អាមេរិក អាចនឹងលុបចោលផែនការតាំងទីលំនៅថ្មី សម្រាប់ជនភៀសខ្លួនមីយ៉ាន់ម៉ា រស់នៅក្នុងជំរំតាមព្រំដែននៃប្រទេសថៃ
បាងកក៖ អ្នកជំនាញសិទ្ធិមនុស្ស បានលើកឡើងថា សហរដ្ឋអាម៉េរិកអាចនឹងលុបចោលផែនការតាំងទីលំនៅថ្មីសម្រាប់ជនភៀសខ្លួនមីយ៉ាន់ម៉ាបច្ចុប្បន្ន ដែលរស់នៅក្នុងជំរំតាមព្រំដែននៃប្រទេសថៃគាំទ្រដោយសហរដ្ឋអាម៉េរិក បន្ទាប់ពីបេក្ខជនមកពីគណបក្សសាធារណរដ្ឋ លោក ដូណាល់ ត្រាំ ត្រូវបានបោះឆ្នោតជ្រើសរើសជាប្រធានាធិបតីទី៤៧ របស់សហរដ្ឋអាម៉េរិក។
ផែនការដែលមានគោលបំណងផ្លាស់ប្ដូរជនភៀសខ្លួន ជាក្រុមជនជាតិភាគតិចប្រហែល ៦ម៉ឺននាក់ទៅកាន់ប្រទេសទីបី ដែលផ្តល់ឱ្យពួកគេនូវលំនៅដ្ឋានអចិន្ត្រៃយ៍អាចនឹងត្រូវបានបិទជំរំទាំងនោះ ក្រោយគណបក្សប្រជាធិបតេយ្យចាញ់ឆ្នោត។ ជាមួយនឹងការបរាជ័យរបស់គណបក្សប្រជាធិបតេយ្យនៅក្នុងការបោះឆ្នោត សហរដ្ឋអាម៉េរិកអាចនឹងលុបចោលផែនការនេះទាំងស្រុង ដោយសារតែប្រធានាធិបតីជាប់ឆ្នោត លោក ត្រាំ មិនផ្តល់អាទិភាពដល់បញ្ហាសិទ្ធិមនុស្សឡើយ។ នេះបើតាម លោក ហ្វីលីព រ៉ូប៊ឺតសុន នាយកនៃក្រុមអ្នកតស៊ូមតិសិទ្ធិមនុស្ស និងការងារអាស៊ី។ លោក រ៉ូប៊ឺតសុន បានបន្ថែមថា ក្រោមការដឹកនាំរបស់លោក ត្រាំ សហរដ្ឋអាម៉េរិកនឹងអនុវត្តគោលនយោបាយគាំពារនិយម ពាណិជ្ជកម្មដោយដាក់ពន្ធអប្បបរមា១០ភាគរយលើការនាំចូលពីបរទេស។ លោកបានព្រមានថា ការណ៍នេះនឹងប៉ះពាល់ដល់វិស័យនាំចេញរបស់ប្រទេសថៃ ដោយសារសហរដ្ឋអាម៉េរិកជាទីផ្សារនាំចេញធំជាងគេរបស់ប្រទេសថៃ។
លោក រ៉ូប៊ឺតសុន បានព្យាករថា ភាពចលាចល ឬវិបត្តិអាចនឹងកើតឡើងនៅក្នុងសហរដ្ឋអាម៉េរិក ប្រសិនបើលោក ត្រាំ អនុវត្តគោលនយោបាយដែលលោកបានធ្វើយុទ្ធនាការ ដូចជាការចាប់ខ្លួន និងការនិរទេសបុគ្គល ដែលបានរស់នៅក្នុងសហរដ្ឋអាម៉េរិកអស់រយៈពេលជាច្រើនឆ្នាំ មិនមែនជាពលរដ្ឋអាម៉េរិក។ លោកបានមានសង្កត់ធ្ងន់ថា៖«ជនបរទេស ជាពិសេសអ្នកដែលមកពីបណ្តាប្រទេសនៅអាម៉េរិកឡាទីន អាចត្រូវបាននិរទេស ជាពិសេសជនអន្តោប្រវេសន៍ដែលមានវ័យចំណាស់ ខណៈកូនរបស់ពួកគេកើតនៅសហរដ្ឋអាម៉េរិក ហើយបានផ្តល់សញ្ជាតិអាម៉េរិកដោយស្វ័យប្រវត្តិអាចនឹងបន្តស្នាក់នៅក្នុងប្រទេសនេះបាន»។
លើសពីនេះ លោក រ៉ូប៊ឺតសុន បានចង្អុលបង្ហាញថា ការនិរទេសបែបនេះអាចនាំឱ្យមានការបែកបាក់គ្រួសារ ដែលបង្កឱ្យមានការប៉ះទង្គិចគ្នារវាងអាជ្ញាធររដ្ឋាភិបាល និងសាធារណជន ក៏ដូចជារវាងរដ្ឋនិងរដ្ឋ ជាពិសេសរដ្ឋដែលមានអភិបាលប្រជាធិបតេយ្យអាចបដិសេធមិនគោរពតាមគោលនយោបាយរបស់លោក ត្រាំ។ នាយកសិទ្ធិមនុស្ស និងការងារអាស៊ីរូនេះបន្ថែមថា លោក ត្រាំ ក៏អាចនឹងធ្វើអន្តរាគមន៍ជាមួយក្រសួងយុត្តិធម៌ និងប្រព័ន្ធតុលាការ ដោយប្រើវាជាឧបករណ៍នយោបាយ ដើម្បីដាក់ទោសអភិបាលរដ្ឋដឹកនាំដោយប្រជាធិបតេយ្យដែលប្រឆាំងលោក។ គួរបញ្ជាក់ថា លោក ត្រាំ ក៏អាចអនុវត្តគោលនយោបាយរឹតបន្តឹងសិទ្ធិស្ត្រីក្នុងការរំលូតកូនផងដែរ ខណៈការណ៍នេះអាចនាំឱ្យមានការតវ៉ា ឬការប្រឆាំងពីក្រុមស្ត្រី បណ្តាលឱ្យមានភាពចលាចលដែលមិនធ្លាប់មានពីមុនមកនៅក្នុងសហរដ្ឋអាម៉េរិក៕
