបនេះ ក្នុងពេលអញ្ជើញជាអធិបតីដ៏ខ្ពង់ខ្ពស់ក្នុងពិធីបើកការប្រកួតកីឡាដណ្តើមពានរង្វាន់សម្តេចក្រឡាហោម ស ខេង របស់ ស.ស.យ.ក. ខេត្តបាត់ដំបង ប្រចាំឆ្នាំ២០២៤ នៅទីលានសាកលវិទ្យាល័យជាតិបាត់ដំបង ខេត្តបាត់ដំបង នៅរសៀលថ្ងៃទី១០ ខែវិច្ឆិកា ឆ្នាំ២០២៤។
មានរបាយការណ៍ក្នុងឱកាសនោះ ឯកឧត្តម ស រដ្ឋា ប្រធានស.ស.យ.ក. ខេត្តបាត់ដំបង បានគូសបញ្ជាក់ថា ព្រឹត្តិការណ៍ការប្រកួតកីឡាដណ្តើមពានរង្វាន់សម្តេចក្រឡាហោម ស ខេង ក្រោមប្រធានបទ៖ “យុវជនម្នាក់លេងកីឡាមួយប្រភេទប្រចាំជីវិតនិងចៀសឆ្ងាយពីគ្រឿងញៀន” ក្នុងគោលបំណងដើម្បីឱ្យប្រជាពលរដ្ឋជាពិសេសយុវជនមានសុខភាពល្អ បង្កើននូវសាមគ្គីភាព មិត្តភាព ចៀសឆ្ងាយពីគ្រឿងញៀន និងកាត់បន្ថយភាពអសកម្មផ្សេងៗក្នុងសង្គម រួមចំណែកក្នុងការលើកកម្ពស់វិស័យកីឡាឱ្យកាន់តែរីកចម្រើនឈានដល់ការសម្រេចបានគោលនយោបាយជាតិ ស្តីពីការអភិវឌ្ឍន៍វិស័យអប់រំ និងកីឡា។
ឯកឧត្តម ស រដ្ឋា ឱ្យដឹងបន្ថែមថា ព្រឹត្តិការណ៍ប្រកួតកីឡានេះចាប់ផ្ដើមពីថ្ងៃទី១០ ខែវិច្ឆិកា ឆ្នាំ២០២៤រហូតដល់ពាក់កណ្ដាលខែធ្នូ ឆ្នាំ២០២៤ ដែលមាន៤វិញ្ញាសារួមមាន៖ បាល់ទាត់ បាល់ទះ វាយសី និងប៉េតង់។
ឯកឧត្តម សុខ លូ អភិបាលខេត្តបាត់ដំ បង ថ្លែងឱ្យដឹងថា ការរៀបចំព្រឹត្តិការណ៍ប្រកួតកីឡាពានរង្វាន់សម្ដេចក្រឡាហោម ស ខេង របស់ស.ស.យ.កខេត្តបាត់ដំបងប្រចាំឆ្នាំ២០២៤ គឺបានបង្ហាញសុខសន្តិភាព ការទំនាក់ទំនងល្អ សាមគ្គីភាព ភាតរភាព ចៀសផុតឆ្ងាយពីគ្រឿងញៀនគ្រប់ប្រភេទ និងការរីកចម្រើនទាំងផ្នែកសេដ្ឋកិច្ច-សង្គម ជាពិសេសផ្នែកឧស្សាហកម្មទេសចរណ៍ក្នុងខេត្តនិងគួរជាទីចាប់អារម្មណ៍ក្រោមពាក្យស្លោក «កីឡារស់ក្នុងសន្តិភាព»។
ឯកឧត្តម ស សុខា បានបង្ហាញសេចក្តីសោមនស្សយ៉ាងក្រៃលែងដែលស.ស.យ.កខេត្តបាត់ដំបងបានផ្តួចផ្តើមបង្កើតការប្រកួតកីឡាដណ្ដើមពានរង្វាន់សម្ដេចក្រឡាហោម ស ខេង ជាលើកទី២ និងបន្តធ្វើជារៀងរាល់ឆ្នាំ ក្នុងក្របខណ្ឌកម្រិតខេត្ត ដែលអនុញ្ញាតឱ្យបងប្អូនប្រជាពលរដ្ឋ ជាពិសេសយុវជនបានចូលរួមប្រកួតប្រជែងក្នុងគោលបំណង ៖ ទី១.បង្កើន និងលើកកម្ពស់សុខមាលភាពប្រជាពលរដ្ឋ ដែលជាសរសរទ្រូងប្រទេសជាតិ ឱ្យមានកាយសម្បទាមាំមួន កម្លាំងពលំខ្លាំងក្លា ជាស្នូលនៃការអភិវឌ្ឍខេត្ត ក៏ដូចជាជាតិមាតុភូមិទាំងមូល និងកាត់បន្ថយនូវ
