ឧបនាយករដ្ឋមន្ត្រី ហង់ជួន ណារ៉ុន៖ យុវជនម្នាក់ៗសុទ្ធតែមានតួនាទីជាអ្នកតំណាងឱ្យប្រទេសកម្ពុជាទាំងមូល

ភ្នំពេញ៖ ឯកឧត្ដមបណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្ត្រី រដ្ឋមន្ត្រីក្រសួងអប់រំ យុវជន និងកីឡា នាថ្ងៃទី១ ខែវិច្ឆិកា ឆ្នាំ២០២៤ បានទទួលជួបសម្ដែងការគួរសម និងផ្តល់អនុសាសន៍ណែនាំជូនដល់ ប្រតិភូយុវជននៃសមាគមនាវាយុវជនអាស៊ីអាគ្នេយ៍កម្ពុជា ចំនួន១៦រូប មុននឹងចេញដំណើរចូលរួមកម្មវិធីនាវាយុវជនអាស៊ីអាគ្នេយ៍ និងជប៉ុន (SSEAYP) លើកទី៤៨ នៅថ្ងៃទី០៣ ខែវិច្ឆិកា ឆ្នាំ២០២៤ នាពេលខាងមុខនេះ។

កម្មវិធីនាវាយុវជនអាស៊ីអាគ្នេយ៍ និងជប៉ុននេះ ត្រូវបានបង្កើតឡើងនៅឆ្នាំ១៩៧៤ ដោយរដ្ឋាភិបាលជប៉ុន និងរដ្ឋាភិបាលនៃប្រទេសសមាជិកអាស៊ាន ក្នុងគោលបំណងផ្តល់ឱកាសដល់យុវជនឱ្យទទួលបាន ការពង្រឹងនិងពង្រីកកិច្ចការទំនាក់ទំនង ការរៀនធ្វើការងារជាក្រុម ការផ្លាស់ប្តូរបទពិសោធ និងចែករំលែកចំណេះដឹងផ្សេងៗ។ នៅឆ្នាំ២០២៤ កម្មវិធីនេះត្រូវបានរដ្ឋាភិបាលជប៉ុន និងប្រទេសជាសមាជិកអាស៊ាន សម្រេចរៀបចំអោយមានដំណើរការជាប្រក្រតី ដោយប្រតិភូយុវជនចំនួន ១៦រូប មកពីបណ្តាប្រទេសនីមួយៗក្នុងតំបន់អាស៊ាន នឹងធ្វើដំណើរទៅចូលរួមកម្មវិធីនេះ ដោយនាវានឹងចូលចតនៅប្រទេសចំនួនបី គឺប្រទេសឥណ្ឌូនេស៊ី ប្រទេសវៀតណាម និងប្រទេសជប៉ុន។

មានប្រសាសន៍ក្នុងឱកាសនេះ ឯកឧត្តមបណ្ឌិតសភាចារ្យ ឧបនាយករដ្ឋមន្ត្រី បានចូលរួមអបអរសាទរ និងវាយតម្លៃខ្ពស់ដល់យុវជនជ័យលាភីទាំងអស់ ដែលបានខិតខំប្រឹងប្រែង សម្រេចបាននូវសមិទ្ធផលនេះ និងបានលើកទឹកចិត្តឱ្យបន្តខិតខំប្រឹងប្រែងបន្ថែមទៀត ក៏ដូចជាបានគូសបញ្ជាក់ថា ការចូលរួមក្នុងកម្មវិធីនេះ យុវជនម្នាក់ៗសុទ្ធតែមានតួនាទីជាអ្នកតំណាងឱ្យប្រទេសកម្ពុជាទាំងមូល។ ក្នុងន័យនេះ ឯកឧត្តមបណ្ឌិតសភាចារ្យ ឧបនាយករដ្ឋមន្ត្រី បានណែនាំដល់យុវជនគ្រប់រូប ឱ្យមានទម្លាប់ និងវិន័យច្បាស់លាស់ ចេះគោរពពេលវេលាខ្លួនឯង និងអ្នកដទៃ សិក្សាពីវប្បធម៌ និងរបៀបរបបរស់នៅរបស់ប្រទេសដទៃ សិក្សាពីបំណិនរឹង និងបំណិនទន់ ជាពិសេស មានភាពធន់ក្នុងខ្លួន ពោលគឺការតស៊ូព្យាយាម ហ៊ានជំនះរាល់ឧបសគ្គ ចេះសម្របសម្រួលខ្លួនទៅនឹងការប្រែប្រួលនៃមជ្ឈដ្ឋានជុំវិញខ្លួន។

សារជាថ្មីម្តងទៀត តាងនាមក្រសួងអប់រំ យុវជន និងកីឡា ឯកឧត្តមបណ្ឌិតសភាចារ្យ ឧបនាយករដ្ឋមន្ត្រី បានកោតសរសើរ និងវាយតម្លៃខ្ពស់ ដល់ថ្នាក់ដឹកនាំសមាគមនាវាយុវជនអាស៊ីអាគ្នេយ៍កម្ពុជា និងអ្នកពាក់ព័ន្ធទាំងអស់ ដែលបានចូលរួមជួយបណ្តុះបណ្តាលយុវជន ដើម្បីត្រៀមខ្លួនសម្រាប់កម្មវិធីនាពេលកន្លងមក និងបានជូនពរដល់យុវជនទាំងអស់ ឱ្យទទួលបានជោគជ័យក្នុងបេសកកម្មនេះ ប្រមូលយកចំណេះដឹង និងបទពិសោធថ្មីៗ ដើម្បីកសាងសមត្ថភាពខ្លួនបន្ថែមទៀត បង្កើតទំនាក់ទំនងល្អ មានគោលដៅច្បាស់លាស់ រៀនសូត្រ និងកែលម្អខ្លួនជាប្រចាំក្លាយជាធនធានមនុស្ស និងជួយអភិវឌ្ឍសង្គមជាតិនាពេលខាងមុខ។

គួររំលឹកផងដែរថា អគ្គនាយកដ្ឋានយុវជន បានប្រកួតប្រជែងជ្រើសរើសយុវជនដែលពោរពេញទៅដោយសក្តានុពល ចំនួន ១៥រូប និងប្រធានប្រតិភូចំនួន ១រូប ដើម្បីតំណាងយុវជនកម្ពុជា ចូលរួមក្នុងកម្មវិធីប្រចាំតំបន់ (SSEAYP) លើកទី៤៨។ ប្រតិភូទាំងអស់ បានឆ្លងកាត់វគ្គបំប៉នសមត្ថភាពទៅលើបំណិនទន់ ការងារជាក្រុម ការពិភាក្សាក្រុម និងការសម្តែងសិល្បៈវប្បធម៌ ក្រោមកិច្ចសហការរវាង អគ្គនាយកដ្ឋានយុវជន និងសមាគមនាវាយុវជនអាស៊ីអាគ្នេយ៍កម្ពុជា៕