យុវសិស្សក្នុងគ្រួសារក្រីក្រ ១រូប មានម្តាយជាអ្នកស៊ីឈ្នួលលាងចានឱ្យគេ និងឪពុករត់ម៉ូតូឌុប នៅខេត្តបាត់ដំបង ខិតខំតស៊ូរៀនជាប់បាននិទ្ទេស A ទទួលបានអំណោយមនុស្សធម៌ពីកាកបាទក្រហមកម្ពុជា
ភ្នំពេញ៖ នៅថ្ងៃទី១ ខែវិច្ឆិកា ឆ្នាំ២០២៤ លោកបូរ ភ័កត្រា និងក្រុមការងារដែលជាអ្នកស្ម័គ្រចិត្តកាកបាទក្រហមកម្ពុជា បានចុះទៅដល់ផ្ទះយុវសិស្សម្នាក់ដែលគ្រួសារមានការខ្វះខាត ប៉ុន្តែអាចតស៊ូខិតខំរៀន និងប្រឡងបានជាប់និទ្ទេស A ព្រមទាំងបានយកអំណោយមនុស្សធម៌របស់កាកបាទក្រហមកម្ពុជា ដែលមានសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ជាប្រធាន ជូនដល់គ្រួសារក្មួយប្រុស ដើម្បីសម្រាលការលំបាក។
យុវសិស្ស គ្រុឌ សុវណ្ណារ៉ា ជាសិស្សថ្នាក់ទី12A នៃវិទ្យាល័យហ្វារពន្លឺសិល្បៈ រស់នៅភូមិអញ្ចាញ សង្កាត់អូរចារ ក្រុងបាត់ដំបង ខេត្តបាត់ដំបង មានបងប្អូនចំនួន ០៣នាក់ គ្រួសារមានជីវភាពខ្វះខាត ខណៈឪពុកមានជំងឺប្រចាំកាយ ឯម្តាយជាកម្មករ តស៊ូរកប្រាក់ចិញ្ចឹមគ្រួសារ និងកូនៗឱ្យបានរៀនសូត្រគ្រប់ៗគ្នា។ អ្វីដែលគួរឱ្យសរសើរគឺកូនៗមានកតញ្ញូចំពោះឪពុកម្ដាយ និងតស៊ូប្រឹងប្រែងរៀនសូត្រ ជាក់ស្ដែងកូនច្បងរូបនេះបានខិតខំរៀនរហូតប្រឡងសញ្ញាបត្រមធ្យមសិក្សាទុតិយភូមិបាននិទ្ទេស A។
ក្នុងឱកាសចុះទៅដល់ផ្ទះក្មួយសុវណ្ណារ៉ា លោក បូរ ភ័កត្រា កោតសរសើរនូវទឹកចិត្តឪពុកម្ដាយតស៊ូចំពោះកូន និងកូនៗដែលមានការតស៊ូនឹងការសិក្សា ព្រមទាំងលើកទឹកចិត្តក្មួយៗឱ្យបន្តការខិតខំរៀនសូត្រជាបន្តទៀតដើម្បីតបស្នងនូវការលះបង់របស់អ្នកមានគុណ ព្រមទាំងបាននាំយកអំណោយមនុស្សធម៌របស់កាកបាទក្រហមកម្ពុជា ជូនដល់គ្រួសារក្មួយដើម្បីសម្រួលជីវភាពគ្រួសារ និងបន្តការសិក្សា។
អំណោយមនុស្សធម៌ជូនគ្រួសារក្មួយប្រុសរួមមាន ៖ អង្ករ ២៥គីឡូក្រាមចំនួន២ការុង, មី ២កេស ទឹកស៊ីអ៊ីវ ២យួរ, ត្រីខ ២០កំប៉ុង ឃីត (មុង ភួយ សារុង ក្រមា) ២កញ្ចប់ និងថវិកាចំនួន១លានរៀល៕