ភាពអសកម្ម និងអំពើអបាយមុខក្នុងជួរយុវជន និងទី២. គឺដើម្បីរឹតចំណងសាមគ្គីភាព មិត្តភាពរវាង ស.ស.យ.ក តាមបណ្តាក្រុង ស្រុក សហការក្នុងការងារឱ្យមានប្រសិទ្ធភាព និងមានទំនាក់ទំនងល្អ។
ឯកឧត្តម ស សុខា សង្កត់ធ្ងន់ថា រាជរដ្ឋាភិបាលកម្ពុជាអាណត្តិទី៧ ដឹកនាំដោយសម្តេចមហាបវរធិបតី ហ៊ុន ម៉ាណែត ក៏ដូចជារាជរដ្ឋាភិបាលនាអាណត្តិមុនៗ បានយកចិត្តទុកដាក់លើវិស័យអប់រំកាយ និងកីឡា ក្នុងនោះមានបំណងចម្បងបំផុត គឺលើកកម្ពស់សុខមាលភាពប្រជាពលរដ្ឋ ផ្ដល់ឱ្យពលរដ្ឋស្រលាញ់កីឡា និងមកលេងកីឡា ដោយបានកសាងហេដ្ឋារចនាសម្ព័ន្ធជារូបវន្ត បង្កលក្ខណៈងាយស្រួល លើកកម្ពស់ និងលើកទឹកចិត្តដល់អត្តពលិកឆ្នើម ដែលទទួលបានជ័យលាភី។ ជាពិសេសកីឡា បានដើរតួនាទីសំខាន់ក្នុងកិច្ចការ ការទូត និងទំនាក់ទំនងអន្តរជាតិ ដែលជាចលករនាំឱ្យមាននូវសុខដុមភាពក្នុងសង្គមជាតិ ក៏ដូចជាក្នុងសកលលោកទាំងមូល។
ឯកឧត្តម ស សុខា ណែនាំដល់ភាគីពាក់ព័ន្ធត្រូវរៀបចំការប្រកួតប្រកបដោយការទទួលខុសត្រូវខ្ពស់ រៀបចំឱ្យមានស្ដង់ដារតែមួយដូចការប្រកួតលក្ខណៈជាតិនានាដែលនឹងផ្តល់ឱ្យកីឡាករបានរៀនសូត្រនូវច្បាប់ បទបញ្ជា និងបច្ចេកទេសដ៏ជាក់លាក់ និងឈានទៅកាន់ការប្រកួតនានាបន្តទៀត។គណៈកម្មការបច្ចេកទេសទាំង ៤ប្រភេទកីឡា ជាពិសេសមន្ត្រីអាជ្ញាកណ្តាល ចៅក្រម ត្រូវតែជាបុគ្គល ដែលមានការបណ្តុះបណ្តាលលើជំនាញជាក់លាក់ និងប្រកាន់ខ្ជាប់នូវក្រមសីលធម៌វិជ្ជាជីវៈ ផ្តល់ជូននូវសុក្រិតភាព យុត្តិធម៌ចំពោះអ្នកចូលរួមទាំងអស់។សូមស.ស.យ.ក. ខេត្ត បន្តរក្សានិងបង្កើតការប្រកួតនេះជារៀងរាល់ឆ្នាំ ក្នុងការផ្តល់ ឱកាសឱ្យប្រជាពលរដ្ឋ យុវជន និងបងប្អូន ស.ស.យ.ក. បានចូលរួមលេងកីឡា និងហ្វឹកហាត់ជាប្រចាំ។សូមបងប្អូនកីឡាករ និងអ្នកចូលរួមទាំងអស់ ត្រូវរក្សាឱ្យបាននូវសាមគ្គីភាព មិត្តភាព ពីព្រោះថា ការប្រកួតនេះសំខាន់គឺដើម្បីសុខមាលភាព និងសាមគ្គីភាពតែប៉ុណ្ណោះ៕
